Nehemia 1:9 - Bibilia Ilagano Lya Kale 2015

⁹ alīyo ūlū ng'ūnishokela, hūna ng'ūbiza bigwi ū kū malange gane, ū mu gīko a banhū bing'we abo basaamījiwa kū mahanga, nūūlū bakabiza balī kūle na kinehe, nakūbakuminga nabīnje koi, nabenhe ū kwipandī īlo naalīsola kūbiza wikalo wa lina lyane.’

Nehemia 1:9 Iomraidhean Croise

1 Batemi 8:48

Ūlū būkūgalūkīla na ng'holò jabo jose na būpanga wabo bose aho balī ū mu sī ya banishi babo abo babadima nding'wa, hūna būkūlomba balolelile ū kū sī īyo wabinha bakūlūgenji babo, nū kū nzengo ūyo bebe ng'wenekele wagūsola, nī hekalu īyo nīzengile kūlwa lina lyako,

1 Batemi 9:3

Ū SEEBA ūng'wīla gīkī, “Ū kūlomba kwako naakwigwaga, nū kūlīla kwako ūko wanenhelaga nakūbonaga. Na ng'hana ī hekalu īyo wazengile yenīyī nayeejaga, Ī lina lyane nalītūūlaga moi lībize ng'wenūmo welelo bose. A miso gane nī ng'holò yane shikūlolela hoi.

1 Mihayo ya Shikū 16:35

Nīlīlagi gīkī, “Tūpījage SEEBA mpīja wise, tūkumingage ūtūpīje ū kūfuma ū mu mahanga, tūpandīke kūlīkumīlīja ī lina lyako lyeela; tūpandīke kūlīyegela ī likūjo lyako.”

Ezila 6:12

Ū Mulungu ūyo wasola gīkī ī lina lyakwe likale a h'ipandī lyenīlo, ni alīkenaagūlage ihanga lyose lyose, nūūlū banhū bose bose abo balihambe kūshigalūcha ī shilagīlo shenīshi, nūūlū kwīkenaagūla ī hekalu yenīyī, īyo īlī mu Yelusalemu. Nene Dalio nashitūūla ī shilagīlo shenīshi, shiigelile shishikīlījiwe mu būgaliili būtaale.

Zabuli 106:47

Ee SEEBA Mulungu wise, tūpījage; na tūbilingage kūfuma ū kū mahanga, tūdūle kūlīlūmba ī lina lyako lyeela, na kūyegela ng'wikūjo lyako.

Zabuli 107:3

ūbabilinga kwīnga kū sī ningī, kūfuma kīya na ng'weli, kūfuma sukuma na dakama.

Zabuli 147:2

Ū SEEBA hū ng'wene ū nzengi wayo Ī Yelusalemu, h'ūyo akabakobyaga a Baisilaeli ūko basambaalīlile.

Isaya 11:12

A mahanga akūganungīja lūbembeela, ababilinge a Baisilaeli abo basalang'hanīlile mu būsaamiwa; a banhū ba sī ya Yuda abo basambaalile akūbabilinga kūfuma mhandī inè ja sī.

Isaya 27:12

Nīyo ū mu lūshikū lwenūlo, ū SEEBA akūgatinginya pye a mabbaala kwandīja kū mongo gwa Fulati kūshisha kū mongo gwa Misili; hūna a bing'we Baisilaeli mūkūkobiwa ūmò ūmò mubilingwe pye a bose.

Isaya 56:8

Ū Seeba MULUNGU, ū milingi wa wa Baisilaeli abo balī mu būsaamiwa alīhaya gīkī, “Balīho na bangī nakūbabilinga nabenhe ū kū bo, kūleka abo baamala kwibilinga.”

Yelemia 12:15

Gwike ūlū nūmala ū kūbadubbūla, a hanuma yaho nakūbachīla shigongo; būlī ng'wene nanshoshe hangī mu wingīji bokwe, mu sī ya ng'wawe.

Yelemia 3:14

“Bīng'we bagomi, nishokelagi; nguno ū nene hū nalī ngoshi wing'we,” alīhaya SEEBA. “Nakūmusola nang'wenhe Sayūni; ūmò kūfuma mu nzengo, na babīlī kūfuma mu lūganda.

Yelemia 31:10

Ee mahanga, gwigwagi ū mhayo go ng'wa SEEBA, tūlagi kaluulu mujikumūkīje pyī sī; hayagi gīkī, ‘Ūyo wabasambaaja a Baisilaeli hū ng'wene akūbabilinga; nīyo akūbalang'hana gītī ndīīmi n'idaale lyakwe lya ng'holo.’

Yelemia 32:37

Nakūbabilinga pye a bose kūfuma hose hose ū kū sī ījo naalī naabaponya kūlwa būpelanu na būdaki wane būtaale; nakūbashosha hangī ū ng'wipandī īlī, bikale mu mhola.

Yelemia 6:22

Ū SEEBA alīhaya, “Managi gīkī ibità līlī mu nzīla līliza kūfuma sī ya sukuma, ihanga itaale līkwigolanyaga kwīngīīla kū mapandī ga kū būkalīkījo wa sī.

Ezekia 14:6

Hūna lūūlū īwīlage ī numba ya Isilaeli, “Ū Seeba MULUNGU alīhaya gīkī, ‘Galūkagi! Lekanagi nasho ī shiikolile shing'we sha kūlamiwa, galemagi pye a mashītīle ging'we a ga malofu!

Ezekia 36:24

Nguno nakūng'wīnja ū mu mahanga pye a gose namubilinge kūfuma hose hose ū mu masī, namushoshe mu sī ying'we benekīlī.

Bagabīji 26:3

“Ūlū ng'ūshimīzīla ū mu malange gane, nī shilagīlo shane ng'ūshilondeela na welwa ng'holò,

Zakalia 8:7

Ū SEEBA wa Būdūla bose alīhaya gīkī, “A banhū bane nakūbīnja ū kū sī ja kīya na ng'weli, bapīle.

Matayo 24:31

Hūna akūtūma bamalaika bakwe n'ilaka itaale lya mhembe. Bakūja balībakuminga pye a basolwa bakwe kūfuma mhandī ine ja sī; kūfuma wandījo w'igūlū kūshisha kū ngelelo yalyo!”

Kūshokeela 12:21

Ī lipandī īlo SEEBA Mulungu wako akūlīsola kūlwa kūtūūla mo lina lyakwe ūlū lyūbiza līlīkūle ū kūfuma a ha ng'wako, ūdūgije kūsīnza ntugo gwa ng'widaale lyako lya ng'ombe nūūlū lya ng'holo na mbūli, ūmo SEEBA alakwinhīle; hūna wīta ūmo nalīkūlagīīlīla, ī nyama wīlīīla mu nzengo gwako gīt'ūmo ūlatogelwe bebe ng'wenekīlī.

Kūshokeela 12:5

Alīyo mukūlīkooba ī lipandī īlo SEEBA Mulungu wing'we alalīsole kūfuma ū mu ng'anda jing'we ī jose, kūbiza wikalo wakwe na kūtūūla ho lina lakwe. Ū kwipandī lyenīlo h'ūko mukūyūja;

Kūshokeela 30:1

Ī mihayo yose yenīyī, ī na mazumo īyo nīyoolecha hape kū būtongi wako, ūlū yūkwizīīla nang'ho wīyideedeng'hanya chiza ū mu ng'holò yako, hose hose ū kū mahanga ayo alakūponye ū SEEBA,