Nehemia 9:8 - Bibilia Ilagano Lya Kale 2015

⁸ Ūkamona ī ng'holò yakwe gīkī yalī nshikaanu ū kūlī bebe, hūna lūūlū ūbeeja ilagane nang'hwe, gīkī ūkūng'winha ī sī ya Bakanaani, Bahītī, Baamoni, Bapelizi, Bayebusi, na Bagiligashi. Na ng'hana ūshikīlīja ū kwisagīja kwako, nguno ūlī ntūngīlīja.

Nehemia 9:8 Iomraidhean Croise

wandījo 12:7

Hūna ū SEEBA ūng'wilongela ū Abulamu ūng'wīla gīkī, “Ū būbyīle wako, nalīwinha ī sī yenīyī.” Ū Abulamu ūbeeja ng'walīlo kūlwa ng'wa SEEBA ūyo akang'wilongela.

wandījo 15:6

Ū Abulamu ūgūzunya ū mhayo gwa ng'wa SEEBA, nang'hwe ūng'wisaabīla būtūngīlīja.

wandījo 22:12

Ūng'wīla, “Ūtizūnkuumya ū nyanda! Lekaga ū kūng'wītīla mhayo gose gose. Ī haha naamanaga lūūlū gīkī ūng'ogohile ū Mulungu, nguno ūtaniimile ū ng'wana wako, ū ng'witūnja wako ūyo ūmò wike!”

2 Sang'weli 22:31

Ū SEEBA ū ng'wene ī nzīla yakwe ngololoku; ū mhayo go ng'wa SEEBA gūtī na būka. Ū wei alī lūmūda kū bose abo bakūpeelela kūlī we.

1 Mihayo ya Shikū 1:14

Na a Bayebusi būbiza ba shibyalīlwe shakwe, na a Baamooli, na a Bagiligashi,

1 Mihayo ya Shikū 16:16

Ī lilagane īlo akabeeja nū Abulahamu, ī shilahīlo īsho akang'wilahīlīla Isaka.

Ezila 9:15

Ee SEEBA Mulungu wa Isilaeli, ū bebe ūlī ntūngīlīja! Ī lelo īyī tūlīho tūlekilwe gītī būshiigo. Ūlītūbona tūlīho aha mu būsobya wise, alīyo atīho nūūlū ūmò wise ūyo igeleelilwe kwīmīīla kū būtongi wako.’”

Nehemia 9:33

Ū mu yose īyo yatūgwīlaga, ū bebe ūkatūmamīlaga būtūngīlīja gwa; ūkīītaga mu wishigwa, alīyo a bise twīta mu būhūbi.

Zabuli 116:5

Ū SEEBA alī na shigongo hangī ntūngīlīja, ū Mulungu wise alī nsaatwa wa banhū.

Kūfuma 3:17

Na lūūlū ū nene nalīhaya gīkī, ‘Nakūng'wīnja ū mu sī ya būpīna wing'we, ī ya Misili; namutwale kū sī ya Bakanaani, Bahītī, Baamoli, Bapelizi, Bahīvī na Bayebusi; sī ya būhondo. Yakūsūlūlūka būki na mabeele.’

Kūfuma 3:8

Na lūūlū nizaga kūbapīja, kūbīnja ū mu nkono gwa Bamisili, nabafunye ū mu sī yenīyo nabatwale kū sī yawiza hangī ngalī, sī ya būhondo; yakūsūlūlūka būki na mabeele sī īyo ī haha bakwikalaga mo Bakanaani, Bahītī, Baamoli, Bapelizi, Bahīvī na Bayebusi.

Ezekia 33:24

Bebe ng'wana wa munhū, a banhū abo basaagīīlile ū kū mapagale ga mu sī ya Isilaeli bakūhayaga gīkī, “Ū Abulahamu walī munhū ūmò dūhū alīyo h'akinhwa ī sī yenīyī kūbiza wingīji bokwe; a bise tūlī bingī no, hū kūhaya twinhilwe dūhū ī sī yenīyī ībize wingīji wise.”

Kūbala 13:29

Ū ng'witogolo lya Negevu gakikalaga mo Maamaleki; ū kū sī ja magūlya ū kwene bakikalaga Bahītī, Bayebusi, na Baamoli. A Bakanani a bene bakikalaga kū ng'hilimva na nyanza, na mu mbalama ya mongo gwa Yolodani.”

Kūbala 23:19

Gīkī, ū Mulungu atī munhū kūshisha nose aloma lome; atī ng'witūnja o ng'wa mbatī, gīkī nose agalūche maganiko. Ī gīsī atayombaga hūna wīta? Atafunyaga kwisagīja washikīlīja?

