Nehemia 13:16 - Bibilia Ilagano Lya Kale 2015

¹⁶ Baalīho banhū ba Tulo bikalaga ū mu nzengo, benhaga ndīlo na shikolo shabo shingī sha būlī mbika, kwiza kūbajingīja a bana Būyudaya ba mu Yelusalemu, a ha lūshikū lwa sabato.

Nehemia 13:16 Iomraidhean Croise

Nehemia 13:15

Ū mu shikū jenījo nūbona gīkī ū mu sī ya Būyudaya a banhū bakūpandagīlaga mizabibu mu makamīlo kūlwa kūbeeja divai, ha lūshikū lwa sabato. Na bangī bizaga na nzobe jabo jibūkije shilīwa, divai, mizabibu, mitini, na miligo yīngī ya shikolo sha būlī mbika. Ī shose shenīshi bashenhaga Yelusalemu a ha lūshikū lwa sabato. Nūbahūgūla ū mu mhayo gwa kūjinja shilīwa ū mu lūshikū lwenūlo.

Nehemia 13:17

Nūbadūka a bataale ba Yuda; nūbawīla, “Mhayo kī nago ū gwa malofu gwenūyū ng'wandije kūgwīta, nose mukūlūsosohajaga ū lūshikū lwa sabato?

Kūfuma 20:10

Alīyo ū lūshikū lwa mpungatī lwene sabato ya ng'wa SEEBA, Mulungu wako. Ū mu lūshikū lwenūlo yaya kūtūmama nīmo gose gose: Ū bebe ng'wenekīlī, nūūlū ng'witūnja wako, nūūlū nshīke wako, pyī nū ntūmami wako ngosha nūūlū mkīma, nūūlū mitugo jako, nūūlū ngeni wako wakūgenihaga.

Kūfuma 23:12

Ī milīmo yako tūmamaga mu shikū itandatū, alīyo ū mu lwa mpungatī yaya ū kūtūmama, ī nzīkū yako nī nzobe yako jipandīke kwifuula; nū nsese wako pyī nū nobeji, nabo bapandīke kwifuula.

Kūshokeela 5:14

Alīyo ū lūshikū lwa mpungatī lwene Sabato ya ng'wa SEEBA Mulungu wako. Ū mu lūshikū lwenūlo yaya kūtūmama nīmo gose gose, ū bebe ng'wenekīlī, nūūlū ng'witūnja wako, nūūlū nshīke wako, nūūlū ntūmami wako ngosha nūūlū nkīma, nūūlū ng'ombe yako, nūūlū nzobe yako, pyī nūūlū mitugo jako jingī; nūūlū ngeni ūyo alī ha ng'wako. Ū ntūmami wako ngosha nūūlū nkīma, nang'hwe shiigelelile apandīke kwifuula gītī bebe.