Nehemia 8:10 - Bibilia Ilagano Lya Kale 2015

¹⁰ Ū Nehemia ūbawīla, “Alilūūlū ī haha muje mukalye shizeeze, mung'we na sha kūng'wa shawiza; nū yūyo atī na wa kūmeegeja shose shose muntwalīle. Ū lūshikū lwenūlū lūlī lwela kūlī SEEBA, mutapīnīhalage. Nguno ū būyegi bo ng'wa SEEBA h'ī nguzu jing'we.”

Nehemia 8:10 Iomraidhean Croise

1 Batemi 8:66

Ū lūshikū lwa ha ntondo yaho ūbalaga a banhū baje kaya; aho bamala kūnombela ū ntemi būsambaala, būja kaya bayegaga no, nī ng'holò jabo jazalabanaga kūlwa nguno ya wiza bose ūbo SEEBA akang'wītīla ū ntūmami wakwe ū Daūdi, na a banhū bakwe a Baisilaeli.

1 Mihayo ya Shikū 16:27

Ikūjo na magaka shimpīdije we, ū mu wikalo wakwe būlīmo būdūla na būyegi.

Nehemia 8:11

A Balawī būyūbahuumūja pye a banhū balībawīla, “Huumūlagi nguno ū lūshikū lwenūlū lūlī lwela; lekagi ū kūpīnīhala.”

Nehemia 8:12

Hūna pye a banhū būja kaya ng'hana, būkalya na kūng'wa mu būyegi, na kūbatwalīla shilīwa abo baalī batī nasho; shūbiza shigukulu sha būyegi no, nguno bakīyitegeleja īyo bakatongwa.

Esita 9:19

H'ī nguno yene a Bayudaya ba kū magūngūli, ū kū mizengo īyo ītapīndīlījiwe ndugu, badimīīlile lūshikū lw'ikūmi n'inè ū mu ng'weji gwa Adali, h'ūlo balwisaabile gīkī lwa kūyega na kūbeeja shigukulu; lūshikū lwa kwitūmīla manong'ho ga kwihoja.

Esita 9:22

Ī shikū jenījo bajiisaabe gīkī jikabinha a Bayudaya kwifuula kūfuma mu kūluhiwa na banishi babo, nū ng'weji gwenūyo bagūbone gīkī ū mugo, ū būpīna wabo būkagalūka kūbiza būyegi, nī ng'hūngū yabo yūgalūka kūbiza lūshikū lwa būyegi. Ūbakomeleja gīkī ī shikū jenījo bajīīte kūbiza shikū ja kūyega na kūlya shigukulu. Shikū ja kwiyinha shilīwa shawiza, na kūbizūkwa a bahabī.

Zabuli 149:2

Ū Isilaeli ni anyegelage ū Mūmbi wakwe, a banhū ba Sayuni leka basangabale kūlwa Ntemi wabo.

Zabuli 89:17

Nguno ū bebe ūl'ikūjo lya nguzu jabo; na kūlwa wiza wako ī lipembe lise līkūgūngūhiagwa.

Sumo 17:22

Ī ng'holò nyegu būgota būsoga ū wenūbo, alīyo ū moyo ūyo gūsheedekejiwe gūkakalamuchaga maguha.

Nomeji 11:2

Nong'haga banhū mpungatī, alichene, nūūlū banaane gīko; nguno ūtagamanile a makoye ayo gashikile kwilonga ū mu sī.

Nomeji 2:24

Ū kūlī munhū gūtīho mhayo gwawiza gītī kūlya na kūng'wa na kūshiyegela īsho akūshinoga nogelaga. Alīyo nago ū gwenūyū naagūbonile gīkī gūfumile mu nkono go ng'wa Mulungu.

Nomeji 3:13

Nīyo ū Mulungu abahelelile a banhū gīkī būlī ng'wene alye na kūng'wa, na kwīyegela ī milīmo yakwe pyī ī yose.

