Yoeli 2:12 - Baibuli Ekibono kya Katonda 2014

¹² Musengwa Katonda akoba ati: “Ni bweriba mperaano, kwona mwenenie bya bwenebwene. Mwire ye ndi nga musiiba era nga mulira amaziga.

Yoeli 2:12 Iomraidhean Croise

2 Samueli 24:10

Aye Daudi bwe yamala okubala abantu yeeraliikirira mu omwoyo, yaakoba Musengwa Katonda ati: “Wo Musengwa Katonda nhonoine inho olw'ekyo kye nkoze. Era buti nkweghembye ntoolaaku ekibi ekyo nze omugheereza wo, kuba nkoze kya busiru inho.”

2 Ebyomubyanda 30:6

Agho abakwenda baakola nga kyabazinga bwe yalagira, baaja mu Isiraeli ni mu Buyudaaya mwonamwona nga bali n'embaluwa edhiva ye kyabazinga oyo n'abakungu be, edhikoba dhiti: “Imwe Abaisiraeli abaawonagho ni mutatwalibwa bakyabazinga ba Siria, mukyuke mwire eri Musengwa Katonda, Katonda wa Aburahamu, ni Isaaka, ni Isiraeli, memale yeena aire ye muli.

2 Ebyomubyanda 6:27

bawulirenga eyo y'oli mu igulu. Era osonighenga ebibi by'abagheereza bo, Abaisiraeli abantu bo, obeegeresanga okukola ebituufu. Era gwisanga amaadhi ku nsi yo eno, ye wagha abantu bo okuba omugabo gwaibwe.

Okuvaayo 33:5

kuba Musengwa Katonda yali amaze okukoba Musa akobe abantu ati: “Muli ba mpwitu inho, era bwe njiira aghalala n'imwe, ni bwekaba akaseera akatono kati, mbaita naabamalagho. Buti ni mutoolemu ebyamadholobera byaimwe, nze mwene ndidha kumanha eky'okubakolera.”

Isaia 22:12

Era mu biseera ebyo, Musengwa Katonda Afuga Amagye, yali ali kubeeta mulire era mube mu nnaku, mumwe ku mitwe gyaimwe enviiri okudhimaliriraku ng'oti mpaata, era muvaale ekutiya.

Isaia 58:4

Okusiiba kwaimwe kubaleetera bukambwe, mwasoola era mwalwana, mwafuntagana bwa bifunsi.’ “Mulowooza muti bwe musiiba mu nsambo ng'oti n'eyo, nze nsobola okuwulirisa okusaba kwaimwe?

Yeremia 3:22

Musengwa Katonda akoba nti: ‘Imwe abatali beesigwa, mwire ye ndi, ndidha kubawonia mbafuule beesigwa.’ Ate imwe mukoba muti: ‘Bona eno, twidhie y'oli, kuba niiwe Musengwa Katonda waife.

Yeremia 36:7

Oba katyo balitoolera okusabanga Musengwa Katonda, era baakyuka baaleka empisa dhaibwe embi, kuba Musengwa Katonda yeesoomeire okukola ku bantu abo mu busungu n'ekiruyi ebitaloodheka.”

Yeremia 4:1

Musengwa Katonda akoba ati: “Imwe Abaisiraeli, oba nga bwene mwenda okukyuka, mukyuke mwire ye ndi. Bwe mutoolagho ebyenhinhalwa byaimwe bye musinza, ni mugumira ku nze aghazira kudaaliima naire,

Yeremia 4:2

era ni muba abatuufu nga mulayira mu mazima era nga muli beesimbu, muti, ‘Nga Musengwa Katonda bw'ali omulamu.’ Olwo amaghanga gaidha kunsabanga ngaghe enkabi, era gampenga ekitiibwa.”

Ezekieli 33:11

Bakobe oti nze Musengwa Katonda nga bwendi omulamu, tinhumirwa kubona mwonooni ng'afiire. Aye nhenda akyuke aleke ebibi bye, abe mulamu. Imwe abantu b'eighanga Isiraeli, mukyuke. Mukyuke muve mu mpisa dhaimwe embi. Lwaki mwenda okufa?

Danieli 9:3

Agho naakyukira eri Musengwa Katonda wange, naamusaba nga mweghemba, naasiiba, naavaala ekutiya, era naatyama mu ivu.

