Isaya 44:22 - Siswati 1996 Bible

²² Tikhubekiso takho ngitishanyele njengelifu. netono takho njengenkhungu yasekuseni. Buyela kimi, ngobe sengikuhlengile.”

Isaya 44:22 Iomraidhean Croise

2 Samuweli 12:13

Davide wakhuluma kuNathani, watsi: “Ngonile kuSimakadze.” Nathani waphendvula watsi: “Simakadze sewusisusile sono sakho. Ungeke usafa.

2 Tikhronike 6:21

Vani kuncusa kwenceku yakho kanye nekwesive sakho, ema-Israyeli, nasithandaza sibheke kulendzawo. Vani usetulu ezulwini, indzawo yakho yekuhlala, ubotsi ungeva, bese uyatsetselela.

Nehemiya 4:5

Ungacali ulimbonye licala labo, futsi ungatesuli tono tabo embikwakho, ngobe bajikijele labakhi ngetinhlamba emehlweni.”

Jobe 37:11

Wetfwesa emafu ngemswakama, asakate imibane igcwale kuwo.

Tihlabelelo 103:12

Njengobe imphumalanga yehlukene nenshonalanga utikhweshise kangako-ke tono tetfu kitsi.

Tihlabelelo 109:14

Shangatsi Simakadze angakhumbula bubi baboyise, nesono senina singete sesulwa.

Tihlabelelo 130:8

Nguye lotawuhlenga baka-Israyeli abephule etonweni tabo tonkhe.

Tihlabelelo 51:1

Ngihawukele, Nkulunkulu, ngekwemusa wakho; yesula tiphambuko tami ngekwesihawu sakho lesikhulu.

Tihlabelelo 51:9

Fihla buso bakho etonweni tami, wesule bonkhe bubi bami.

Eksodusi 18:9

Jethro wajabula kakhulu nasalandziswe ngako konkhe lokuhle ema-Israyeli labekwentelwe nguSimakadze, nekuwakhulula kwakhe esandleni semaGibhithe.

Isaya 1:18

Simakadze utsi: “Wotani manje sitewubonisana. Nome tono tenu tibovu njengengati, titawuba mhlophe njengangcocwane, nome tibovu tju, titawuba mhlophe njengeboya bemvu.

Isaya 1:27

ISiyoni itawuhlengwa ngekwemtsetfocotfo, labatisolako bahlengwe ngekulunga.

Isaya 31:6

Buyelani kuNkulunkulu, nine ma-Israyeli, nine lesenimhlubuke kangaka.

Isaya 33:24

Kute lohlala eSiyoni loyakutsi: “Ngiyagula,” netono talabo labahlala khona tiyawutsetselelwa.

Isaya 41:14

Ungesabi, wena mphetfu, Jakobe, awu, mntfwanyana, Israyeli, ngobe mine matfupha ngitakusita,” kusho Simakadze, uMhlengi wakho, Longcwele waka-Israyeli.

Isaya 43:1

Kodvwa nyalo, naku lokushiwo nguSimakadze, lowo lowakudala, wena Jakobe, lowo lowakubumba, wena Israyeli, utsi: “Ungesabi, ngobe ngikuhlengile, Ngikubite ngelibito lakho, wena uwami.

Isaya 43:25

“Mine, ngimi, losusa tiphambuko takho ngenca yami, tono takho angiphindzi ngitikhumbule.

Isaya 48:20

Sukani lapha eBhabhulona. Wabalekeleni emaBhabhulona. Kumemeteleni loku ngenjabulo lenkhulu, nikubabate, kutfumeleni emikhawulweni yemhlaba, nitsi: “Simakadze umhlengile Jakobe, inceku yakhe.”

Isaya 51:11

Labahlawulelwe baSimakadze bayawubuya. Bayawungena eSiyoni ngekuhlabela nangekujabula kwaphakadze lokuyawuba ngumchele etinhloko tabo. Kutfokota nekujabula kuyawuba kubo, lusizi nekububula kubabalekele.

Isaya 52:9

Hlokomani ngetingoma tekujabula kanyekanye, nine tindzala taseJerusalema, ngobe Simakadze ubadvudvutile bantfu bakhe, iJerusalema uyikhululile.

Isaya 55:7

Lomubi akayiyekele indlela yakhe lembi, nalokhohlakele ayekele imicabango yakhe lemibi. Akaphendvuke abuyele kuSimakadze, uyawuba nemusa kuye, akabuyele kuNkulunkulu wetfu, ngobe uyawumtsetselela ngenkhululeko.

Jeremiya 18:23

Awu Simakadze, kodvwa wena uyawati onkhe lamasu abo labafuna kungibulala ngawo. Ungawatsetseleli lamacala abo, futsi-ke ungacali utesule leto tono tabo embikwakho. Abaketulwe embikwakho, bavukele ngesikhatsi sentfukutselo yakho.

Jeremiya 3:1

“Nangabe indvodza ilahla umkayo, bese lomfati wendza kulenye indvodza, lendvodza ingabuyela yini kulomfati? Utsi kepha lelive lingete langcola lonkhe? Kodvwa utiphatsise kwengwababane ngekuphinga nemadvodza lamanyenti; manje sewungabuyela njani kimi?” kusho Simakadze.

Jeremiya 33:8

Ngiyawubahlanta kuso sonkhe sono labasente kimi, ngibuye ngibatsetselele tonkhe tono tekungihlubuka kwabo.

Jeremiya 50:20

Kulawo malanga, nangaleso sikhatsi, kuyawuphenywa ngelicala laka-Israyeli, kodvwa aliyiwutfolakala, kuphenywe nangetono takaJuda, kodvwa kute nasinye lesiyawutfolakala, ngobe ngiyakuyitsetselela insali lengayishiya,” kusho Simakadze.

Hezekeli 16:63

Ngiyawutsi-ke nase ngikwentele inhlawulo yakho, yako konkhe loku lose ukwentile, bese uyakhumbula udliwe ngemahloni, ungaphindzi uwuvule umlomo wakho ngenca yalokuhlazeka kwakho lokungaka, kusho iNkhosi Simakadze.’ ”

Mikha 7:18

Kute nkulunkulu lofana nawe, Simakadze; wena utsetselela tono tensali yakho lesele ekubhujisweni. Awuhlali utfukutsele siphelane, kodvwa ujabulela kusikhombisa umusa wakho.

Zakhariya 1:3

Ngako-ke tjela bantfu, utsi: Naku lokushiwo nguSimakadze longuSomandla, utsi: ‘Buyelani kimi,’ kusho Simakadze longuSomandla, ‘nami ngitawubuyela kini,’ kusho Simakadze longuSomandla.

Zakhariya 3:4

Lengilosi yakhuluma kulabasiti lababeme embikwayo, yatsi: “Mkhumuleni letimphahla takhe letingcolile.” Yakhuluma kuJeshuwa, yatsi: “Ase ubuke, sono sakho sengisisusile, futsi ngitakwembatsisa imijiva lehlantekile lemihle kakhulu.”

1 kubaseKorinthe 6:20

natsengwa ngelinani lelikhulu. Ngako-ke mdvumiseni Nkulunkulu emitimbeni yenu.

Dutheronomi 32:43

Jabulani nine tive kanye nesive sakhe, ngobe uyawutiphindzisela ngengati yetinceku takhe. Uyawutiphindzisela etitseni takhe, ente inhlawulo yekubuyisana nelive lakhe nesive sakhe.