1 JUAN 4:7 - Tepehuano Tepehuán del Sureste (Durango)

⁷ Jam guguuxiꞌñ iñ ɨp jiñ jaaduñ na pim siamri xim jajoiꞌgɨꞌndaꞌ bɨɨx jɨꞌmaꞌn na baꞌ bhaan jix maatɨꞌ kaꞌ na Dios jam aꞌm tɨ nɨidhim, na guꞌ guiꞌ joidham jix chu joiꞌgɨꞌn. Baꞌ gu jaroiꞌ noꞌ puꞌñi joidham jix ja joiꞌgɨꞌn gu jaiꞌ, dhiꞌ bhaan jix maatɨꞌ kaꞌ na bax maat na jax jir tuꞌm kam gu Dios, baꞌ puiꞌ bam kaiꞌchdhaꞌ na Dios bar Maraaꞌn.

1 JUAN 4:7 Iomraidhean Croise

JUAN 13:34

Dai nañ jaꞌpni jaꞌk xi chu daasai aapiꞌm jam bui na tu aagix kaꞌ xib dɨr, na pim joidham xim ja joiꞌndat jix bhaiꞌ kaiꞌchɨt tu oiꞌñkaꞌ bɨɨx jɨꞌmaꞌn, jaꞌp na jax aañ nañ xi jam joiꞌndat xi jam daꞌ bɨɨx jɨꞌmaꞌn aapiꞌm,

JUAN 17:3

ku guꞌ noꞌ mɨt bam maat jiñ Gɨꞌkoraꞌ nap dai aap jir gɇꞌkam na jɨꞌx oiꞌñgaꞌn, gio aañ noꞌ mɨt bañ maat nañ jir tuꞌp tuꞌm daꞌ na pich bhañ joot nañ mu ja baidhikaꞌ.

1 KORIINTO KAM 8:3

Gu jaroiꞌ baꞌ na daandaꞌ gu Dios, jix bhaiꞌx mat kaꞌ ɨp gu Dios na dhiꞌ buiñor tu daan, jix joiꞌmdat baꞌ bhaan tɨ nɨidhidhaꞌ.

2 KORIINTO KAM 4:6

Nat guꞌ gu Dios guiꞌ nat tu chia bɨjɨk na miꞌ dhɨr jaiꞌchdhɨlhiaꞌ gux chu maax na paiꞌx chu tukgam, mɨmɨich guch jujur nach baꞌ puꞌñi ja bɨꞌñxidhaꞌ gu jaꞌtkam, nañ jaꞌpni kaiꞌñkam jup kaiꞌch nach ja aagiꞌñdhaꞌ gu jaꞌtkam na jɨꞌx jir gɇꞌkam gu Dios, gio na dhiꞌ pɨx bhaan jum maaxiꞌñ guch Xoiꞌkam na jax jir tuꞌm kam gu Dios.

GALAASIA KAM 4:9

Guꞌ baꞌ xib na pim tɨi bax maat guiꞌ na jax chuꞌm sɨlhkam jir diꞌ gu Dios, sia ku guꞌ jaꞌkbuiꞌ kat jix bhaiꞌ xi jam maat na pim jax jir tuꞌm, ¿jax ku pimɨt baꞌ gio miꞌp ja jɨɨꞌñ gux buam jum duuꞌnkam nam jam daam jimiaꞌ, nam bɨxchuꞌx bhaaiꞌ nam pu tu duñiaꞌ yaꞌ dhi oiꞌñgaꞌn? Pu cham tuꞌ bhaaiꞌ am guꞌ tɨi buiñor gu Dios.

GALAASIA KAM 5:22

Baꞌ noꞌ jaroiꞌ bhaan tajaañixchuꞌ gux Dhuuduꞌ kam jix Uañ Iiꞌmdaꞌ, jix chu joiꞌgɨꞌndaꞌ pɨx sia tuꞌ na pɨx bhaan ja bui gu jaꞌtkam, na gammɨjɨx bhaiꞌm taatɨt ja palhbuiꞌñdhaꞌ sia nar paiꞌ dhuuk kaꞌ gɨt. Gio na cham bhaamdar kaꞌ, nax chu nakooꞌndaꞌ pɨx sia tuꞌ na pɨx kɨꞌn. Gam na dɨɨlh jum palhbuiꞌñkaꞌ na jax jaꞌk cham tuꞌ bhaan maiꞌchiaꞌ gux buam jum duukam. Na gammɨjɨ soiꞌm ɨlhdhat tuꞌ sɨlhkam tɨ jɨɨꞌñdhat buiñor guch Xoiꞌkam miꞌ puiꞌ jimdaꞌ na jax jix kɨɨꞌ kaꞌm nɨiꞌñ. Noꞌ jaroiꞌ gammɨjɨ puꞌñi miꞌ puiꞌ tu duiñchuꞌ, cham jum aaꞌ na jaroiꞌ aagiꞌñdhaꞌ na jax jaꞌk tu aagix, na guꞌ puꞌñi pɨx jaꞌk jum aaꞌ nam tuiꞌñgɨdaꞌ gɨt bɨɨx gu jaꞌtkam.

