Nehemia 8:9 - Bibilia Ilagano Lya Kale 2015

⁹ Pye a banhū būyūlīla aho bīyigwa ī mihayo ya shilagīlo; hūna ū Nehemia ū nsugi, nū Ezila ū ngabīji na nangi wa shilagīlo, hamò na a Balawī abo balangaga būbawīla a banhū, “Lekagi ū kūlīla, nguno ū lūshikū lwenūlū lūlī lwela kūlī SEEBA, Mulungu wing'we.”

Nehemia 8:9 Iomraidhean Croise

2 Batemi 22:11

Ū ntemi aho wīyiigwa ī mihayo ya mu shitabo sha shilagīlo, ūtandūla ī shizwalo shakwe.

2 Batemi 22:19

Īkī ī ng'holò yako yoolechaga hape gīkī wagalūkaga na kwidoohya ū kū būtongi bo ng'wa SEEBA aho wīyiigwa ī mihayo īyo nīhaya kūlwa nguno y'ipandī lyenīlī na a banhū baamo, ī gīkī bakūzung'wa, nī lipandī lyabo lībize buyīkī; na lūūlū ū bebe īkī watandūlaga na shizwalo shako ūlīla na kū būtongi bone, nakwigwaga, alīhaya ū SEEBA.

2 Mihayo ya Shikū 15:3

A Baisilaeli baalī bakwīja ī shikū batī hamò nang'hwe ū Mulungu wa ng'hana, yaya nūūlū kūbiza na ngabīji wa kūbalanga, nī shilagīlo būshileka.

2 Mihayo ya Shikū 30:22

Ū Hezekia ūlūngalūnga na a Balawī a bose mihayo ya kūbatimbya ng'holò, nguno boolechaga gīkī bagūmanile ū nīmo gwa kūnamya ū SEEBA. A banhū būjimala ī shikū mpungatī ja shigukulu shenīsho bakūlyaga shilīwa īsho baalī bahelelilwe, kūnū bakūfunyaga shakwinha sha būsangī na kūnkumīlīja ū SEEBA, ū Mulungu wa bakūlūgenji babo.

2 Mihayo ya Shikū 34:19

Ū ntemi aho wīyigwa ī mihayo ya mu shitabo sha shilagīlo, ūtandūla ī shizwalo shakwe.

2 Mihayo ya Shikū 34:21

Ūbawīla, “Jagi mukabūje ū kūlī SEEBA; munibūgīje ū nene na a banhū abo basaagile a ba Isilaeli nī Yuda. Mubūje kūlwa nguno ya mihayo īyo yandīkilwe ū mu shitabo īsho shabonagwa shenīshi. Īlī hape gīkī ū būpelanu bo ng'wa SEEBA ūbo akūtwitīīla būlī būtaale no; nguno a babyaji bise batagūdimile ū mhayo go ng'wa SEEBA; na batītile gīt'ūmo īlī pyī ī mihayo īyo yandīkilwe ū mu shitabo shenīshi.”

2 Mihayo ya Shikū 35:3

A Balawī, abo baalī baamala kwejiwa kūlwa ng'wa SEEBA, abo nīmo gwabo gwalī kūbalanga a banhū; ūbawīla, “Ī lisandīko lyeela lītūūlagi mu hekalu, īyo wīzenga Solomoni ng'witūnja o ng'wa Daūdi ntemi wa Isilaeli; mutī na nguno ya kwikala ng'ūlībūūcha ha mabega ging'we būlī makanza. Ī haha managi gīkī ū nīmo gwing'we gūlī kūntūmamīla SEEBA Mulungu wing'we, hamò na a banhū bakwe a Baisilaeli.

Ezila 2:63

Ū nsugi wa sī ūlagīla batizūshilya ī shilīwa ī sheela no no no, kūshisha igele ngabīji ūyo adūgije kūlola mihayo bo kūtūmamīla Ulimu na Sumimu.

Ezila 7:11

Īyī yene mihayo ya kūfuma mu nyalūba īyo ntemi Atashasta akang'wandīkīla Ezila, ūyo walī ngabīji na nangi ndeeba wa mihayo ya malange ga ng'wa SEEBA, hamò na a kahelele kakwe ū kū Baisilaeli.

Nehemia 10:1

Abo bakatūūla ī meng'ho jabo baalī aba, Nehemia, ūyo walī nsugi; ng'witūnja o ng'wa Hakalia, na Zedekia,

Nehemia 12:26

Ū nīmo gwabo bagwīta mu shikū ja ng'wa Yoakimu, ng'witūnja o ng'wa Yeshua, ng'witūnja o ng'wa Yozadaki na mu shikū ja ng'wa Nehemia, ūyo walī nsugi wa sī, na Ezila ū ngabīji na nangi wa shilagīlo.

Nehemia 7:65

Hūna lūūlū ū nsugi wa sī ūlagīla batizūshilya ī shilīwa ī sheela no no no, kūshisha igele ngabīji ūyo adūgije kūlola mihayo bo kūtūmamīla Ulimu na Sumimu.

