Guꞌ aañ matgɨm gux Dhuuduꞌ kam jix Uañ Iiꞌmdagaꞌn ji gu Dios nañ aꞌm jup tuiꞌdhiꞌ, puiꞌ ku baꞌx bhaaiꞌ nañ maiꞌ ja jootos gu cham kɨkɨɨꞌ iꞌiiꞌmdaꞌ ja aꞌm dɨr gu jaꞌtkam, na pim baꞌ ba machiaꞌ na dhiꞌ jaꞌp jir jup duukam nat yaꞌ bam ai na pim paiꞌ dhuuk machiaꞌ na pim jax jaꞌk duñiaꞌ na baꞌ gammɨjɨ jam aꞌm ba tɨ nɨiꞌñdhaꞌ gu Dios.
1 JUAN 3:8 - Tepehuano Tepehuán del Sureste (Durango)8 Guꞌ noꞌ pim guꞌ dai bɨɨx aixim tu bua na tuꞌr uaꞌtulhdharaꞌ, dhiꞌ bhaan jup bax maatɨꞌ kaꞌ na pim dai mu jaꞌk kaichgɨt gu jaꞌook miꞌ puiꞌ tu kuugalhdhim na jɨꞌk jax jam tɨɨdaim. Na guꞌ gu jaꞌook gammɨjɨ dhiꞌ bhaan tu juan, bɨjɨk dɨr pum uaꞌtulhiꞌñ nat dɨr jup duu gu Dios. Pu kaiꞌñkam baꞌ pɨx bha joot gu Dios gu Maraaꞌn jich Xoiꞌkam na baꞌ yaꞌch palhbuidhaꞌ na puꞌñi tuch uañdhaꞌ guch uaꞌtulhdharaꞌ, na baꞌ miꞌ dhɨr cham jɨꞌxdhaꞌ jax kach dhoodaꞌ gu jaꞌook na jax tɨi ka ɨlhdhat. Faic an caibideil |
1 JUAN 3:8
26 Iomraidhean Croise
Na guꞌ aapiꞌm jaꞌook jir jam taat, jaꞌp moo gu tuꞌx matgam, puiꞌ ku pim baꞌ mu jaꞌk kaichgɨt puiꞌp tu buim na jax jam tɨɨdaim. Na guꞌ gu jaꞌook bɨjɨk dɨr pur tu muaꞌkam nat dɨr maaxir, cham paiꞌ dhuuk miꞌ puiꞌ jim na jax jir am, gam na giilhim jix iatbiꞌ tuꞌ na pɨx bhaan. Cham paiꞌ dhuuk sɨlhkam tu aꞌga, dhiꞌr maꞌooꞌn gu iatdaꞌ.
Miꞌ puiꞌ tu daaꞌñchugɨt japim nam jax jix buam tu jimdaꞌ gu jaꞌtkam nam yaꞌ dhi oiꞌñgaꞌn dai bhaan tɨtɨɨꞌñcho, jix jɨɨgiꞌñdhat japim na jax jam jurtuꞌnkaꞌ guiꞌ na iiꞌmdaꞌ bhaan jix jaiꞌch na bɨxchuꞌx bhaaiꞌ na pu tu duñiaꞌ, dhiꞌ na jaiꞌ iꞌiiꞌmdaꞌ puiꞌ ja daam jup tuꞌiiꞌ nam puiꞌ cham jup jir kɨkɨɨꞌ. Dhiꞌ baꞌ mɨk jaꞌk ja bhɨichdhatgɨdaꞌ gu jaꞌtkam na dɨɨlh jax ɨlhiiꞌñ guiꞌ nam jɨꞌk cham miꞌ puiꞌ jiimdaꞌ na jax jix aaꞌ gu Dios.