2 TIMOTEO 1:7

Nat guꞌ gu Dios cham tuꞌch aꞌm tajaa gu jax chuꞌm iiꞌmdaꞌ na bhaan jich ɇɇkaꞌ gu tooꞌnniꞌ, guꞌ guiꞌ ji na tu guguuxiꞌñ, gio na tu maak joiꞌmdaraꞌ, gio nañ mattuꞌnkaꞌ noꞌñ moox bhaiꞌm duukam jup tu bua.

1 PEEGRO 1:22

Na pim guꞌ aapiꞌm jix chu uañ kɨr baꞌp tuꞌiiꞌ baꞌ xib, na pim guꞌ kɇɇkɇt gux bhaiꞌm kaiꞌchdham ñioꞌkiꞌñ gu Dios miꞌ puiꞌ ba bhɨichuꞌ na jax jix aaꞌ tɨ jɨɨꞌñdhat buiñor guch Xoiꞌkam, nat guꞌ ba tu jam uañ gu jam uaꞌtulhdharaꞌ, gio na pimɨt ba maat na pim jax jaꞌk dui jix bhaiꞌ kaiꞌchɨt xim jajoiꞌgɨꞌndat tu oiꞌñkaꞌ bɨɨx jɨꞌmaꞌn gammɨjɨ. Baꞌ dhiꞌ puꞌñi jaꞌk japim duiñchuꞌndaꞌ gammɨjɨ nabap tanoolh, chaꞌpim tuꞌ bhaan jum kokdadaꞌ, guꞌ jaꞌpji na pim joidham jix bhaiꞌ kaiꞌchɨt jix bhaiꞌ xim tɨ tɨtdat xim ja joiꞌgɨꞌndaꞌ ji bɨɨx jɨꞌmaꞌn bɨɨx jam jujur kɨꞌn gio na pim jɨꞌx jup jum taat.

1 JUAN 2:10

Jɨɨꞌ ji noꞌ guꞌ joidham jix joiꞌndat pɨx jix bhaiꞌ tɨtda gu jumai na puiꞌp tɨ jɨɨgiꞌñ buiñor guch Xoiꞌkam, dhiꞌ jɨꞌ ji na baꞌ puiꞌ bam kaiꞌch na joidham jix chu maax kɨr bap tuiꞌdhiꞌ, baꞌ cham jɨꞌxdhaꞌ tuꞌ bhaan jutbui ɨlhiaꞌ. Jaꞌp jañ kaiꞌñkam jup kaiꞌch na cham jɨꞌxdhaꞌ maiꞌchiaꞌ gux buam jum duukam.

1 JUAN 2:29

nach guꞌ tuꞌ sɨlhkam bar maamraꞌn kaꞌ. Na guꞌ na pim jax bax maat jiñ jaaduñ nap kaiꞌch bo gu Dios na gu jaroiꞌ noꞌt tuꞌ kaꞌm tɨɨgɨk miꞌ puiꞌ jii na jax jix aaꞌ, dhiꞌ baꞌ puiꞌ bam kaiꞌchdhaꞌ na sɨlhkam jir maraaꞌn kaꞌ, jaꞌp na jax guch Xoiꞌkam janoꞌ na yaꞌ xi oilhimɨk nat guꞌ tuꞌ kaꞌm tɨɨgɨk gu Dios.

1 JUAN 2:3

Baꞌ noꞌch miꞌ puiꞌ xi jiim na jax jix aaꞌ gu Dios, dhiꞌ bhaan bax maatɨꞌ kaꞌ nach tuꞌ sɨlhkam bɨɨx jich jujur kɨꞌn tɨ jɨɨꞌñdhat tuꞌ kaꞌm ba nɨiꞌñ, baꞌ puiꞌ bam kaiꞌchdhaꞌ nach jix bhaiꞌ bax maat na jax jir tuꞌm kam.

1 JUAN 2:4

Guꞌ ji noꞌch guꞌ pu cham tuꞌ miꞌ puiꞌ jiim na jax jix aaꞌ, sia kuch guꞌ puiꞌ tɨi xi kaiꞌch nach bɨɨx jich jujur kɨꞌn ba tɨ jɨɨgiꞌñ buiñor, pɨx jap kaiꞌchdhaꞌ ich, cham tuꞌr puiꞌ kaꞌ.

1 JUAN 2:7

Baꞌ dhiꞌ nañ jɨꞌk tuꞌ mu tu jam uaꞌñxiꞌñ jiñ jaaduñ, jir diꞌ pɨx gu ñioꞌkiꞌñ gu Dios na pim bɨjɨk dɨr pu ba kɇɇ na pu chuꞌm tum aꞌga, nat pu bɨjɨk dɨr puiꞌ jaꞌk tu dai gu Dios. Cham tuꞌ na pim jax jum aaꞌndaꞌ na dhiꞌ baꞌ bar xibkam nañ aañ muiꞌ ba tu jam uaꞌñxiꞌñ.

1 JUAN 3:9

Na guꞌ gu jaroiꞌ noꞌ sɨlhkam bar maraaꞌn gu Dios, cham tuꞌ kam uaꞌtulhiꞌñdhaꞌ. Jix bhaiꞌ pɨx ba tu jimdaꞌ, na guꞌ bhaan jup tuiꞌñgɨdaꞌ gu Dios.

