1 Ion 4:1 - Kanasi

¹ Nuana sosowa, apana uara wimopue wapuase, “No God Aleupa kakaiwa banlanedio me gagalowa waite leitana.” Mo epe wampo, mai tauwadea memesaitane sumanaibuitana, dia. Tane bauta e mo rubumone ewane ateitana, mo ide ulaipa Aleu God mampe wadane gagalontoie lai, ba dia. Ne ema epe wadina, ipawa peroweta lagawaau uara aitamana nomone tawo uduudu bedewe antonatuwaiena.

1 Ion 4:1 Iomraidhean Croise

Gagalo euda Iesu Keriso umanawa Mak girumalena 13:21

Walama sa bedewe apana isiwa e dialempe wampaase, ‘Sosona, Keriso inalepia mape wande,’ ita do wampaase, ‘Keriso sisi wande.’ Mo epe dialempo mai sumanaibuitana, dia.

Gagalo euda Iesu Keriso umanawa Luk girumalena 12:57

Dima baiwa dewa euda e baila segalepia baiwaleidia mai eweipe ateitipona?

Gagalo euda Iesu Keriso umanawa Luk girumalena 21:8

Iesu sipoamone wanase, “Ewanadewaitana mai mida da e lagalepie banlakadisalepi, ipawa apana uara ne ebonawo wimopue wapuase, ‘Ne e inawala, mida e onioniawaitile wainilana winen inalepaa baiwa.’ Ita do wapuase, ‘Tauma walama ompa maidalen.’ Mo epe wampo etamone mai tauwadea memesaitane wauwo aitana, eidamona!

Aposel 17:11

Iuswa Berea bedewe waimoia nuau euda wadaaubala mampe God aiawa etaetawa menaidamodio waimoie, mai Tesalonaika apanawa ruau. Mo walama ruawantoie buka wisiantoie banusaie Paul dima waeuwalena ulaipa, ba dia.

Aposel 20:29

Ne ateina ne anteapo aupanawo elo kadiuida onawaau e bedelawo wimopue sipsip adaboiamopu.

1 Korint 12:10

Ita Aleu kakaiwa mo isiwa muka wanamodia ginasa dewamompaa baiwa. Tane apana isiwa amonau wanamodia God insaisawa atentompe apana mampo benemantompaa baiwa. Ita mo isiwa amonau me wanamodia mo aleu dauwa etaeta atentompaa baiwa. Mo Aleu kakaiwa nolawa nolaleidia ita do aleu kadiwa nolawa ewaewawa atenidantoie waimoi. Tane apana isiwa Aleu kakaiwa amonau wanamodia aia mo muba ita apana uduudu mai atentoipona mampe rauparintompa. Ita aia ipa sa God os atenleidia mo isiwa Aleu kakaiwa sauwa mampe ipawaida atentoia ekelesia diadewasamompo atentompa. Sa ipa mo amonau.

1 Korint 14:29

Ita do apana nata, ba natadea, God insaisawa Aleu kakaiwa diamodia rua benemantompa ita sumanai sosou isiwa wampue gagalou ipawaida wadaewasapue ewapu.

1 Tesalonaika 5:20

Ekelesia bedelawo apana da Aleu kakaiwa dima diepio rua benemalempa mai aiawa etadabuasane ena.

1 Tesalonaika 5:21

Dewa uduudu etalana eueuwa osowe itune ewana. Kadilepia, sa ena, tane dainea euwa wadanaitue dewasanuna.

1 Timoti 4:1

Aleu kakaiwa sabamoido ema benemawaleide: Walama ompa osowe apana isiwa sumanaibu epuiapue ita aleu lagawaau banlakadisamoia aiau asisumopu ita aleu kadiu Seitan nolawa sausaia waeuwa wawentopu.

2 Timoti 3:13

Tane apana kadi dewalala ita laga mampe debamantoia apanawa kadiwa dewasaie kadiidantoi. Mo sosou isiwa lagamoi, tane mo muba do banlakadisalala wawentoi.

2 Pita 2:1

Tane peroweta lagawaau Israel apanawa bedeuwo segantona rua deawaa e bedelawo waeuwa apanawa lagawaau segantopu. Mo weregainta waeuwa lagawaa sumanai kadisapia wadeie odei. Tane do Tatamba ionoidoa mida mo malesamone inamona lagawa wai. Mo epe dewantoia baiwa God mo matangelamopio tauwadea kadiwaida donsapu.

1 Ion 2:18

Obaina, tauma ipa walama ompaida mampentitana. E etale ateiten Keriso onawa iede, tane ne dialedina Keriso onawa uara aitamana seganton. Ema mampe no atentata tauma ipa walama ompaida mampentitana.

1 Ion 2:7

Nuana sosowa, ne mai anaana sanaa e etasiala girumanteipona, dia, tane anaana tontawa girumantedina e manlawo. Anaana ema ipa Gagalo euda e sumanaila bumpeido etale ateitena bedewe winede.

2 Ion 1:7

Ne aia ema wadina, ipawa laga apanawa uara nomone tawo uduudu bedewe antontuwan. Mo waeuwantoie waiase, “Iesu Keriso tawo osowe wisene mai apanaida etemba wadape no ruambalepona, dia.” Apana dainea epe wadia, me ipa lagawaaida ita Keriso onawaida apanawa.

3 Ion 1:11

Nuana sowa, mai dima kadiwa ewone ruawa dewasana, tane dima euda ewone ruawa dewasana. Apana mida dewa euda dewasadia me bumpawa ipa God bedewe winede. Tane mida kadiwa dewasadia me mai God ewape atenlepona, diaida.

Gagalo Sabamolala 2:2

E dewala uduudu dewamoilana do nolaidaitilana ne ateinaida. Tane do atenten sai badowa uduudu bedewe e mai etedabuaitape nolala epona, dia, tane ideita nolaitilana. Ita atenten apana kadiwa dewalala e mai menaleipona manlawontopu, dia. Do atenten apana isiwa e bedelawo muba umanau wane waienase, ‘No ipa aposel, Keriso waaubalala,’ tane e mo mainimole ewamole atenmolana mo ipa lagawaau. E ulaipa donsalana mo mampo, ipawa mo mai aposel, diaida.