Zabbuli 72:10 - Baibuli Ekibono kya Katonda 2014

¹⁰ Bakyabazinga ab'e Tarushishi n'ab'omu bizinga bamutonere ebirabo; ni bakyabazinga ow'e Sheba n'ow'e Seba, boona bamughe ebirabo.

Zabbuli 72:10 Iomraidhean Croise

Amainhama 10:7

Abaana ba Kushi ni bano: Seba, Havila, Sabita, Raama ni Sabiteka. Ate aba Raama ni bano: Sheba ni Dedani.

1 Bakyabazinga 10:1

Agho kyabazinga omukazi ow'e Sheba bwe yawulira obumanhifu bwa Solomoni obwamugheebwa Musengwa Katonda, yaidha n'ebibuuzo ebikalangafu okumuleba.

1 Bakyabazinga 10:10

Agho yaatonera kyabazinga zaabu agheza kilo ng'oti enkumi ina (4,000), n'obuwoowo kamaala inho, n'amabaale ag'omughendo. Era tighaidhangaghooku kabiri bya buwoowo byaga agho bungi ng'oti n'ebyo kyabazinga omukazi ow'e Sheba bye yatonera kyabazinga Solomoni.

1 Bakyabazinga 10:2

Yaidha e Yerusalemu n'ekikunsu eky'abagheereza be nga kinene inho, n'engamiya edheetwise obuwoowo, ni zaabu mungi inho, n'amabaale ag'omughendo. Era bwe yatuuka ewa Solomoni yaamukobera byonabyona ebyamuli ku mwoyo.

1 Bakyabazinga 10:25

Buli muntu eyaidhanga, ng'aleeta ekirabo: ebintu bya feeza n'ebya zaabu, ebivaalo, eby'okulwanisa, obuwoowo, embalaasi n'enhumbu. Abantu baaleetanga ebintu ebyo buli mwaka.

2 Ebyomubyanda 9:21

Kyabazinga yali n'olugololiro olw'amaato agaajanga e Tarushishi ku nhandha enene nga gali ghalala n'olugololiro olw'amaato ga Hiramu. Buli ku nkomerero ya myaka esatu, olugololiro lw'amaato olwo lwairanga okuva e Tarushishi nga luleese zaabu, ni feeza, n'amasanka, n'ensude, n'enkembo.

Zabbuli 45:12

Abantu ab'e Tiro balikuleetera ebirabo obasiime, abantu abo abasinga kuba bakombe,

Zabbuli 68:29

ng'oli mu isinzizo lyo e Yerusalemu bakyabazinga ye bakutonerera ebirabo.

Zabbuli 68:30

Kaabukira ensolo edho edh'omu nsiko edhisula mu bigada; okaabukire abantu abo abaayira enume n'obuyana aghalala, era obatyankirire okutuusa lwe banaakuba amakiryaivu ni bakutonera feeza. Sansaania abantu abo abenda einho okutanula entalo.

Isaia 42:10

Mwembere Musengwa Katonda olwembo oluyaaka. Ensi yoonayoona leka emusaake! Enhandha leka ewolome n'ebirimu byonabyona olw'eisanhu N'ebiketezo eby'oku nhandha leka byembe n'ababibaaku boonaboona.

Isaia 42:4

Taliwaamu maani waire okuwaamu eisuubi. Alireetagho okukolanga eby'amazima mu nsi ebigwaniire. N'ebiketezo eby'oku nhandha biri eyo biteegereire amateeka ge.”

Isaia 43:3

kuba ninze Musengwa Katonda wo, Omutukuvu wa Isiraeli era Omulokozi wo. Ndighaayo Misiri olw'okukununula, era naaghaayo Ethiopia ni Seba olw'okukuwonia.

Isaia 43:6

Ndiragira oluuyi olw'omukono omugooda olw'e buvandhuba lwabalekula, naalagira n'oluuyi olw'omukono omusaadha olw'e buvandhuba lwaloba kubaloberaku. Olwo mwaleeta batabane bange okuva eyo eghala, era mwaleeta ni baghala bange okuva eyo mu nsi dhoonadhoona.

Isaia 49:7

Musengwa Katonda Omutukuvu era Omununuzi wa Isiraeli, yeeyongera yaayogera n'omugheereza w'abafuzi oyo abantu ye banhooma einho, n'amaghanga ye gakyagha. Yaamukoba ati: “Bakyabazinga balikubona ng'osibwirwa, baasituka baakutaamu ekinhagansi, n'abakungu boona balikubona baakukubira amakiryaivu; kuba Musengwa Katonda omwesigwa era Omutukuvu wa Isiraeli n'eyakulonda.”

Isaia 60:3

Amaghanga galiidha eri obutangaavu bwo, ni bakyabazinga baidha eri okumesunkana kwo.

Isaia 60:6

Engamiya olukunkumuli dhiriidhula mu iwe nga dhiva mu Midia ni mu Efa, era dhaava ni mu Sheba, nga dhiri kuleeta zaabu n'obubbaani. Abantu balirangirira ebirungi Musengwa Katonda by'akoze.

Isaia 60:9

Ago n'amaato agava mu nsi edh'eghala, nga gakulembeirwamu amaato ag'e Tarushishi, agali kuleeta abantu ba Musengwa Katonda okuva eyo eghala. Abantu abo baleese feeza waibwe ni zaabu waibwe, okugha ekitiisa Musengwa Katonda Omutukuvu wa Isiraeli, kuba ataire ekinhagansi mu bantu be.

Matayo 2:11

Agho baingira mu ndhu, baabona omwana ghalala n'inhina Maria, beeyala ku itaka baamusinza era baasibulula ebitereke byaibwe baamugha ebirabo: Zaabu, obubbaani ni mirra.