Balamuji 2:10 - Bibilia Ilagano Lya Kale 2015

¹⁰ A banhū ba shibyalīlwe shenīsho aho baakumingwa pye a bose kū bataale babo, shikilonga shibyalīlwe shingī, īsho shaalī shitandeebile ū SEEBA, nūūlū īyo walī wabīītīla a Baisilaeli.

Balamuji 2:10 Iomraidhean Croise

1 Sang'weli 2:12

Alīyo a bitūnja ba ng'wa Eli baalī banhū baabūbi no, nguno baalī batandīlīīlaga ū SEEBA.

Kūfuma 5:2

Ū Falao ūhaya, “Ū SEEBA ni nani nose ū nene nazunye mihayo yakwe nabalekele a Baisaeli baje? Ū nene natandeebile ū SEEBA, na lūūlū natūdūla ū kūbalekela a Baisilaeli baje.”

Tito 1:16

A banhū gītī benaba batogilwe ū kwihaya gīkī bandeebile ū Mulungu, alīyo ū mu shītīle shabo banemile. Banhū ba malofu na bashitiigwa, nīyo batigeleelilwe mu nīmo gose gose ū gwawiza!

Shītwa 13:36

Nguno īlī hape gīkī ū Daūdi aho wamala ū nīmo ū mu shibyalīlwe shakwe, akacha gīt'ūmo kalī kahelele ka ng'wa Mulungu, ūjīkwa, ūlaala hamò na bakūlūgenji bakwe, ūbola.

Yelemia 31:34

“Ītīho hangī nguno ya munhū kūnanga nzenganwa ng'wiye, nūūlū kūnanga ndūgūye akūng'wīlaga, ‘Manage SEEBA,’ pye a bose bakūnimana, kwandīja a bado bado ū mubo, kūkalīkīja kū bataale. Alīhaya SEEBA. Nguno nakūbalekeja ū būbi wabo, nī shibi shabo natūshiizūkwa hangī na hado yaya.”

Isaya 5:12

Ū mu shigukulu shabo bakayegaga balītūla ndono, malimba, shitumba, hamò na mbiilūlū; kūnū bakūng'waga walwa. Alīyo yaya ū kwīlonja īyo akīyītaga ū SEEBA, nūūlū ī milīmo ya makono gakwe ndūhū ū kwīyideedeng'hanya.

1 Mihayo ya Shikū 28:9

Ū bebe nang'ho ng'wana wane Solomoni, ng'witegelejage gete ū Mulungu wa ng'wa so, ūntūmamīle we na ng'holò yako yose; na a maganiko gako gazunye ū kūntūmamīla. Nguno ū SEEBA hū ng'wene ū ngīsīlīja wa ng'holò jose, na a maganiko a gose agamanile nī mbūūkī yago. Ūlū ūnkooba akwilonga ū kūlī bebe, alīyo ūlū ūng'wība akūkūponya ilalī.

2 Sang'weli 7:12

Ī shikū jako ūlū jūshila, lyūshika ikanza lya kwifuula na bakūlūgenji bako, nakūngūngūhya ūmò wa mu būbyīle wako, wa kūfuma mu nkīmbīlī gwako gete, abize ng'wingīji wako; ū būtemi wakwe nakūwinha nguzu.

2 Batesalonike 1:8

Akwiza mu ndali ja moto abinhe nsango abo bataamanile Mulungu, na a babo batatogilwe kūjanukūla ī Ng'hūlū Jawiza ja ng'wa Seeba wise Yesu.

Yelemia 22:16

A bahabī na a bagayiwa wabagunījaga, h'ī chene ī mihayo yakwe yajaga chiza. Ī gīko h'ītī kūnimana nene?” Alīhaya SEEBA.

Yelemia 9:3

“Ī ndīmi jabo bajileegile, jilī gītī būta būmalīīlile kūlasa; ū mu sī būtīho ū būtindi kūlwa kūshimīzīla mu ng'hana. Bakongejaga kūja kū būtongi mu shibi higūlya ya shibi; bataniitegelegije ū nene,” alīhaya SEEBA.

Ayubu 21:14

Ū Mulungu baakūyūng'wila, ‘Bebe tūlekage a bise! Tūtī na nguno ya kwikoya kūjimana nzīla jako!

Kūshokeela 31:16

Ū SEEBA ūng'wīla ū Musa, “Lyashikaga ī likanza lyako ū bebe ī lya kūja kwifuula na bataale bako, alīyo a banhū benaba bakwandya kwisosohaja na bamulungu bageni, ū mu sī īyo balīja kwikala. Ū nene bakūnīība, balīkenaagūle nī lilagane īlo naabeeja nabo.”

Kūbala 27:13

Ūlū ūmala ū kwībona nū bebe ūkūtwalwa kū banhū bako, gīt'ūmo nkūlūyo Alooni akīītīlwa.

wandījo 49:33

Ū Yakobo aho wamala ū kūbinha ī shilagīlo a bitūnja bakwe, ūduta magūlū gakwe higūlya ya būlīīlī, hūna wesheema lwa kūmalīīja; ūtwalwa kū bang'wawe.

wandījo 25:8

Hūna ū Abulahamu ūzumalīka mu būnamhala bowiza; ūjīkwa, wisangīja na bang'wawe alī namhala wa myaka mingī.

wandījo 15:15

Gwike ū bebe ng'wene ūkūcha ūjīkwe, ūje kū bakūlūgenji bako mu mhola; mu būnamhala bowiza, bo shikū ningī.

wandījo 25:17

Ī myaka ya būlamu bo ng'wa Ishimaeli ī yose yalī igana na makūmi a adatū na mpungatī (137). Ūzumalīka, ūjīkwa, wisangīja na bang'wawe.

Kūfuma 1:6

Hanuma ya myaka kūbīta, ū Yosefu na a baana bang'wawe būzumalīka; kūshisha pye a banhū ba shibyalīlwe shenīsho būshila kūcha.

Kūfuma 1:8

Kwimanīla watema ntemi mpya ū mu sī ya Misili, ūyo walī atang'witegelegije ū Yosefu.

Yoshwa 24:31

A Baisilaeli bakantūmamīla ū SEEBA ū mu shikū ja būlamu bo ng'wa Yoshwa ī jose, hamò nī ja bataale abo akabaleka ho ū Yoshwa, abo baalī bīībona pyī īyo SEEBA walī wabīītīla a Baisilaeli.

Yelemia 9:2

Ūlū ni nalī na ng'hambī kū matogolo ya kwifuulīla bashimīzi, ni naaja kwenūko nūbīngīla a banhū bane nūbasegenela; nguno pye a bose bashihani, ibità lya bahūnga.

Yelemia 9:5

Būlīho wilemba lembi ha gatī ya nwani na nwani, atīho ū ntūngīlīja mu kayombele. Ī ndīmi jabo baajilanga kūlomaloma, bīīti ba shibi kūshisha kūseedeeka.

Luka 20:32

Nose ū kū ng'halīlo yaho nū nkīma ūcha.