Isaia 4:2 - Baibuli Ekibono kya Katonda 2014

² Olunaku olwo bwe lulituuka, Musengwa Katonda alireetera ebimera byonabyona n'emiti okuboneka obulungi era nga bya kitiisa. N'ebibala eitaka bye liribaza biriba bikalamu, byawoomera inho abo abaliba bawoniegho mu Isiraeli.

Isaia 4:2 Iomraidhean Croise

Zabbuli 67:6

Ebirime bibaze inho ku nsi. Katonda, oyo Katonda waife, atughaire enkabi.

Zabbuli 72:16

Emere ebenga ya mwero mu byalo; ensozi dhoonadhoona dhiidhule misiri, ebibala byagyo bibe ng'oti n'ebibala eby'omu Lebanoni. Ebibuga biidhule abantu abangi ng'oti isubi.

Okuvaayo 28:2

Era oidha kukolera muganda wo oyo Aaroni ebivaalo ebiidhwire obutukuvu ebimugheesa ekitiisa, era ni bimubonesa obulungi.

Isaia 11:4

Aye aidha kusalanga emisango gy'abaavu mu butuufu, era akolerenga abaziraku bwogereso ebyo bye bagwaniire okukolerwa. Aliragira bulagire, abantu mu nsi baabonerezebwa, era ababi baitibwa.

Isaia 26:1

Ku lunaku olwo abantu balyemba olwembo luno mu Buyudaaya, bati: Ekibuga kyaife kigumu begulugulu. Katonda mwene n'eyakizimbaku ebimante ebigumu, era mwene n'akikuuma.

Isaia 27:6

Mu biseera ebiri kwidha, Abaisiraeli baidhukulu ba Yakobo balisimba emizi ng'oti muti, baamulisa ekimuli, era baataaku ebibala ebiidhuza ensi.

Isaia 30:23

Olwo buli bye mulisiganga, Musengwa Katonda alibifukiriranga amaadhi agagwa byakula, yaabaleetera okukungula ebirime eby'omwero. Ensolo dhaimwe dhiriba n'ebyayiro ebigazi obukalamu.

Isaia 45:8

Iwe eigulu, toonhesa obutuufu buve ku igulu ng'oti maadhi, era ensi eyasame ebumire, bumerukemu eidembe n'amazima, bibe ku nsi. Nze Musengwa Katonda ninze ndidha okuleetera ekyo okubaagho.”

Isaia 53:2

Omugheereza wa Musengwa Katonda oyo yakulira mu maiso ga Musengwa Katonda, ng'oti n'ekisimbe ekito ekisimba emizi mu itaka eikalu. Yali agho atyo ng'aziraku kisikiriza naire: tiyaliiku munhiriro ogwandituleeteire okumulingirira, oba okuba omulungi mu mboneka, ekyandituleeteire okumwegomba.

Isaia 60:15

Walekulirwa agho waakyayibwa, nga ghazira na muntu akubitamu. Aye ndikuleetera buliidho okubonekanga obulungi einho, era waaba kifo kya isanhu ebyanda n'ebyanda.

Isaia 60:21

Abantu bo boonaboona balikolanga ebituufu, era baatwala ensi yaaba yaibwe ebyanda n'ebyanda. Baliba lusaga nze mwene lwe neesimbira era omulimo nze mwene gwe neekolera, nsobole okugheebwanga ekitiisa.

Isaia 61:11

Bwenebwene ng'eitaka bwe limeza ebimera, era ng'enimiro bw'ekuza bye bagisimbyemu, ni Musengwa Katonda atyo bw'alireetera obutuufu okumeruka mu bantu be, amaghanga goonagoona gaamutaamu ekitiisa.

Yeremia 23:5

Musengwa Katonda era yaakoba ati: “Bona eno, ekiseera kiri kwidha, nteegho omwidhukulu omutuufu owa Daudi abe kyabazinga. Aja kufuganga n'amagezi era aidha kukolanga amazima n'ebituufu mu nsi ye.

Yeremia 33:15

Mu kiseera ekyo nditaagho omuntu omutuufu, nga mwidhukulu wa Daudi, yaaba kyabazinga. Kyabazinga oyo alikola amazima n'ebituufu mu nsi.

Yeremia 44:14

Ku bantu b'omu Buyudaaya abaali bawoniegho ni baja okuba mu nsi Misiri, tikulibaaku waire omulala ati aja okuwonagho oba okusigalagho. Tikulibaaku aliirayo mu Buyudaaya ye beegomba okwira babe eyo. Tikulibaaku aliirayo okutoolaku abatono bati, abalirumuka ni bawonagho.”

