Luke 8:13 - Sümi Tiqhelimi Bible

¹³ Apitì atusaye yeghi shou ikiqi keqo ye Alhou tsa chilu kelo alokivishi ikhilu keqo ke; ikemu panongu ye akuhu qüsümoe. Ikehu ado kitila ghenguno pülüa no thekuju ighi kelo ikiqive kemiqo ke.

BAIBEL (BSI)

¹³ Atu akeu yeghi shou vepuku keu piti huye khunoqono atsa chilu kelo alokivi shi ghi ikhilu; ikemu panonguye akuhu kuha: ado kitila ghenguye panonguno pulu ano ghukuju ighikeloye ikiqive cheni.

Sumi Naga CL (Re-edited) Bible (BSI)

¹³ Khikhi atuqu shou iku keno tipaqo ye, Atsa chilu kelo alokivishi ikhilu chekeqoe. Ikemu panongu ye akuhu küha kehu ado kitila ghenguno pülü cheni, eno peju keu do ighike lono idewove cheni.

Luke 8:13 Iomraidhean Croise

Mark 6:20

kughengu Herod no John ye amikuchomi eno akimthemi lakhi kepi ithi no pa sümsa eno süsho acheke. Kughou Herod no John ghili chilu keno pa ye ighono avehuizüve; tishimu pa ye John tsa ini nishive.

Luke 8:12

Apitì alà lo ikiqive keqo ye chiluve kemiqo, ikemu tüghami no ighino panongu mlo lono atsa ikhisüwuve tsüke miqo, tiye panongu pelo pülü eno xalu pemo niye ke.

Luke 8:14

Apitì asahu gholo ikiqi ilove keu kiqi ye Alhou tsa chiluve kemiqo, ikemu aküxü lo mloküsa, kinikülü lo amlo tsü eno ashi pulou shikeu vechewo panongu ye thuwu mülave no ghüsüve keu kiqi ke.

John 15:2

Pa no I lolo athi pithímo keu lokaqo kümtsü micheve cheni, eno aloka athi pithí akeqo kümtsü pelo alau kutomo pithílu penike ghenguno pa no kixiphe chenie.

John 15:6

Nongu no I gholo kimepemo aye, nongu ye aloka peve püzü thizümüive keu toi ke; aloka tipaqo ye kiche pesü ami lo vesüve no pitive cheni.

John 5:35

John ye akulu lakhi no iqü püzü aküvü tsü keu ke, eno nongu no pa küvü lo aloinolu nike ghenguno ado hami kishelu ke.

1 Kor. 13:2

Ni ye tungkuptsa pikulupu ghò aghiluvi eno akümzapu tuqhou jeli ngò akighithi kümtsü ithikutolu aghiluvi, eno ni ye naghuto tukiqeve kulupu küpülü aghiluvi, ikemu kikimiye küha aye ni ye kiumu kumoe.

1 Kor. 15:2

I no nongu lau Alhou tsa kütsü keu nongu no ithamo no tsüqüpe aye, atsakiviu no nongu xaluvae. Tishimo aye, nongu ye adou lono pülüvae.

Galatiami 3:1

Nongu Galatiami nikhanighaqo! Khuu no nongu chini-küghüzüvea kea? Nongu nhekithe lono Jisü Khristo yedapithive keu mütsümishei pìyevae.

Galatiami 3:4

Nongu ye adou lo ighono imeva keshea? Nongu ye adou lono imemo ke kumo keshea?

Ephesiami 3:17

tishi keu lono aküpülü vechewo Khristo pelo nongu mlo lo pa kungo-a shilu peniye ke. Eno I no inikhu akeu ye nongu pelo kikimiye lo aboqha shiluve eno akuhu qüsüluve peniye ke,

Kolosiami 1:23

tiye nongu no aküpülü lo aboqha kumto shou mutotoilu eno ithamo püzü lajupu akeu atsakiviu lo ache moayesa ke. Atsakiviu hipau ye nongu no chiluve keu ke eno atsütsǘ qholo lhoxü jeli kümtsü lau asheshuvae, eno atsakiviu hipau lo ni Paul pelo aqeu lakhi shilu pe ke.

Kolosiami 2:7

Pa gholo nongu kuhu qüsülo eno nongu küxü shiqhepuku chelo, eno nongu kütsü pìyeve ketoi aküpülü lo akumto shilo eno shikimthi keu no qochili alo.

1 Thes. 3:5

Hi ghenguno, kughou I no kutuu khamlave keno nongu küpülü chheju peniye I no Timothy nongu lau puwu ke. Ghukujuu no alaghi hami lono nongu ghujuqhive no ningu no ichhe-ime mülàpüa keu adou shive aghí nosa kehu ni ye msàve ke.

IBRIMI 10:39

Ikemu ningu ye khunoqo no athiu idewove no kütsave cheni keno tipaqo laumi kumoe, ikemu ningu ye aküpülü aghí no xaluve kemiqo ke.

James 2:26

Aghungu küha keu phimpi ye akithí kehu toi, akümlà küha keu küpülü ye akithí ke.

2 Peter 2:20

Panongu no ningu Mpeu eno Xakuluu Jisü Khristo ithi akeu vechewo shikuchubeve keu yeghiqha lono pokajoluve aghí no itaghi tipau lo kitimeve no tipau no panongu qhasüve aghí aye, panongu ye hukuthu lo kiutoi akeno ashekha lo ye tinguno vimokitheuve anike.

2 Peter 2:22

Panongu ghenguno aholetsa hipaqo ye kuchou ke: “Atsǜ lakhi ye pa no mughuve keu idechile wo chu cheni,” eno, “Awoqu lakhi ye azü kuchhuve no aniba lo idewo ihiwuve cheni.”

1 John 2:19

Panongu ye ningu lau no ipeve ke, ikemu kuchou lo ye panongu ye ningu laumi kumo ke. Kughengu panongu no nilaumi shi aghí ke aye, panongu ye ningu gholo ngo aghíni cheke; ikemu panongu no wuve keu ye panongu lakhimu ningu laumi kumo kepi pìyevae.

Jude 1:12

Timi hipaqo ye nonguw kikimiye ghulhuqo lo tichetighepuqo ke, panongu ye kitilamu kujomo no nongu gholo chu cheni—panongu ye ambe khemi khipaqo no panongu likhi panongu lojí cheni keno tipaqo ke. Panongu ye tsütsüghu ghuqhi chemo keu khüngküsü ke, tiye amlhü gholo no fupe wuve cheni; panongu ye tixi süboqo ke, tiye axathi pithímo no nhüve cheni—eno akiniù thi ideve ketoi ke.