Isaya 62:9 - Siswati 1996 Bible

⁹ Kodvwa labo labakuvunako bayawukudla badvumise Simakadze, nalabo lababutsa emagelebisi, liwayini bayawulinatsela etibuyeni tendlu yami lengcwele.”

Isaya 62:9 Iomraidhean Croise

Isaya 55:2

Niyicitselani imali kuloko lokungesiso sinkhwa? Niyisebentelani intfo lengenelisi? Lalelani, lalelani kimi, nidle loko lokulungile, nemphefumulo wenu uyawujabula ngekudla lokumnandzi kakhulu.

Isaya 65:13

Ngako-ke naku lokushiwo yiNkhosi Simakadze, itsi: “Tinceku tami tiyawudla, kodvwa nine niyawulamba; tinceku tami tiyawunatsa, kodvwa nine niyawukoma; tinceku tami tiyawujabula, kodvwa nine niyawuhlazeka, nijabhe.

Isaya 65:21

Bantfu bayakwakha tindlu, bahlale kuto, bayawuhlanyela tivini, badle titselo tato.

Isaya 65:22

Bangeke baphindze bakhe tindlu, bese kuhlala labanye bantfu kuto, nome bahlanyele, bese kudla labanye. Ngobe njengemalanga esihlahla ayawuba njalo-ke nemalanga ebantfu bami. Labakhetsiwe bami bayawutijabulisa sikhatsi lesidze ngemisebenti yetandla tabo.

Jeremiya 31:5

Uyawuphindze futsi uhlanyele tivini emagcumeni aseSamariya; balimi bayawutihlanyela, bajabule ngetitselo tato.

Hezekeli 40:14

Lendvodza yakala kugudla lingembili letibonza, letiphume taphondla kutungeleta lingekhatsi lendlu yelisango, kwakungemamitha labengaba ngema-30. Lesilinganiso sasifikela kulomhubhe lowawubukene nesibuya.

Joweli 2:26

Nitawuba nenala, nidle nize nesutse, nitalidvumisa Libito laSimakadze Nkulunkulu wenu, lowente timangaliso emkhatsini wenu. Sive sami singeke siphindze sihlazeke.

Zakhariya 3:7

“Naku lokushiwo nguSimakadze longuSomandla, utsi: ‘Nawutawuhamba etindleleni tami ugcine nemiyalo yami, indlu yami-ke uyakuyibusa uphatse netibuya telithempeli lami; mine ngiyawukunika indzawo emkhatsini waletingilosi letime lapha.

Dutheronomi 12:12

Tfokotani kuSimakadze Nkulunkulu wenu, nine nemadvodzana nemadvodzakati enu, netisebenti tenu letidvuna naletisikati, nemLevi lohlala kulelo dolobha lenu, njengobe yena ate sabelo nome lifa lelingelakhe.

Dutheronomi 12:7

Ngulapho-ke lapho niyawudlela khona nine nemindeni yenu, nijabule embikwaSimakadze ngako konkhe lenabeka sandla senu kuko, ngobe Simakadze Nkulunkulu wenu anibusisile.

Dutheronomi 16:11

Niyawujabula embikwaSimakadze Nkulunkulu wenu endzaweni layakuyikhetsela kubeka Libito lakhe, kujabule nine, kanye nemadvodzana nemadvodzakati enu, netigcili netigcilikati tenu, nemaLevi lakulamadolobha enu, nebetive, netintsandzane, nebafelokati labahlala kanye nani.

Dutheronomi 16:14

Niyawujabula eMkhosini wenu nine, nemadvodzana nemadvodzakati enu, netigcili kanye netigcilikati tenu, nemaLevi, nebetive, netintsandzane, nebafelokati labahlala emadolobheni enu.