EZEKEL 28:2 - Sumi Naga CL (Re-edited) Bible (BSI)

² “Timi nu, Tyre kükapuu vilo pilo, Ampeu Alhou no ishi piani: “O mlo ye aqheküza eno nono pike, ‘Ni ye alhou, ni ye alhouqo lakhü lo eno azüghi mta lo iqa acheni,’ ikemu nono alhou toi kümsü anamu no ye timi thono alhou kumoe,

BAIBEL (BSI)

² “Thinikuau timio, Tur lo ayehkipeu vilo ni, Akughushu MPEU no pa vilo kiu pianikeno tipau pesu pilo: Aqhekuzashi tsutsungojuve puzu noye alhou lakhi kepi piwuveke. Nono pikeuno noye alhou lakhi toi azughino vehopesu akuka lakhulo iqa. Noye alhou lakhi kepi tipau kishishi shiaghiluvi, ikemu noye thinikuami kethono alhou kumoe.

EZEKEL 28:2 Iomraidhean Croise

BOTHUBO 3:5

Kughengu Alhou no ithi anike kughou nokujo no hipau chuni keno, nokujo nhethi ye khaqhive nani, eno nokujo ye Alhou toi, akivi ngo alhoksa ithive nani.”

YEKIKITHI AKINIU 26:16

Ikemu kughou pa no akumto shive keno, pa ye qhezauve no pa kuluqhive. Pa ye pa Lhou Ampeu lau amikucho shimove eno Ampeu chineki lo tsüngqüi keu kiptia lo piti nike ilove.

LESHELE 9:20

Aküighüpu lo panoqo süvelo, O Ampeu! Shiyeqo pelo panongu ye timi kepi ithi pelo!

AHOLE 16:18

Kütsakungo nike zülo aqheküza acheni, eno ikiqi mphi züu tsütsüngoju keu acheni.

AHOLE 18:12

Kütsakungo mphilo timi mlo ye tsütsüngoju cheni, ikemu agigihupu ighi nike züu aqhokigheu shicheni.

ISAIAH 2:12

Kughengu aqheküzami eno tsütsüngoju kemi ghenguno aqokitikhi MPEU no atsala lakhi kuto püani tipani no panoqo sünheqhive nani;

ISAIAH 23:8

Kilhishomi no agigihu küami, lhidimi no kükami toi achekeu mishighüna, kükami süküsüu Tyre shou khuu no ishi kughuve kea?

ISAIAH 31:3

Egyptmi ye Alhou kumono timi, panow khurshi ghi ashi phimpi kethono aghungu kumoe. Ampeu no Pa u chhopuwo kelo akukuphu tsü akeu ngo ithulu akeu kinikujo ikiqi pühave nani.

ISAIAH 47:8

Tighenguno itehi hi inilo, nongu aghakiqipu kimiye eno sükusho qholo ngono amlo lono ishi piche keqo, “I likhi ke, I nguno kütami khumu kühae; Ni ye chimemi toi iqamo nani momu atianuli pühave keu mloküsa ithimo nani”:

EZEKEL 16:49

Julo, o tsünipu Sodom kipimi ye hike: li eno li ngaqo ye aqheküza, achuqupu achili eno pofushi keu lokughuno ae, ikemu kumlhomi ngo akukuphu avehupu shi akemi kuphu tsümoke.

EZEKEL 26:17

Panongu no nongu shou akumlo le phe nani eno nongu vilo pi nani, “‘Nongu azüghi mkülo küami, nongu ye kishi pühave akea, O ajekipi mishighüna, no ye azüghi lo akumtou; li eno li ghakütsami no tile akemi shithüghüi cheke!

EZEKEL 28:1

Ampeu tsa I lau ighi:

EZEKEL 28:17

O jukivi ghenguno no ye qhezave; o jekipi ghenguno nono o lokütsü shipüsave. I no ayeghi lo o peve; kükami shipiye no o ju peniye shike.

EZEKEL 28:9

O ghiqhini kemi zülo no ye timi thono alhou kumo keghi pano nhethe lono no ye itaghi, ‘Ni ye alhou ke,’ ipi ani keshea?

