Rom Teik pasi Pol hani teka kahikahi Jises Krais ti Rom 11:11 - Seimat

¹¹ Teteka Ju laha kum soh ti Jises Krais, ien se saun lialun. Kaie laha selaia tamus hawane ti Haeu ape i kum pon laha aliama? Tap wanen. Ti namili Haeu i pahan *teka kumahe Ju laha sohoa ti Jises Krais lehe waxi i awai laha ti kawatan ti lialui woulaha. Ti aweisal tenen ien teka Ju paxai tioi solian tetan ape tin pahalaha ukean.

Rom Teik pasi Pol hani teka kahikahi Jises Krais ti Rom 11:11 Iomraidhean Croise

Luk Meng solian ti Jises tataiai Luk 20:16

Nga kakane hawane amuto, i telei hatapo teka ngahatiai tesol kin ape i hani teka seilon liai ngahati.” Ti laha hong kewak ien, laha ukek, “Kumahe, tap wanen i sohot ukek ien.”

Aposel 13:42

Ie tiliai kakai Pol. Ti ape lehe Pol ma Banabas nahih sohot he synagog, tesol seilon ien ilowi lalu alia uleama Sabat tehu toma lehe lalu kaxi ulea waliko ti lalu kakaxi.

Aposel 18:6

Ti lato kak pahoi ma kak halialua i, Pol tapahi xaxaweni hepekeun ti tehu puxuaun. Ien i kola ka Haeu kum amuke lato. I ukek, “Kumahe nakek na Haeu axi amuto kawatan ti amuto kum hong soh kakaiak. Tataen ti aope ie nga nahih hani kapi teka seilon kumahe Ju ti kaxi ahutiai meng solian ti Jises hani laha.”

Rom Teik pasi Pol hani teka kahikahi Jises Krais ti Rom 10:19

Nga kameamu, nakon teka Ju tai xewaxeu meng solian ti Jises Krais? Laha xewan tuahe laha kum nam waxi. Masin ti Haeu kakawen lokon ti Moses. I ukek, “Nga aile hasolia hani teka seilon liai ape amuto namiloi watakai nake amuto paxai ukek laha kumahe seilon tetak hanowi amuto. Amuto lengeke nake nga aile hahani teteka amuto ukek tap titioalaha tetak.” (Deut 32:21)

Rom Teik pasi Pol hani teka kahikahi Jises Krais ti Rom 11:1

Teka ti amuto uke ape laha namiloi ka Haeu tale tehiton hani teka seilon tetan. Tap wanen. Paxaiwa, puki nga se tel Ju, kahi nati *Abraham. Nga nakua ahuma ti Benjamin.

Rom Teik pasi Pol hani teka kahikahi Jises Krais ti Rom 11:12

Ti teka Ju tale tehitolaha hani Jises Krais, Haeu aile hasolia hani teka kumahe Ju, ti i hei hani laha aweisal ti awaialaha ti kawatan ti saun lialun. Na masin ien, i lap ahewa solian ti i aile hani seilon ti tehu pon ie, na teka Ju hana hatapo namil xoxoan hani Jises Krais.

Rom Teik pasi Pol hani teka kahikahi Jises Krais ti Rom 11:14

Tenen puasak ie nga paxai ukek i pate tuah wanen nake pahak wanen upiai aweisal lehe teka akikik Ju paxai tioi waliko ti amuto kewen ape i haisi laha ukean. Nga puas tanomi ukek lehe Haeu awai hina ti laha ti kawatan ti lialui woulaha.

Rom Teik pasi Pol hani teka kahikahi Jises Krais ti Rom 11:31

Tin masin aope ie teka Ju papahoxai Haeu tuahe tin i kola tatahan hani laha na laha towiahu, masin ti i aile haniwen amuto.