Baꞌ bhaankam guch Xoiꞌkam, gu Dios ja xiꞌɨrbo bɨɨx guiꞌ na bɨxchuꞌx bhaaiꞌ nam pu tu duñiaꞌ, nam iꞌiiꞌmdaꞌ bhaan jix chu jaiꞌch. Cham tuꞌ kɨꞌn ji bii mɨt nam xi ja nɨiꞌñ gu jaiꞌ nam jup jix chu jaiꞌch, nat guꞌ xi ja uꞌuuk ja saagiꞌñ ja tuttuk bɨɨx pu tɨi nam cham tuꞌ ka bhaaiꞌ, guch Xoiꞌkam pɨx nat muu bhaan gu uꞌuux na gai bɨɨt.
Aach dɨɨlh jix bhaiꞌx maat nar gɇꞌp jum duukam dhiꞌ nach tuꞌ bhaan jix biiñak kat puiꞌ jaꞌk tu jim, na guꞌ jaꞌpni tu tuꞌiiꞌ: Guch Xoiꞌkam ya ai dhi oiꞌñgaꞌn bhaan maaꞌnkam jup jim duuk. Bɨɨx aixim jix bhaiꞌm duukam jup tu buimɨk, na guꞌ gux Dhuuduꞌ kam jix Uañ Iiꞌmdaꞌ na bhaan tajaañixchuꞌ. Gu noonbiꞌñ gu Dios joidham jix kɨɨꞌ maaꞌnkam tɨɨ mɨt, sia naiꞌ pu chuꞌm ba tum aꞌga ja bui guiꞌ nam cham jir Israel kam, jaiꞌ dhɨt ba tɨ jɨɨgiꞌñ am buiñor. Baꞌ yaꞌ dɨr giop jii jix dhaam jaꞌk na paiꞌ dhɨr jir gɇꞌkam xib bɨɨx kap.
Na guꞌ guch Xoiꞌkam jir maaꞌnkam kat janoꞌ na yaꞌ xi oilhimɨk, pu chuꞌm kat ɨp gu tukgaꞌn na jax gu aach jich chutkuꞌ, gio tɨ ɨꞌɨɨr kat ɨp na jax aach. Jaꞌpni na jax baꞌ gu jaroiꞌ noꞌ gook tu maamar, na guꞌr maaꞌn nam jax chuutuꞌm kaꞌ bɨɨx gook, puꞌñi ɨp guch Xoiꞌkam. Cham tuꞌ na pim jax jum aaꞌndaꞌ nar maakam tuꞌm kat, na guꞌ dai puꞌñi jaꞌk jix bhaigɨt na duuji jich aꞌmkam mukiaꞌ na baꞌ miꞌ dhɨr ba maiꞌchiaꞌ gu jaꞌook guiꞌ na jaroiꞌ giilhim xich bhaamkidhat mu jaꞌk xich bhɨichdhak kat na paiꞌ giilhim jir tu tulhiiñaraꞌ.
Na guꞌ noꞌ muiꞌkim ji chu makgɨrxidhaꞌ gɨt guch Xoiꞌkam gu Dios, ¿cham aa guꞌ jɨꞌk na kim ba mukiaꞌ gɨt dhiꞌ janoꞌ dɨr nat paiꞌ dhuuk jup duu gu Dios dhi oiꞌñgaꞌn, kux baꞌ guꞌ tuꞌ maaꞌnnim pɨx? Dai xib na yaꞌ ba miamlhim na paiꞌ dhuuk tum kuugalhdhaꞌ yaꞌ dhi oiꞌñgaꞌn nat baꞌ bhaiꞌ xi jimɨɨk yaꞌ aach jich bui xim makgɨrtak jich aꞌmkam, pu daipuꞌ maaꞌnnim pɨx. Dhiꞌ kɨꞌn pu gammɨjɨ ba tu uañdhix kaꞌ guch uaꞌtulhdharaꞌ.
