Mika 4:4 - Baibuli Ekibono kya Katonda 2014

⁴ Buli muntu aidha kuwuliranga emiraala ng'ali mu masamba ge ag'emizabbibu n'ag'emiti emitiini, nga ghazira muntu yeenayeena amutiisa naire. Kuba Musengwa Katonda afuga amagye, mwene n'akobye.

Mika 4:4 Iomraidhean Croise

1 Bakyabazinga 4:25

Ekiseera kyonakyona kye yamala nga mulamu, abantu boonaboona mu Buyudaaya ni mu Isiraeli, baali mu miraala okuva e Dani okutuuka e Beerisheba. Buli maka gaabanga n'eisamba lyago ery'emizabbibu n'ery'emiti emitiini.

1 Bakyabazinga 5:5

Kale kye nviire ni nsalagho okuzimbira Musengwa Katonda wange eisinzizo, nga Musengwa Katonda oyo bwe yakoba lata wange Daudi ati, ‘Mutabane wo, ye ndita ku kityamo eky'obwakyabazinga okukusikira, n'alinzimbira eisinzizo.’

Yobu 11:19

Oidha kutendukanga nga ghazira akutiisa; abantu kamaala baidha kukusabanga obuyambi.

Zabbuli 72:3

Ensi eveemu amakungula amalungi, n'obutuufu bwo bweyoleke.

Ensambo 3:25

Toobenga na kweraliikirira kabi kukwidhira, waire okweraliikirira okuzikirira okukuzinduukiriza, ng'oti n'okwo okwidhira abakozi b'ebibi.

Isaia 1:20

Aye bwe munaadheemanga obudheeme, mwidha kwitibwanga bwitibwe. Nze Musengwa Katonda, ninze ndhogeire.”

Isaia 17:2

Ebibuga by'e Aroeri biidha kusigala nga biziramu bantu ebyanda n'ebyanda. Biidha kubanga byayiro bya ntaama na mbuzi, dhibenga omwo nga ghazira adhitiisa naire.

Isaia 22:25

Musengwa Katonda Afuga Amagye akoba ati: “Olunaku olwo bwerulituuka, enkondo ye baali bakomereire mu kifo kyayo n'eguma, erisimbukayo yaagwa. Era eyo n'eriba enkomerero y'ebyo byonabyona ebigighanikiibwaku.” Musengwa Katonda n'ayogeire.

Isaia 26:16

Wo Musengwa Katonda, abantu bo bwe baali mu buzibu, baidha baakwagala y'oli; bwe wabakangaivula, baakusaba nga bakweghemba.

Isaia 32:17

Era olw'abantu okukola ebituufu kirireetera ensi eno okubaamu emiraala, era kyagiviiramu okuba n'obutebenkevu, n'obwesige, ebyanda n'ebyanda.

Isaia 36:16

Mutawulirisa Hezekia, kuba kyabazinga w'e Assiria akoba ati, ‘Muveeyo bya bulungi mwegheeyo ye ndi. Olwo kiisi muntu aidha kulyanga ku bibala eby'emizabbibu egigye gyene, n'eby'emiti emitiini egigye gyene, era anhwenga amaadhi ag'omu nsulo eyiye yeene,

Isaia 40:5

Olwo ekitiisa kya Musengwa Katonda kiryeyoleka, abantu boonaboona baakibona. Musengwa Katonda mwene n'akobye.”

Isaia 54:14

Okukola amazima n'obutuufu birikuleetera okuba ow'amaani. Oliwona okutuntuzibwa, era ebintu ebitiisa tibiriseeta gh'oli.

Isaia 58:14

olwo mulifuna eisanhu eriva mu kumpeereza nze Musengwa Katonda. Ndireetera abantu b'ensi dhoonadhoona okubatangamu imwe ekinhagansi, era imwe ndibagha ensi ye nagha dhaadha waimwe Yakobo, yaaba butaka bwaimwe. Nze Musengwa Katonda, ninze nkobye.”

Yeremia 23:4

Ndibateeragho abakulembeze okubalabiriranga, abantu bange abo baalekera agho okutya n'okweraliikirira, era ghaaloba kubaagho waire omulala ati abula. Nze Musengwa Katonda, ninze nkobye.”

Yeremia 30:10

Kale ni, imwe abantu bange Abaisiraeli, mutatya, waire okweraliikirira. Mubone eno, nze ndibanunula, naabatoola mu nsi eyo ey'eghala, ensi ye mulimu ng'abasibe. Muliira ewaimwe mwatyama mwatereera nga muli mu miraala, era nga ghazira kibatiisa naire.

Ezekieli 34:25

Ndikola nadho endagaano ey'emiraala, naamalagho mu nsi eyo ensolo enkambwe. Olwo entaama dhisobole okubanga eyo mu nsiko nga dhiri mu miraala, era dhitendukenga n'eyo mu bibira.

Ezekieli 34:28

Amaghanga agandi galiba nga tigakaabatuntuza, waire ensolo edh'omu nsiko mu nsi eyo okubakankamira. Baliba mu miraala nga ghazira kintu kyonakyona kibatiisa naire.

Ezekieli 38:11

ng'okoba mule oti, ‘Ndidha kuja numbe abantu ab'omu nsi eyo ey'ebibuga ebiteezungulwirwa bimante bigumu. Ndibagwaku nga bali mu miraala, nga bazira kye beekengeera naire, era nga bazira ntegeka yoonayoona ya kwekuuma.’

Ezekieli 39:26

Bwe baliiramu kabiri okuba mu nsi yaibwe mu miraala nga ghazira abatiisa naire, balyerabira bwe baaswazibwa olw'obutaba beesigwa ye ndi.

Abalevi 26:6

“Nnaabaghanga emiraala mu nsi yaimwe, mwatendukanga nga ghazira kibatiisa. Era ndimalagho ensolo edh'akabi mu nsi yaimwe, ensi yaimwe yaaloba kubangamu ntalo.

Mika 5:3

Kale Musengwa Katonda aja kulekulira agho abantu be Abaisiraeli okumala entangama, okutuusa omukazi ali kulumwa okuzaala lw'alizaala omufuzi oyo. Olwo Baisiraeli baine baja kwira okuva mu bunhage, beeyimbe ku baganda baibwe abaasigala.

Zefania 3:13

Era abantu abo abaliwonagho mu Isiraeli tibalikola kisobu naire, tibalyogera bya buguya, oba okukozesa olulimi olubuzaabuza. Baidha kubanga bulungi nga bazira kye badhulirira, era nga ghazira kintu kyonakyona kibatiisa.”

Zekaria 3:10

Okuva olunaku olwo, buli muntu alyetanga mwine aje ewuwe awuumulireku mu isamba lye ery'emizabbibu n'ery'emitiini.”