Nehemia 9:2 - Bibilia Ilagano Lya Kale 2015

² A Baisilaeli abo baalī baalekana nabo pye a banhū ba mahanga, bakīmīīla būtambūūla ī shibi shabo nī sha bakūlūgenji babo.

Nehemia 9:2 Iomraidhean Croise

1 Batemi 8:47

alīyo aho balī ū mu sī ya būding'wa wabo yenīyo bashikile kūgalūka, ī ng'holò jabo jūkūshokela būkūlīlīīla ū mu sī ya banhū abo baabapyena benabo, būlīla balīhaya, ‘Tūlī bahūbi, twīta yabūbi na yamalofu.’

Ezila 10:11

Alilūūlū, ī haha ntambūūlīlagi ū SEEBA Mulungu wa bakūlūgenji bing'we, ng'wīte īyo ayīhayile. Mulekane nabo a banhū abo mukwikalaga hamò nabo, na a bake bing'we a ba kūfuma mu banhū ba mahanga.”

Ezila 6:21

Ī pasaka yenīyo bakīlya a Baisilaeli abo baalī bashoka kūfuma kū būsaamiwa, na būlī ng'wene ūyo walī wazunya kūbiza hamò nabo, ūyo alekanile nū būsoso wa nhūngwa ja banhū ba mahanga, abo baalī bazengile ng'wenūmo hamò nabo, hūna ūbiza namya o ng'wa SEEBA Mulungu wa Isilaeli.

Ezila 9:1

Aho yabīta ī yenīyī, a batongeeji ba banhū biza kūnibona; būniwīla, “A Baisilaeli, na a bagabīji na Balawī bataalī ū kūlekana na a banhū ba mahanga nī mihayo yabo ī ya malofu, mihayo ya Bakanaani, Bahītī, Bapelizi, Bayebusi, Baamoni, Bamoabu, Bamisili, na Baamoli.

Ezila 9:15

Ee SEEBA Mulungu wa Isilaeli, ū bebe ūlī ntūngīlīja! Ī lelo īyī tūlīho tūlekilwe gītī būshiigo. Ūlītūbona tūlīho aha mu būsobya wise, alīyo atīho nūūlū ūmò wise ūyo igeleelilwe kwīmīīla kū būtongi wako.’”

Ezila 9:2

Nguno babasola bamò ba bashīke babo būbīīta kūbiza bake babo, na bake ba bitūnja babo. Ū mu gīko ī lihanga lyeela ī haha līsanganīkīlile na banhū ba mu sī jenīji. Nīyo a basugi hū batongeeji ū mu mhayo gwabūbi gwenūyū.”

Nehemia 1:6

nalīlomba ūtege ū gūtū gwako, na a miso gako ūgaloleche; wigwe ū kūlomba kwa ntūmami wako, ūmo akūkūlombelaga līīmi na būjikū, kūlwa nguno ya batūmami bako, a Baisilaeli. Nalītambūūla ī shibi shise a bise Baisilaeli, īsho twīta tūkūhūba bebe. Ū nene hamò nī kaya ya ng'wa baba tūlī bahūbi ū kūlī bebe.

Nehemia 10:28

“A banhū a bangī, a bagabīji, Balawī, na a balang'hani ba ha mibita, bīmbi, batūmami ba mu hekalu, na a bose abo bikomanya ū kū banhū ba sī jenīji kūlwa kūlondeela shilagīlo sha ng'wa Mulungu, pye na a bake babo, na bitūnja babo a bose, na a bashīke babo abo badūgije kwitegeleja mihayo,

Nehemia 10:29

a bose ī haha balī hamò na a baana ba ng'wabo, a batongeeji. Pye balitūūla ha sīlīlī y'izumo na kwiyilahīja gīkī bakūshilondeela ī shilagīlo sha ng'wa Mulungu, īsho binhwa mu nzīla ya ng'wa Musa ū ntūmami o ng'wa Mulungu. Na gīkī bakūgalondeela mu welwa ng'holò pye a malange ga ng'wa SEEBA Mulungu wise, na a kaīle, na a kahelele kakwe.

Nehemia 13:3

A banhū aho bigwa gīko būbakomanya pye a banhū abo baalī ba kūfuma mu ba mahanga, bīnga ū mu Baisilaeli.

Nehemia 13:30

A henaho nūbiza nabīītīla mhayo gwa kūbinha wela, būlekana nī mihayo ī yose ī ya mahanga; hūna nūbahelela ī ndīīma jabo, būlī ng'wene na nīmo gwakwe.

Zabuli 144:11

Nikomoolage ūnipīje kūfuma mu nkono gwa banhū abo natabamanile, abo milomo yabo yokalile būlomolomo, nū nkono gwabo gwa būlyo gūtī na būng'hana.

Zabuli 144:7

Gūgoloolage ū nkono gwako kūfuma kwigūlya, nikomoolage ūnipīje kūfuma mu minzī mingī, kūfuma mu nkono gwa banhū abo natabamanile,

Sumo 28:13

Ū wa kūbisa shibi shakwe Ītūbeela ī mihayo yakwe, alīyo ūyo ūshitambūūla na kūshileka akachīlagwa shigongo.

Isaya 2:6

Ū bebe wabalekanīgije a banhū bako, ī numba ya ng'wa Yakobo. Nguno ya kūlondeela shīmīle sha banhū ba sī ja Kīya, nīyo balīyūtūmamīla na būchūja gītī Bafilisiti, hangī bakwidimaga makono na banhū ba mahanga ayo gatakūmanile.

Yelemia 14:20

Ee SEEBA, tūlibūūla ū būbi wise nū būkenaagūji wa bataale bise, nguno twakwītīla shibi bebe.

Yelemia 3:13

Ū bebe ng'wene zunyaga dūhū ī gīkī ūlī ng'hūbi, wangomela ū SEEBA Mulungu wako, ū būtogwa wako ūkūwaalanyaga sagala kū bamulungu bangī, būlī hene a ha mbeho ya ntī gwa madūūtū mingī. Hū kūhaya ūlemile ū kūliigwa Ī lilaka lyane,’” Alīhaya SEEBA.

Danyeli 9:20

Aho nalīyomba na kūlomba, kūnū nūshitambūūla ī shibi shane nī shibi sha banhū bane a Baisilaeli, na kūng'wikūmbīlīja ū SEEBA Mulungu wane kūlwa nguno ya lūgūlū lwakwe lwela,

Hosea 5:7

Batī basanyiwa ū kūlī SEEBA; bakabyalaga baana ba nda ja bū. Alilūūlū, ī shigukulu shabo sha Ng'weji mpya shikūbalya a boi, pye na a malaale gabo.