Jaꞌpni nat jax ja doodaꞌ janoꞌ gu noonbiꞌñ na mɨt jum uaꞌtulh buiñor. Tɨɨꞌ nat moo janoꞌ tu chia nam ja daꞌngɨi ja buuprai mu jaꞌk xi ja iabuꞌ na paiꞌr tu tulhiiñaraꞌ, na giilhim jir jix chukgam kɨr, cham tuꞌ nat paiꞌp tu ja uañ na mɨt jum uaꞌtulh buiñor. Xib dho guꞌ dai nam pɨx am tɨ nɨɨr janoꞌ nam paiꞌ dhuuk bhammɨ aayaꞌx dhaam na paiꞌ ja aagiꞌñdhaꞌ guch Xoiꞌkam na mɨt tuꞌ bhaan jum uaꞌtulh nam baꞌ bam tulhiiñ.
Baꞌ dhiꞌ jɨꞌ na jaroiꞌ tu maak gu iiꞌmdaꞌ, maaxik yaꞌ xi oilhimɨk maaꞌnkam jup jum duuk. Aach jix bhaiꞌ tɨɨgɨk jaiꞌ dhɨt, jix maatɨt jach baꞌ yaꞌ dɨr pu chuꞌm jup ba tu jam aꞌgiꞌñ jiñ jaaduñ na pim baꞌ moo muiꞌ xim guguuxdhaꞌ na pim jix ioꞌm muiꞌ xix biiñak kaꞌ buiñor na baꞌ jam makiaꞌ gu iiꞌmdaꞌ na pim kɨꞌn gammɨjɨ pu ba duduakaꞌ bhammɨ jaꞌk jix dhaam. Na guꞌ dhiꞌ nañ jaroiꞌ bhaan tu jam aꞌgiꞌñ jiñ jaaduñ, cham tuꞌr yaꞌ paiꞌ kam dhi oiꞌñgaꞌn, matgɨm guꞌ dhiꞌ bhammɨ dɨr ji nat bha jii jix dhaam na paiꞌp tuꞌiiꞌ gu Dios, nat paiꞌ jaꞌk giop bhɨi na jax yaꞌ xi oilhimɨk.
Pux bhaiꞌx maatɨꞌ kaꞌ jia nam jax jaꞌk tu jimdaꞌ guiꞌ nam sɨlhkam jir maamraꞌn kaꞌ gu Dios gio guiꞌ nam jup jir maamraꞌn gu jaꞌook. Puiꞌ na jax guiꞌ nam bɨɨx aixim tu buadaꞌ na jax cham jir am, na jax cham kɨɨꞌ kaꞌm nɨiꞌñ gu Dios, gio nam jix ja bhaamkiꞌñdhaꞌ gu jaiꞌch Xoiꞌkam jɨɨgiꞌñdham, dhiꞌ cham tuꞌ Dios jir maamraꞌn kaꞌ am, guiꞌ ji jaꞌook.
Gio jaꞌpni ɨp na jax gu noonbiꞌñ gu Dios janoꞌ na mɨt gɇꞌkam kɨꞌn jum uaꞌtulh buiñor, na mɨt dai dɨɨlh gɇꞌgɇrkam ba jim ɨlh, gio na mɨt puiꞌ ba ji chu duu nam dɨɨlh jax ɨlhiiꞌñ. Jaiñ nat cham tuꞌ tu ja uañ gu Dios, pu moo janoꞌ ji nat tu chia nam ja buuprai bapaiñum tɨtropiñ kɨꞌn mɨjɨ jaꞌp ka xi ja kuupaꞌ miꞌ maaꞌn kap na paiꞌx ioꞌm jix chu tukgam, janoꞌ juugɨt na paiꞌ dhuuk tum kuugalhdhaꞌ yaꞌ dhi oiꞌñgaꞌn na xi ja aaꞌñdhai na mɨt tuꞌ bhaan cham am bua na baꞌ moo mu jaꞌk xi ja iabuꞌ nam paiꞌ gammɨjɨ miꞌ pup jum tulhiiñdhaꞌ.
Sanasan