MICAH 5:3 - Sumi Naga CL (Re-edited) Bible (BSI)

³ Tighenguno apunu küsü lo akeu huno punu moke kutolo Pa no panongu qhive nani; Tithiuno pa thiküzümi no Israelmi lau ideighi nani.

BAIBEL (BSI)

³ Tighenguno khuuno punu niye anikeno tipauno anu punu moke kutolo AMPEU no pawu timiqo pano ghumi lau phesuvetsu nani. Tileno pano ghakhu lono halepheve akeqono pano timiqo gholo kumqo kitheluve nani.

MICAH 5:3 Iomraidhean Croise

KUKAMI ATUGHIU 14:16

Jeroboam xine huno Israelmi pelo axine shivepe kehu Pa no Israel qhive nani.”

YEKIKITHI AKINIU 30:7

Nongu ye no puasü eno no thiküzümi no Ampeu Alhou lau amikucho shimove ketoi kevilo, kughengu nongu no ithulu anike Pa no panongu pighive ke.

LESHELE 67:3

Ashiayeqo pelo O sheqhe pelo, O Alhou; timi kümtsü no O sheqhe pelo!

ISAIAH 11:11

Tipa ghuloki lo Ampeu no Assyria, Egypt, Pathros, Cush, Elam, Shinar, Hamath, eno azüghimkü lo Paw timi achilishi ghüpüaghi keqo itaghi ghuthu akiniu xaphe nike Pa küka peitha nani.

ISAIAH 49:6

Pa no pi: “I no O pelo Jacob shiaye xaqhe eno Israelmi püxü püakeqo sachile saghi peniye I qeu shipekeu ye mthülo ke; ikehu I no o pelo shiyeqo lau aküvü ghi shipeni, tishikeu lono Iw xakulupu no ayeghi shekha tolu peni.”

JEREMIYA 23:5

“Jualo, Ampeu no asheshu, I no David ghenguno amikucho Loka lakhi süqheni keu tsala cheni, pa no akükau shino alokütsü lono ayepe nani, eno ayeghi lo kuchou xakütha ngo achipiu mikucho anani.

JEREMIYA 31:1

“Ampeu no sheshu, tipa ghuloki lo I no Israel lagha kümtsü Lhou shive nani, eno panongu no Iw timi shive nani.”

EZEKEL 34:16

I no pühave keqo phuwu nani, eno I no itsüsü wuve keqo sachile ighi nani, izapusü akeqo khakide küdai tsü nani, miqemlei keqo shikumto tsü nani, eno atha pubeyi akeqo ngo akumto shi akeqo ye I no kütsave nani. Achipiu lono I no panoqo loji nani.

HOSIYA 11:8

Ni ye kishino o pheveni kea, O Ephraim? Ni ye kishino o qhiveni kea, O Israel? Ni ye kishino o pesü Admah toi shitsüni kea? Ni ye kishino Zeboiim toi o peithani kea? I mlo no kilive ani; Iw kikimiye ye lüvüi eno mtshaminhei ke.

HOSIYA 2:14

“Ikehu, julo, I no li züizani, eno yenguyike-a lo saighi no ivüilai li pütsa kümtshani.

HOSIYA 2:9

Tighenguno ado tove kemtsa I no I thi ngo I tsaiji ikhichile luve nani, eno li phikümsa küzü chekeu Iw akülüphi ngo phepheike phi I no luchileve nani.

AMUS 5:15

Alhoksa mithi eno akivi kimiyelo, khagho lo achipiu xakütha puthuphelo; tishi aye Ampeu, aqokitikhi Lhou no Joseph lagha lo ghükulumi kimiyeqhiyi lunani.

MICAH 4:4

ikemu kümtsü no pütüta tsaibo eno mububo qholo nani, eno khunomu panongu shikümsa monani, kughengu aqokitikhi Mpeu kichi lono piqhivae.

MICAH 4:7

ala chemlave kemi pesü I no ghükulumi shive nani, eno hapupove kemi pesü akumto shiye shive nani; Ampeu no Zion lono hipa ghuloki lono alholo panoqo shou ayepe nani.

MICAH 5:7

Tishino Jacobw ghükulumi ye Ampeu tsüzü toi, atsüni shou tsüghuqhi ketoi, ashiaye kutomo dolo anani ti ye timi ghenguno munuve chemo momu timi nuliqo ngokhe chemoe.

MICAH 5:8

Eno Jacobw ghükulumi ye shiye eno ashiaye kutomo gholo anani, abongshuu lakhino aghasa lo tüghashiqo gholo aketoi, abongshuu lhothe no ambeloji gholo aketoi, kughou pa sholuni keno xapheni kemi kühano nedaqhi eno sütha pinyive cheni.

MICAH 6:14

Nongu no chunani kemu aghaqimo nani eno nongu lolo amzü anani; nongu no kike nani kemu kütsüpe qhimla nani, ikemu kiu kütsü püaghini keno I no azütakikihi tsüve nani.

MICAH 7:13

Ikemu ayeghi ye tile küxümi kümla ghenguno pighive nani.

ZEKHARIA 10:6

“I no Judah lagha shikumto nani eno I no Joseph lagha xalu nani. I no panoqo kimiyeqhiyi kehu panoqo saideghi nani, eno panongu ye I no mili püaghimo ketoi nani, kughengu Ni ye Ampeu pano Lhou eno I no panongu khochile nani.

MATTHEW 1:21

Li no anu lakhi punu nani, eno no ye pa je Jisü kutsü nani, kughengu pa no paw timiqo pano xine lono xalu nani.”

MATTHEW 12:50

Kughengu khukhumu I pu kungugha lo akeu pulou shikeu huno I thiküzümi ngo I chelimi eno I zake.”

MATTHEW 25:40

Akükau no panoqo khochile nani, ‘Kuchou no I no nongu vilo piani, nongu no I thiküzü chelimi hipaqo gholo akitilau lau kiu shi keno, nongu ye I lau shive tsüae.’

Rommi 8:29

Timi khunoqo Alhou no azünatha ghi ithi akeno panongu pelo Pa Nu julho kimihi shiluve peniye Pa no panoqo kishe kütüta shive, tishianguno athiküzümi kutomo gholo Anu pelo amsüu shi peniye ke.