Nehemia 4:2 - Bibilia Ilagano Lya Kale 2015

² Ūyomba kū būtongi wa banwani biye, na bashilikale ba Samalia badegelekile; ūhaya, “A Bayudaya a bagokolo gokolo aba balīīta mhayo kī shi ī gete? Bakwīzenga gete ī ndugu yabo? Bakūfunya shitambò? Bakūmala mu lūshikū lūmò dūhū? A mawe ayo gakenaagūlwa moto genayo, nīyo hangī galī mu malūndo ga mapalala gīko, bakūdūla gete ū kūgasoboola bagatūmamīle hangī?”

Nehemia 4:2 Iomraidhean Croise

Ezila 4:4

Hūna a banhū abo baalī ū mu sī yenīyo bandya kūtūmamīla nzīla ja kūbagwisha ng'holò a Bayudaya, gīkī babogohye ū kūzenga.

Nehemia 12:27

Hūna aho lyashika ī likanza lya ndugu ya Yelusalemu kwejiwa, a Balawī bakakoowa hose hose ūko baalī, benhwa Yelusalemu kūlwa kūlūyegela ū lūshikū lwa kwejiwa kwa ndugu; batūle nzege na ndono, na malimba ng'wikanza lya kwīmba mīmbo ga būyegi na kūlūmba.

Nehemia 12:43

Ū lūshikū lwenūlo bakafunya shitambò shitaale, hangī nīyo baalī bayega kīngī nasho, nguno ū Mulungu walī wabīītīla mhayo gwa kūbinha kūyega. Na a bakīma baalī na būyegi no pye na a baana, nīyo ī lilaka lya būyegi wa bana Yelusalemu lyashikaga kūle no.

Nehemia 4:10

Gwike twahayimanīla a banhū ba Yuda bayūhaya, “Yabanojaga ī milīmo a binhīlīja ba bazengi, hama na a malūndo ga makambagūkīle mingī no, tūlīlemeelwa ū kūgūtūmama ū nīmo gwa kūzenga ī ndugu.”

Nehemia 6:15

Hūna lūūlū ū nīmo gwa kwīzenga ī ndugu gūshila mu lūshikū lwa makūmi abīlī n'itanò ng'weji gwa Elūli; gūbiza gwasola ikanza lya shikū makūmi atanò n'ibīlī.

Zabuli 83:4

Bakwiwīlaga, “Bing'we tūbahūlūlagi pyī ī lihanga lyabo, ī līna lya ng'wa Isilaeli lītizikala līkwizūkīlagwa hangī.”

Yelemia 26:18

“Mu shikū ja ng'wa Hezekia ntemi wa Yuda, Mika muna Moleshesi akahanga, ūbawīla pye a banhū ba sī ya Yuda, ‘Ū SEEBA wa mabità alīhaya gīkī, Ī Sayuni īkūlīng'wa gītī ilaale, Ī Yelusalemu īkūbiza matūūgo ga makambagūkīle, ū lūgūlū lwa hekalu gītī shigūlū shokalīīlwa masaka.’

Yelemia 33:24

Ūtaalī ū kwigwa ūmo bakūhayīlaga a banhū benaba; ī gīkī, “Ū SEEBA wajiponya ī kaya jenījo būbīlī wajo, nūūlū īkī wajikoma wei ng'wenekīlī? Hūna lūūlū babibengelegije a banhū bane; booya ū kūbisaaba gīkī nabo bal'ihanga.

Danyeli 9:25

“Managa na witegeleje gīkī, Kūfuma ikanza lya kūfunyiwa shilagīlo sha nzengo gwa Yelusalemu kūzengwa būpya na kūshoshiwa ūmo gwikalīlaga na kale, kūshisha ikanza lya kwiza Ng'witīīlwa Maguta, ūyo alī nsugi, īkūbiza ho mifungo mpungatī; na mifungo makūmi atandatū n'ībīlī. Gūkūzengwa būpya, gūtūūlīlwa na mabbalabbala na ngoka moi; gwike līkūbiza ikanza lya būluhi.

Habakuki 3:2

SEEBA, naalwigwa ū lūkumo lwako; Ee Seeba, ī milīmo yako yanogohije. Ī hīmbūūchage nū mu shikū jise īji, wīyooleche īmanīke ū mu myaka yise; nūūlū ūpelana izūkagwa kūchīla shigongo.

Zakalia 12:8

Ū mu lūshikū lwenūlo ū Seeba akūbalang'hana a bikaji ba mu Yelusalemu, nīyo bakūbiza na nguzu no; ū ngokolo wa bagokolo ū mubo akūbiza gīt'ūmo walī Daūdi, ī numba ya ng'wa Daūdi īkūbiza gītī Mulungu, gītī Malaika o ng'wa Seeba alī kū būtongi wabo.

Zakalia 4:10

“Nani ūyo adalahile lūshikū lwa mihayo mido mido? A banhū bakūyega no ū kwībona ī kabiilū īlī mu nkono go ng'wa Zelubabeli. “(Īji mpungatī jenīji galī miso ga ng'wa SEEBA, ayo gakīyeleelaga pyī ī sī.)”

1 Bakolinto 1:27

Alīyo ū Mulungu abasolile a bachilū chilū ba mu sī, gīkī abadimye minala a ba masala, nī shikolo ī shigokolo ū mu sī nasho shilī shisolwa shakwe, gīkī ashidimye minala ī sha nguzu.