Shītwa 13:22

Aho wang'wīnja ū ng'wenūyo ūbabūūkīja Daūdi kūbiza ntemi wabo; ūyo akankaanīla alīhaya gīkī, ‘Naapandīkile munhū ūyo alī hang'holò yane, Daūdi ng'witūnja wa ng'wa Yese, h'ūyo akūshikīlīja pyī īyo nītogilwe.’

Kūshokeela 26:3

Ū ngabīji ūyo alī h'isumbī ū mu shikū jenījo ūkūshika ūng'wīle, “Ī lelo nalīhaya hape ū kūlī SEEBA Mulungu wako gīkī, naashikile lūūlū ī haha ū mu sī īyo SEEBA walī wabilahīlīla bakūlūgenji bise gīkī akūtwinha.”

Kūshokeela 32:4

Ū wei alī Shiganga, nīyo ī milīmo yakwe mishikanu; nī nzīla jakwe pyī jitūngīlīgije. Alī Mulungu nsanyiwa hangī atahūbaga, hama nīyo alī ntūngīlīja na ndeeba.

Kūshokeela 7:1

Ū SEEBA Mulungu wako ūlū ūkūshisha ū mu sī īyo ūjile kwīdima ībize yako, hūna ūgapeeja mahanga mingī gūkwīngīla, ga Bahītī, Bagiligashi, Baamoli, Bakanani, Bapelizi, Bahīvī, na Bayebusi, mahanga mpungatī mataale na ga nguzu kūtinda bebe;

Kūshokeela 9:5

Ūtūjaga kwīsola ī sī ya banhū benabo kūlwa nguno ya būtūngīlīja wako, nūūlū kūlwa būgololoku wa nhūngwa jako. Alīyo īlī kūlwa nguno ya būsoso wa nhūngwa jabo, hī nguno yene ū SEEBA Mulungu wako akūbapeeja bakwīngīle, ashikīlīje īyo wabisagīja bakūlūgenji bako ba Abulahamu, Isaka na Yakobo.

Tito 1:2

kūlwa nguno ya kwisagīlwa kwa būpanga wa shiku jose, ūbo Mulungu, ūyo atīko kūlomaloma, watwisagīja kūfuma kale, kūko ikanza lītaalī kwandya kūbiza ho.

Bahebrania 11:17

Kūlwa kūzunya, ū Abulahamu akamfunya ū Isaka aho wageng'wa; ū wei ūyo walī winhwa wisagījiwa, ūzunya kūmfunya ū ng'wana wakwe ūyo walī ūmò dūhū ng'wenūyo, gīkī abize shitambo;

Bahebrania 6:18

Hūna ū mu mihayo īy'ībīlī yenīyo īyo ītī ya kūgalūka, īyo Mulungu atūdūla kwīhaya mu būlomolomo, a bise tūkūlūngūjiagwa no no no; a bise abo tūkūpeelaga kūja kū būtongi kūjūwanukūla ū wisagījiwa ūbo būtūūlilwe ko.

Yoshwa 11:23

Na lūūlū ū Yoshwa ūbiza wīsola ī sī ī yose, gīt'ūmo walī wanagīīlīla Musa; wīgabanhya kūbiza wingīji ū kū Baisilaeli kūlenganīla nū mumo jilī ī ng'anda jabo. Hūna ī sī yūlembeela ū mu mihayo ya būlūgū.

Yoshwa 11:3

Nū kū Bakanaani ba kū kīya na a ba kū ng'weli, a Baamooli, Bahītī, Bapelizi, nū ū kū Bayebusi ba kū sī ya magūlya, nū kū Bahīvī ba kū ntulumenho gwa lūgūlū lwa Helimoni, mhandī ja Mispa.

Yoshwa 23:14

Ū nene ī haha nalī bbihī kūja ūko sī yose ījile; mumanile hape ū mu ng'holò jing'we nū mu būpanga wing'we bose, ī gīkī ū mu yose īyo SEEBA Mulungu wing'we wang'wisagīja, gūtīho nūūlū gūmò ūyo gūtashikīīlile. Būlī kwisagīja kwakwe kwashikīīlile, gūtalebile mhayo nūūlū gūmò yaya.

Yoshwa 9:1

Hūna a batemi ba kū ntambūko gwa ng'weli ya mongo gwa Yolodani aho bīyiigwa ī yenīyī, batemi ba Bahītī, Baamooli, Bakanaani, Bapelizi, Bahīvī, na Bayebusi; abo baalī bazengile mu sī ya magūlya, na kū sī ja ntubīlo, na a ba kū mbalama ya Nyanza ī Nhaale kūshisha mhandī ja Lebanoni;

1 Yohana 1:9

Ūlū tūshitambūūla ī shibi shise, ū wei ng'wene nsanyiwa, hangī ntūngīlīja, akūtūlekeja ī shibi shise na kūtweja gete twīnge ū mu būhūbi wise.