Hosea 12:6

Kale imwe baidhukulu ba Isiraeli, mwire ye Katonda waimwe oyo aidha kubayambanga. Mwekalangulenga okugonzania n'okukola amazima. Era aghazira kukoogha naire, muteegererenga okubona ky'anaabakoleranga.

Hosea 12:7

Musengwa Katonda akoba ati: “Abaisiraeli ti beesigwa, bali ng'oti basuubuzi abakozesa minzaani enkyamu, okuseera be basuubulagana nabo.

Hosea 14:1

Imwe Abaisiraeli, mwire eri Musengwa Katonda, oyo Katonda waimwe, kuba ebibi byaimwe byabaleetera okwekontola mwagwa.

Hosea 6:1

Abantu baja baakoba bati: “Mukole twire ye Musengwa Katonda. Waire nga mwene n'eyatuyuzayuza aye alituwonia; era waire nga n'eyatufumita aye alitunhiga ebibwa ebyo.

Yoeli 1:13

Imwe bakabona muvaale ekutiya mulire enaku, muwowoole imwe abagheereza ku alutaari. Imwe abagheereza ba Katonda wange, mwingire mu isinzizo musule nga muvaire kutiya olw'okunakughala; kuba tighakaali bigheebwayo bya mere ya mpeke waire ebigheebwayo eby'okunhwa ebireetebwa mu isinzizo lya Katonda waimwe.

Zekaria 7:3

Era baabatuma n'okubuuza bakabona b'omu isinzizo lya Musengwa Katonda oyo Afuga Amagye aghalala n'abalanzi bati: “Tuje mu maiso n'okuliranga amaziga olw'okuzikirizibwa kw'eisinzizo, era nga tusiiba mu mwezi ogwokutaanu nga bwe tubairenga tukola mu myaka egyo gyonagyona egibiseegho?”

Zekaria 7:5

“Kobera abantu boonaboona abali mu nsi eno, ni ba kabona, oti bwe baasiibanga ni baliranga maziga mu mwezi ogwokutaanu n'ogwomusanvu okumala emyaka egyo ensanvu, tibaabikolanga lwa kugheesa nze kitiisa.

Malaki 1:9

Imwe bakabona, ni bwemweghemba einho Katonda atugemerwe ekivunika, aye nga mumugheereiza ekigheebwayo ng'oti n'ekyo, ghaligho y'anaasiimaku ku imwe waire omulala ati?

Ebikolwa by'Abatume 26:20

Aye natoolera n'ab'omu Damasiko, n'ab'omu Yerusalemu, n'ab'omu Buyudaaya yoonayoona, era n'ab'omu maghanga agandi, naabakobera beenenie, bakyuke baire ye Katonda, bakole ebikolwa ebyoleka nga beeneniiza.

Abalamuzi 2:4

Malaika wa Musengwa Katonda bwe yamala okwogera ebyo, Abaisiraeli boonaboona baalira amaziga.

Abalamuzi 20:26

Agho abalwani ba Isiraeli boonaboona baaniinaniina baaja e Betheli, baalirira eyo. Baaba eyo mu maiso ga Musengwa Katonda olunaku olwo, nga ghazira ke bali kulya naire okutuusa eigulo. Baaghaayo ye Musengwa Katonda oyo ebigheebwayo ebyokebwa, n'ebigheebwayo olw'okutabagana.

1 Samueli 7:3

Agho Samueli yaakoba Abaisiraeli boonaboona ati: “Oba nga mwenda okukyuka okwira ku Musengwa Katonda n'omwoyo gwaimwe gwonagwona, mutoolegho emisambwa egy'amaghanga agandi gyonagyona era mutoolegho n'ebifaananie eby'omusambwa omukazi Ashitarothi. Mwegheereyo irala eri Musengwa Katonda, yenka ye mube mugheereze. Aidha kubawonia Abafilisiti.”

1 Samueli 7:6

Kale beesololeza e Mizipa, baasena amaadhi baagafuka agho mu maiso ga Musengwa Katonda, ng'ekigheebwayo. Baasiiba ku lunaku olwo, era baakoba bati: “Twakola ekibi ye Musengwa Katonda.” Eyo e Mizipa, Samueli ye yalamuliranga Abaisiraeli.