Nomeji 5:18

Nose ū nene naabonile gīkī, gashi ī gete ū mhayo ū nsoga ūyo shiigelile agwīte ū munhū, gūlī gwa kūlya na kūng'wa na kūshiyegela īsho akūshinogelaga ū mu shikū ngehu ja būlamu bokwe, ījo Mulungu angabīlile a ha sīlīlī ya līīmi. Nguno ū gwenūyū hū ngabo gwakwe.

Nomeji 9:7

Jaaga nayo īyo ūkīyītaga nakale, lyaga ī shilīwa shako ūshilūmbe, nī divai ng'waga na ng'holò nyegu; nguno ū Mulungu ayīyegelile īyo ūkwītaga.

Lyīmbo lya ng'wa Solomoni 5:1

Bebe nke wane, naashikile ū mu ngūnda gwane ng'wanong'wise; nī ngazu naabingile, pyī nī shisanjo shane. Na a malela gane naagaliile, nūbūng'wa nū būūkī, nī divai yane nīng'wa, pye na a mabeelè. Bing'we banwani bichane, lyagi; batogwa, ng'wagi ūmo mutogelilwe.

Isaya 49:5

Alilūūlū, ī haha ū SEEBA alīyomba, ūyo wanibūmba mu nda ya ng'wa mayū gīkī nabize ntūmami wakwe kūlwa kūnshosha Yakobo kūlī we, na kūbabilinga Baisilaeli kūlī we; nguno ninhilwe ikūjo kū būtongi o ng'wa SEEBA, ū Mulungu wane wabizile nguzu jane.

Isaya 61:10

Nakūnyegelaga no no no ū SEEBA, nīyo ū būpanga wane būkūnyegela Mulungu wane; nguno wanizwīkile shizwalo sha būpīji, hama ūnigumīīla ng'handa ya būtūngīlīja, gīt'ūmo ntooji akigalilīlaga watūūla n'ihima ly'ikūjo kū ntwe gwakwe, nūūlū gīt'ūmo ntoolwa akiyaalūlīlaga wazwalīla būlenji wa sīīlī ja zahabu.

Yoeli 2:23

Banhū ba Sayuni yegagi, yegelagi mulī SEEBA Mulungu wing'we, nguno wang'winhile ī mbula ya mīsa mu būtūngīlīja. Wamutūmīlile mbula ningī, kwandīja ya mu mīsa kūshisha ya kū būkalīkījo bo ng'waka, ūmo wītīlaga nī kale.

Zakalia 14:21

Būlī nungū ū mu Yelusalemu nū mu Yuda īkūbiza neela kūlwa ng'wa SEEBA wa Badūla bose, hama būlī bene abo bakwiza kūfunya shitambò bakūsola nungū jimò na jimò bazugīle mo. Nīyo ū mu lūshikū lwenūlo atilonga nsūlūja ū mu numba ya ng'wa SEEBA wa Būdūla bose.

Luka 11:41

Shifunyagi tame ī sha mu gatī shibize manong'ho, hū shikūmubeelela pyī ī shikolo.

2 Bakolinto 8:2

Nūūlū īkī baalī mu būgeng'wa wabūbi, nguno ya būluhi kūlwa būhabī būtaale, alīyo nahene ū būyegi wabo waseesekelaga kūlwa wiza ng'holò wabo.

Bafilipi 3:4

Īkī ūlū mhayo gwa kūsendamīla mīlī dūhū, nūūlū ū nene nagūdūgije; ūlū alīho munhū asendamīlile mihayo ya mīlī, ū nene nalī kū būtongi ū mu yenīyo.

Kukundulwa 11:10

A bikaji ba mu sī bakūyega na kayegele kataale kūlwa nguno yabo a bahangi benabo, bakūyinong'ha kūlwa kwihoja boi benekīlī na benekīlī, nguno a bahangi benabo baalī babaluhya no a bikaji ba mu sī.

1 Sang'weli 25:8

Babūūjage a boi a batūmami bako bakūkwinha yaape. Alilūūlū, babo kūūko basūmba, bayanda bane naabatūma; babonage ho nguno twakwizīīlaga ng'wikanza lyawiza. Baba, a batūmami bako nū ng'wana wako ū Daūdi binhage tūpamba, ūmo ūlaabonele bebe ng'wenekīlī.’”