Yeremia 44:28

Aye ghalibaagho abatono bati ku imwe abaliwona okufa, ni bava e Misiri ni baira mu Buyudaaya. Olwo abo abaliwonagho balimanha oba nga ebibono ebyange n'ebituukiriire, oba ebyaibwe.

Ezekieli 34:29

Ndireetera enimiro dhaibwe okuba engimu, naamalagho endhala mu nsi eyo. Era amaghanga agandi tigaliiramu kubavumanga kabiri.

Ezekieli 36:8

Aye imwe ensozi edh'omu Isiraeli, mulimeraku emiti, gyataaku n'ebibala, ku lw'abantu bange Abaisiraeli abali kumpi okwira eka.

Ezekieli 7:16

Aye abaliwonagho balirumukira mu nsozi, baaba ng'oti n'amayemba ag'omu biiko agatiire ni galumukayo. Boonaboona baliba mu kulira maziga, nga buli muntu alira olw'ebibi bye.

Yoeli 2:32

Aye kiisi alisaba Musengwa Katonda okumubeera alirokolebwa, kuba ku lusozi Sioni mu Yerusalemu eribaayo abaliwona, nga Musengwa Katonda mwene bwe yakoba. Abo Musengwa Katonda mwene baalirondamu n'abaliwonagho.”

Yoeli 3:18

Mu kiseera ekyo, ensozi dhiriidhula enimiro dh'emizabbibu, n'obusozi bwaidhula ente edhikamwa. Obwiga bw'omu Buyudaaya bwonabwona buliidhula amaadhi. Era ghalibaagho ensulo ey'amaadhi erikuuluula ng'eva mu isinzizo lya Musengwa Katonda, yaaja yaafukirira Ekiiko eky'e Shittimu.

Obadia 1:17

“Aye ku lusozi Sioni eribaayo abaliwonagho era olusozi olwo luliba lutukuvu. Abantu ab'oku nda ya Yakobo baliba n'ensi nga yaibwe ku bwaibwe.

Zekaria 3:8

Kale ni, iwe Yoshua Omukulu wa Bakabona ghalala ni bakabona baino, muwulire kino: Niimwe akamanhiso ak'ebiseera ebirungi eyo ye bwidha. Era nja kubooleka omugheereza wange ayetebwa Olusaga!

Zekaria 6:12

Omukobe oti Musengwa Katonda Afuga Amagye akoba ati, ‘Bona eno, omuntu ayetebwa eriina Olusaga aja kukulira gheene agho mwene gh'ali, era aja kuzimba eisinzizo lya Musengwa Katonda.

Zekaria 9:17

Bwenebwene ensi eriba nungi era ng'esikiriza! Abalenzi n'abaghala tibalibulirirwa ngaano ya kulya, waire okubulirirwa omwenge ogw'emizabbibu ogw'okunhwa, basobole okuba obukalamu.

Malaki 3:17

Musengwa Katonda Afuga Amagye akoba ati: “Abo baliba bantu bange, nga bange mu ngeri ey'endhawulo. Era ku lunaku lwe ndituukirizaaku ekibonerezo kye ntegeike, abo ndibasaasira ng'omuzaire bw'asaasira omwana we omugonvu amugheereza.

Matayo 24:22

Nguli enaku edho tidhaakendeezebwaku, ghazira muntu yandiwonie. Aye ku lw'abalonde enaku edho dhirikendeezebwaku.

Luka 21:36

Mulingirire inho ebirigho era musabe, musobole okuwona ebyo ebija okubaagho era n'okwemerera mu maiso g'Omwana w'Omuntu.”

Yoanne 1:14

Kibono yaafuuka omuntu yaaba mu ife ng'aidhwire ekisa n'amazima. Twabona ekitiisa kye, ekitiisa ng'eky'Omwana wa Lata omulala bedengedenge.

2 Ab'e Korintho 4:6

Katonda eyakoba ati, “Ekimulika kyake mu nzikiiza!” N'eyaleeta ekimulika kye okwakira mu myoyo gyaife, okutumanhisa ekitiisa kya Katonda ekyakira ku maiso ga Kurisito.

2 Petero 1:16

Bwe twabamanhisa ku kwira kwa Musengwa waife Yesu Kurisito n'obuyinza, ti twali ng'ababakobera enfumo obufumo. Aye twabaloodhera ekitiisa kye, kye twabona n'amaiso gaife geene.