Nehemia 2:8 - Bibilia Ilagano Lya Kale 2015

⁸ Napandīke na nyalūba ya kūntwalīla ū Asafu, ū nang'hani w'ipoolu lya ntemi, anizunīlīje kūpandīka mitī kūlwa migamba, ya kūtūūla ha mibita ī ya ha ndugu īyo īpīndīlīgije hekalu, na kūlwa ndugu ya nzengo, na kūbeeja numba īyo nalikale ū nene.” Ū ntemi ūnizunīlīja īyo nakīlomba, nguno ū nkono gwawiza ū go ng'wa Mulungu wane gwalī hamò nane.

Nehemia 2:8 Iomraidhean Croise

wandījo 32:28

Ū munhū ng'wenūyo ūng'wīla, “Ī lina lyako ūtitanwa hangī Yakobo, ūlī Isilaeli; nguno wilwishije na banhū nū Mulungu, ūbiza ntindi.”

Ezila 5:5

Alīyo ū Mulungu walī abalolile mu welwa ng'holò no a banamhala ba Bayudaya, batabalekije hangī kūshisha ū mhayo gūūshika kūlī Dalio, n'ishosho lyūfunyiwa mu nzīla ya nyalūba, akwīhayaga ī mihayo yenīyo.

Ezila 6:22

Nī shigukulu sha migatī ītī na shibimbya bakashiyegela ikanza lya shikū mpungatī; nguno ū SEEBA walī wabokaja būyegi, kūlwa kūgagalūcha a maganiko ga ntemi wa Ashulu, ūbagunanha ū mu nīmo gwa numba ya ng'wa Mulungu wa Isilaeli.

Ezila 6:8

Hanuma a higūlya ya yenīyo nalīlagīja na yīngī īyo īng'wigeleelilwe kūbīītīla a banamhala ba Bayudaya benaba, ū mu nīmo gwa kwīzenga ī numba ya ng'wa Mulungu yenīyī: Ī hela ja kūgwīta ū nīmo gwenūyo jifume ū mu fuko gwa ntemi ūyo gūlī ū kū sī ja kū nkīlo gwa mongo; jitūmame ījo jikafumaga mu goodi, binhwe wangū a banhū benabo pyī ī jose, gūtizīīma ū nīmo nūūlū hado.

Ezila 7:6

Hūna lūūlū ū Ezila ng'wenūyū akīnga koi ī Babuloni. Nīyo ū wei walī nangi, munhū ūyo walī ashimanile ī shilagīlo sha ng'wa Musa īsho SEEBA, Mulungu wa Isilaeli walī washifunya. Ū ntemi akang'winha būlī shikolo īsho akalomba, nguno ū nkono go ng'wa SEEBA Mulungu wakwe gwalī hamò nang'hwe.

Ezila 7:9

Ū lūgendo lwakwe ū lwa kūfuma ī Babuloni akalwandya mu lūshikū lwa kwandya ng'weji gwa kwandya. Ī Yelusalemu ūshika mu lūshikū lwa kwandya lwa ng'weji gwa katanò, nguno ū nkono gwawiza go ng'wa Mulungu wakwe gwalī hamò nang'hwe.

Nehemia 7:2

Ū Hanaani ū ng'wanong'wise nūntūūla kūbiza ntaale wa nzengo gwa Yelusalemu, hamò na Hanania ūyo walī ntaale w'ibità lya bashilikale ba mu nzengo, nguno walī ntūngīlīja hangī munhū walogohano kūlī Mulungu kūtinda ūmo baalī a banhū a bingī.

Sumo 21:1

Ī ng'holò ya ntemi īlī mu nkono go ng'wa SEEBA gītī myongo ya minzī, akīīlogejaga hose hose ūko ūtogelwa wei ng'wenekīlī.

Nomeji 2:5

Nibeegeja migūnda misoga mitaale na mido, nūhamba mo mitī ya matwajo ya būlī mbika.

Nomeji 2:6

Nūsīmba na nzwinzī jane nene ng'wenekīlī, ja kūyūdaha a minzī nalitīīla ī lipoolu lya mitī ūlū īlīkūla.

Isaya 66:14

Ūlū ng'wībona ī yenīyī ī ng'holò jing'we jikūyega, nī mibīlī ying'we īkūfuluma gītī maswa; hūna ū nkono go ng'wa SEEBA gūkūmanīīka gīkī gūlī hamò nabo a batūmami bakwe; alīyo ū būkalī bokwe būkūmanīīka gīkī būlī higūlya ya banishi bakwe.

Danyeli 1:9

Ū Mulungu ūng'wīta ū ntaale wa ng'wikūlū abize na moyo gwa kūnzunīlīja ū Danyeli na kūng'wītīla yawiza.

Shītwa 26:22

Alīyo īkī ū Mulungu alī ngunanhi wane, h'ī nguno yene nī lelo īyī nīmīīlaga aha nalīsomboola hape kū būtongi wa bose, bataale na bado. Natūhayaga mihayo yīngī, ūlū ītī īyo īhayiwe na bahangi hamò na Musa, gīkī yigelile ībize ho;

Shītwa 7:10

Ūmpīja ū mu makoye gakwe pye a gose, hama ūng'winha masala na kwanukūlwa ū kū būtongi bo ng'wa Falao, ūyo walī ntemi wa Misili. Ū ntemi ng'wenūyo ūng'wīta kūbiza ntaale wa sī yose ya Misili, hamò nī kaya yakwe ī yose.

2 Bakolinto 8:16

Hūna lūūlū, ū Mulungu alūmve, ūyo akang'winha ū Tito moyo gwa kwifunya kūlwa nguno ying'we.