Nehemia 1:5 - Bibilia Ilagano Lya Kale 2015

⁵ Nūhaya gīkī, “Ee SEEBA, Mulungu wa ng'wigūlū, ūyo ūlī Mulungu ntaale na wa kogohwa. Bebe ūyo ūtalyībaga ī lilagane lyako lya būtogwa īlo walagana na banhū abo bakūtogilwe na bagadimile a malange gako,

Nehemia 1:5 Iomraidhean Croise

1 Batemi 8:23

ūhaya, “Ee SEEBA Mulungu wa Baisilaeli, atīho Mulungu ūngī wa kūbiza gītī bebe; ībize kwigūlya ng'wigūlū, nūūlū hasī ū mu sī. Atīho wa kūbiza gītī bebe ūyo ūkadimīīlaga mu butogwa būlagane ūbo walagana na batūmami bako, abo shikū jose bakashimīzīlaga mu nzīla jako na ng'holò īmò.

1 Mihayo ya Shikū 17:21

Līlīho ihanga kī līngī ū mu sī īlo līdūgije kūlenganījiwa na Baisilaeli banhū bako, abo Mulungu akaja kūbakomoola gīkī babize bakwe, wibeegeje lina kūlwa nguno yako bebe ng'wenekīlī; hūna ūbeeja mihayo mitaale ya kooghya na kūkamaaja: ūpeeja mahanga ga banhū gīkī babīngīle banhū bako abo ūkabakomoola kūfuma Misili?

Ezila 1:2

“Ū ntemi Koleshi wa Būajemi alīyomba gīkī, ‘Ū SEEBA, ū Mulungu wa ng'wigūlū waninhile py'a mabūsugi ga mu sī, na wanisolile kwīta nīmo gwa kūnzengela hekalu ī Yelusalemu, ū mu sī ya Būyudaya.

Nehemia 2:4

Ū ntemi ūnibūūja, “Ī gīsī lūūlū ūlū kwīta mhayo kī?” Nane nūnomba ū Mulungu wa ng'wigūlū,

Nehemia 4:14

Aho nīlola chiza ī mihayo, nīmīīla nūbawīla a bataale na a batongeeji na a banhū a bangī; nūhaya, “Mutabogohage ng'wizūkagwi ū SEEBA ūyo alī ntaale na wa kogohwa, mubalwīlīīle a badūgū bing'we, na a bitūnja bing'we, na a bashīke bing'we, na a bake bing'we nī kaya jing'we.”

Nehemia 4:8

Būlomana bizunīlīja a bose, gīkī bize kūgūdumīla ū nzengo gwa Yelusalemu, na kwenha nsambo moi.

Nehemia 9:32

“Alilūūlū ī haha SEEBA Mulungu wise, bebe ūyo ūlī Mulungu ntaale, na wa būdūla, hangī wa kogohwa; bebe ūyo ūkadimīīlaga ilagane lyako mu būtogwa būtī wa kūshila, ūtizūgabona a makoye gise gīkī galī mado; a makoye genayo gaatūgwīla a bise banhū bako kwandīja mu shikū ja batemi ba Baashulu kūshisha lelo īyī. Tūlī mu makoye mataale no a bise benekīlī na a batemi bise, na a batongeeji bise na a bagabīji bise, pye na a bahangi bise na basīswe.

Zabuli 47:2

Ū SEEBA, ūyo Alī Higūlya no, alī na lyogohya itaale; hū ng'wene ū Ntemi ntaale wa sī jose!

Zabuli 76:8

Ūkahamuka kūfuma ng'wigūlū, ūfunya nsango, ī sī yibakīla yūhuumūlīja zugwi;

Zabuli 89:2

Nakūhaya hape ūmo īlī; gīkī ū būtogwa wako būtī wa kūtinginyiwa, ū būsanyiwa wako wīmīīlile kūlwa nguzu ja ng'wigūlū.

Zabuli 89:3

Ū bebe ūhayile gīkī, “Naabegije būlagane na nsolwa wane; naang'wilahīlīlile ū Daūdi ntūmami wane,

Zabuli 89:8

Ee SEEBA wa mabità, nani ūyo abizile gītī bebe? Būdūla na būsanyiwa wako, Ee SEEBA, shikūpīndije hose hose!

Kūfuma 20:6

Alīyo nakoolekejaga būtogwa būtaale no kū banhū mashihūmbī na mashihūmbī, abo banitogilwe na bashidimile ī shilagīlo shane.

Kūshokeela 7:12

Ūlū ng'ūshidīlīla ī shilagīlo shenīshi, hama ng'wilang'hana ng'ūdūla kūshimīzīla musho, ū SEEBA Mulungu wako akūlīlang'hana ī lilagane lyakwe ū kūlī bebe mu būtogwa, gīt'ūmo wabilahīlīla bakūlūgenji bako.

Kūshokeela 7:21

Yaya gete ū kūbogoha a benabo, nguno ū SEEBA Mulungu wako, ūyo alī hamò nang'ho, alī Mulungu ntaale na wa lyogohya.

Kūshokeela 7:9

Na lūūlū itegelejagi gīkī, ū SEEBA Mulungu wing'we, hū ng'wene ū Mulungu; ū wei alī Mulungu nsanyiwa, akadimīīlaga ilagane lyakwe kū bose mu būtogwa būshikanu, kūshisha shihūmbī sha shibyalīlwe sha banhū abo bantogilwe na bashidimile ī shilagīlo shakwe.