Nehemia 10:39 - Baibuli Ekibono kya Katonda 2014

³⁹ Abaisiraeli abandi, n'Abalevi, baidha kutwalanga emere ey'empeke esondeibwa, n'omwenge ogw'emizabbibu, n'omuzigo ogw'ebibala eby'emiti emyoliva, babite mu iterekero omukuumirwa ebintu ebikozesebwa mu Kifo Ekitukuvu, okumpi n'ekifo bakabona abali ku mulimo, n'abakuumi, n'abembi, ghe baba. “Bwenebwene titwidha kulekuliranga agho ndhu ya Katonda waife.”

Nehemia 10:39 Iomraidhean Croise

2 Bakyabazinga 7:10

Agho bairayo ku kibuga Samaria, baayeta abaigazi b'ekibuga ekyo, baabakobera bati: “Tujiire mu kifo Abasiria ghe baasimba weema dhaibwe, twaloba kwagaanayo waire okuwulirayo omuntu naire omulala ati. Aye ghabairegho bwa mbalaasi na ndogoyi nga nsibe, ni weema nga badhirese nga bwe dhaabaire.”

2 Ebyomubyanda 31:11

Agho Hezekia yaalagira bategekeyo ebisenge mu isinzizo, era baabitegeka.

2 Ebyomubyanda 31:12

Baingiza omwo n'obwegendereza ebyagheebwayo okuba ebya Musengwa Katonda, n'ekintu ekirala ekirala ku buli bintu eikumi omuntu bye yali nabyo. Baataagho Konania Omulevi okukolanga ogw'okubirabirira, nga Shimei muganda we n'amwiririra.

Nehemia 12:47

Era mu biseera bya Zerubbabeli ni mu bya Nehemia, Abaisiraeli boonaboona baaghangayo omugabo buli lunaku gwe baaghanga abembi n'abakuumi ab'emiryango. Era baaghangayo n'emigabo gy'Abalevi, ate Abalevi boona baayawulanga ku egyo, baaghaaku abaana ba Aaroni.

Zabbuli 122:9

Olw'okuba ngonza inho endhu ya Musengwa Katonda, oyo Katonda waife, nkwendeza bikalamu byereere.

Okubala 18:26

“Koba abalevi oti, ‘Bwe munaamalanga okutoola ku Baisiraeli ekintu ekirala ekirala ku buli bintu eikumi kye bampa, nze Musengwa kye mbaghaire ng'omugabo gwaimwe, mwena mwidha kutoolanga ekintu kirala kirala ku buli bintu ikumi ku ebyo bye mufunie, kibenga ekigheebwayo eri nze Musengwa Katonda.

Okubala 18:30

Bwe munaamalanga okughaayo ebyo ebisinga bulungi, ebisigalagho mwidha kubisigazanga ng'omuntu bw'asigaza ebiva mu kifo aghakubirwa engaano n'ebiva mu kikunhiro eky'omwenge ogw'emizabbibu.

Amateeka Agokubiri 12:17

Kiisi kye mughaayo ye Musengwa Katonda, mutakiriiranga eyo ye muba: ka kibe ekitundu ekirala ekirala ku buli bitundu ikumi eby'engaano yaimwe, oba eby'omwenge gwaimwe ogw'emizabbibu, oba eby'omuzigo ogw'ebibala eby'emiti emyoliva oba ka dhibe ensolo dhaimwe, ng'ente, entaama, oba embuzi, edhizaalibwa mu luzaalo olusooka oba ekigheebwayo kyaimwe eky'okutuukiriza obweyamo bwaimwe ye Musengwa Katonda, oba ekigheebwayo kyaimwe eky'ekyeyendere, oba ebigheebwayo byaimwe ebindi bye mughaayo.

Abaheburayi 10:25

Tutagayaaliriranga kwesolozanga ng'abandi bwe bakola. Aye kiisi muntu agumyenga mwine n'okusingira irala nga mperaano bwe muli kubona ng'Olunaku lwa Musengwa luli kumpi okutuuka.