1 JUAN 4:11

Dho jaiñ na jax pɨk jir jix bhaiꞌkam gu Dios, gɇꞌkam kɨꞌn xich joiꞌgɨlh nach maiꞌ ba suulhgix kat. Aach baꞌ miꞌ puiꞌp xi chu daaꞌñchuꞌndaꞌñ jaaduñ na jax guiꞌ, joidham jach xich jajoiꞌgɨꞌndaꞌ bɨɨx jɨꞌmaꞌn.

1 JUAN 4:12

Na baꞌ noꞌch puꞌñi xich jajoiꞌgɨꞌn bɨɨx jɨꞌmaꞌn, gammɨjɨch aꞌm ba kiokaꞌ guch Gɨꞌkoraꞌ, gam nax ioꞌm ba xich joiꞌgɨꞌndaꞌ. Sia kuch guꞌ cham nɨiꞌñ gu maaxik bhaan na jax chuꞌm, ku guꞌ yaꞌp tuiꞌkaꞌ ji jich bui noꞌch puꞌñi jaꞌk xi dhuiñchuꞌ.

1 JUAN 4:16

Baꞌ aach nach jɨꞌk ba tɨ jɨɨgiꞌñ bɨɨx jich jujur kɨꞌn buiñor guch Xoiꞌkam, jix bhaiꞌ bax maat ich na gu Dios joidham xich joiꞌgɨꞌn, na guꞌr diꞌ pɨx gux chu joiꞌgɨꞌn. Baꞌ gu jaroiꞌ noꞌ puiꞌp jix chu joiꞌgɨꞌn na guiꞌ, dhiꞌ bhaan bax maatɨꞌ kaꞌ na sɨlhkam bax maat gu Dios, baꞌ puiꞌ bam kaiꞌchdhaꞌ na bhaan ba tɨ nɨidhim.

1 JUAN 4:20

Baꞌ noꞌ guꞌ jaroiꞌ maadɨt jax kaiꞌch: “Aañ dho gi tuꞌ kaꞌm nɨidhat miꞌ puiꞌ jim ji na jax jix aaꞌ gu Dios”, guꞌ ji noꞌ guꞌx bhaamkiꞌñ gu jumai na puiꞌp tɨ jɨɨgiꞌñ buiñor guch Xoiꞌkam, pɨx jap kaiꞌchdhaꞌ, cham tuꞌ sɨlhkam tuꞌ kaꞌm nɨiꞌñdhaꞌ gu Dios. Na guꞌ noꞌ puꞌñi cham tuꞌ kaꞌm nɨidhat jix joiꞌgɨꞌn gu jumaich Xoiꞌkam jɨɨgiꞌñdham na yaꞌ nɨiꞌñ maaxik, ¿jax dhui tuꞌ kaꞌm jup tɨgiaꞌ gu Dios na cham maax?

1 JUAN 4:8

Guꞌ noꞌ ampɨx jix ja bhaamkiꞌñ gu jaiꞌ, dho gi guꞌ bhaan jup bax maatɨꞌ kaꞌ ji na pu chakui maat na jax jir tuꞌm kam gu Dios, na guꞌ bak pu cham tɨ jɨɨgiꞌñdhaꞌ buiñor. Na guꞌ noꞌ tɨ jɨɨgiꞌñdhaꞌ gɨt, puiꞌp jix chu joiꞌgɨꞌndaꞌ gɨt jia na jax gu Dios na joidham jix chu joiꞌgɨꞌn.

1 JUAN 5:1

Gu jaroiꞌ noꞌ bɨɨx juraaꞌn kɨꞌn tɨ jɨɨgiꞌñ na gu Jesuus jir diꞌ guch Xoiꞌkam nat Dios bha joot, dhiꞌ jɨꞌ puiꞌ bam kaiꞌchdhaꞌ na Dios jir Maraaꞌn. Baꞌ noꞌ puiꞌ bam tɨɨtɨꞌ na Dios bar Maraaꞌn, jum aaꞌ nax ja joiꞌndat jix bhaiꞌ ja tɨtdadaꞌ gu jaiꞌ nam puiꞌp jir maamraꞌn gu Dios.

2 JUAN 1:5

Baꞌ aañ puiꞌ tɨi jam guguuxiꞌñ jiñ jaaduñ na pim siamri cham jum kokdat, joidham japim xim jajoiꞌgɨꞌndaꞌ pɨx bɨɨx jɨꞌmaꞌn, na guꞌ puiꞌ jaꞌk aagix jia gu ñioꞌkiꞌñ gu Dios na pim jax ba tɇ kɇɇ janoꞌ dɨr na pimɨt paiꞌ dhuuk tɨ jɨɨꞌñ buiñor guch Xoiꞌkam. Cham tuꞌ na dhiꞌr xibkam nañ aañ muiꞌ ba tu jam uaꞌñxiꞌñ, pu dhiꞌ pɨx ji na jax bhaan ba tum aꞌga bɨjɨk dɨr.