EZEKEL 29:3

Ampeu Alhou no ishi piani pi pütsa: “Julo, Egypt kükau Pharaoh, Ni ye o lachile ani, dragon kije pa ghoki mta lo ani, tipau no pi, ‘Nile ye Iw ke; I no I ghenguno mlae.’

EZEKEL 29:9

Egypt yeghi ye küghüküghalei kütsaleve nani. Tileno panongu no Ni ye Ampeu kepi ithi nani. “Nono, ‘Nile ye Iw eno I no mlake,’ ipike ghenguno

EZEKEL 31:10

“Tighenguno Ampeu Alhou no ishi piani: Tino qhemghai thuiku khüngküsü tove no chuqumghaive keu lono qhezave kehu

DANIEL 11:12

Kughou aqokitikhi sawuve keno, pa mlo ye qhezave nani, eno pa no qhethonhe chighi shou ghiqhive nani ikemu tokulu shimo nani.

DANIEL 11:36

“Akükau ye pa no pulo keu shi nani. Pa no pa ampi sheqhe eno shikuloghi pe alhou kümtsü shou qhinani, eno aqheküzapu tsa pesü alhouqo shou Alhou lau pi nani. Axukighide shikupuve moke kutolo pa ye kinikülü shi nani; kughengu azah kiu shive akeno ti ye shikupu nani.

DANIEL 11:37

Pa ye pa puasü lhouqo lau, momu totimiqo no kimiye chekeu lhou laumu amlo tsüqhiyi mo nani. Pa ye kiu lhou laumu amlo tsümo nani, kughengu pa no kümtsü shou pa ampi süqhe nanie.

HABAKUK 2:4

“Julo, pa ngulho ye aqheküzae; pa ye akümzümi kumoe, ikemu achipiu-mikuchomi ye aküpülü lono xü nanie.

ZEFANIA 2:15

Hi no alokivi eno sükusho akeu mishighüna, li mlo lono piche, “Ni thono kütami ye khumu kühae.” Li ye kiutoi küghüküghaleive akelae, tüghashi kungo-a shivae! Khunoqo no li hechesü wu keno atuthu kuloghi sheqhi eno au sükumqo luve ke.

ZEKHARIA 9:2

Israel sasü kughuthu akeu Hamath, eno Tyre ngo Sidon no ighono alokütsü kemu tipaqo shou ghi jupuku ani.

Luke 14:9

khuu o kusü keno ampeu huno ighi püzü o vilo, ‘O lakhü pesü timi hipau tsüvelo,’ ipi aye, no ye tile akukujopu shi akuchuniu lakhü lo iqa masave nani.

ZAKINIU 8:14

tileno nongu lolo aqheküza ikughive no nongu no Egypt lo aqüaxe lo akelono xaphelu keu Ampeu nongu Lhou kümsümave nosake.

2 Thes. 2:4

pa no alhou ipi chekeu momu ajulho kümlla jeli mjochile no tipaqo shoqa nani, eno pa ampi pesü Alhou kepi sheshu no Alhou chineki lo pa kungo-a shinani.

1 Tim. 3:6

Pa ye anileshi Khristo chineye lukemi shimoni, tikumo aye pa ye aqheküza lono kumobeive no tüghami gholo küghaküthapu lo ikiqive nani.

1 Peter 5:5

Tihutoi, nongu khunono alhothe keno kichimi qhoqhülo. Kümtsü no lakhino lakhi huthuni ke aqhokighe nanu pepulo, kughengu “Alhou ye aqheküzami mjochile cheni, ikemu aqhokighemi lau küpükini tsü chenie.”

Piyeküsü 17:3

Kungumi huno aghungu lono I xapusü yenguyi ke-a lo wu, tile totimi lakhi no huchuyi keu tüghashi shou iqa akeu I no ithulu, tüghashi ti ye akütsü tsüni eno akibo chighi xapusü aphi lo küthaküghapu je chhitoi aghi.

Piyeküsü 18:7

Li ampi no li jepipi eno aghakiqishi küakini kuthole xü kehu tipa qhemi aghime eno akumlo li tsülo, kughengu li no amlo lono piche, ‘Ni ye kükaliu lakhi shi iqa ani, ni ye chimemi kumoe, eno ni ye khilemu akumlo sholumo nani.’