Nehemia 7:70

Bamò ba batongeeji ba kaya jabo bakafunya shakwinha kūlwa nguno yago ū nīmo; ū nsugi ūfunya kilo inaane na nusu ja zahabu, mabakuli makūmi atanò, ng'hanjo magana atanò na makūmi adatū ja bagabīji.

Nehemia 8:2

Hūna ū mu lūshikū lwa kwandya lwa ng'weji gwa mpungatī, ū ngabīji Ezila ūshenha ī shilagīlo ū kū banhū abo baalī bibilinga; baalīho bagosha na bakīma, pye na a baana, bose abo baalī badūgije kwitegeleja.

Nomeji 3:4

Ikanza lya kūlīla, n'ikanza lya kūseka; ikanza lya ng'hūngū, n'ikanza lya mbina.

Isaya 61:3

kūlagīja kūlwa banhū abo bakūlīlaga ng'hūngū mu Sayuni; bapandīke ngikili ya būlabo a ha ng'wanya gwa mabu, maguta ga būyegi a ha ng'wanya gwa kūlīla ng'hūngū, na shizwalo sh'ikūjo a ha ng'wanya gwa moyo gūchongomeelile. Hūna bakwitanwa gīkī Mitūndū ya būtūngīlīja, shihamvwa sha ng'wa SEEBA kūlwa kūkumūcha ikūjo lyakwe we ng'wenekīlī.

Hosea 4:6

A banhū bane bakūkenaagūkaga kūlwa nguno ya kūgayiwa būmani. Ū bebe īkī ūbūlemile ū būmani, nū nene naakūlemile ū kūbiza ngabīji wane; īkī ūkūshidalahaga ī shilagīlo sha ng'wa Mulungu wako, nū nene nakūbadalaha a baana bako.

Bagabīji 23:24

Bawīlage a Baisilaeli gīkī, “Ū lūshikū lwa kwandya lwa ng'weji gwa mpungatī, lūkūbiza lwing'we lwa kwifuula; lūshikū lwa kūfuula mhembe kūlwa kwiyizūkīja kwibilinga kwela.

Malaki 2:13

Gūlīho mhayo gūngī ūyo mukūgwītaga: Mukūnaganyaga shisoji ha ng'walīlo gwa ng'wa SEEBA. Mukūlīlaga na kūtūla ng'hūngū īkī atūshidīlīlaga ī shakwinha shing'we, atūshanukūlaga na būyegi kūfuma mu makono ging'we.

Balumi 3:20

Hū kūhaya ū kū būtongi bokwe atīho ū wa kūbalīlwa būtūngīlīja kūlwa kūshikīlīja shilagīlo; nguno ū mu shilagīlo gūlīmo mhayo gwa kūmana shibi.

Balumi 7:9

Nose hū kūhaya gīkī, naalī mpanga aho naalī natī ha sīlīlī ya malange; alīyo aho shiza shilagīlo, ī shibi shūpīmbūka,

Kūshokeela 12:12

Na lūūlū ū kwipandī lyenīlo h'ūko mukūnyegela ū SEEBA Mulungu wing'we; a bing'we na a bitūnja bing'we na abashīke bing'we, na a basese bing'we bagosha na bakīma, hamò na a Balawī abo balī ū mu mizengo ying'we, abo batī na ngabo nūūlū wingīji wabo boi benekīlī.

Kūshokeela 12:7

Ū kwipandī lyenīlo h'ūko mukūyūlya na kūyega kū būtongi bo ng'wa SEEBA Mulungu wing'we, a bing'we nī kaya jing'we. Shiyegelagi pyī īsho SEEBA Mulungu wing'we akūng'wīlūkīla kūshīta.

Kūshokeela 16:11

Hūna ūkūnyegela ū SEEBA Mulungu wako, ūlī a h'ipandī īlo alalīsole kūlwa wikalo wa lina lyakwe; ū bebe ng'wenekīlī nū ng'witūnja wako nū nshīke wako, nū nsese wako ngosha na nkīma. Nū Nawī yaya ū kū ng'wība; ūyo alī mu mizengo yako, nū ngeni, nū mpīna, nū nchīlwa ūyo akwikalaga hamò nang'ho.

Kūshokeela 26:14

Nūūlū aho naalī ng'wikanza lya būpīna nataliile shose shose kūfuma ū mu ngabo gwa shikolo ī sheela. Nūūlū aho nalī mu shikū ja būsoso natagemile kūkuumya shose shose ū mu shikolo shenīsho; nūūlū natashifunije shimò shaho kūlwa nguno ya bafu. Naabizile ng'wigwi ū kūlī SEEBA Mulungu wane, nīītile pyī ī yose gīt'ūmo wanilagīīlīla.

Yakobo 4:9

Pīnīhalagi mulīle na kūtūla ng'hūngū, ī seko jing'we jigalūke kūbiza ng'hūngū, nū būyegi wing'we būgalūke kūbiza būpīna.