Hosea 4:1 - Baibuli Ekibono kya Katonda 2014

¹ Imwe Abaisiraeli muwulire Musengwa Katonda by'akoba. Ghaligho omusango gw'ali kulumiriza abantu ababa mu nsi eno, kuba abantu b'omu nsi eno ti beesigwa era ti ba kisa, waire okutya Katonda.

Hosea 4:1 Iomraidhean Croise

1 Bakyabazinga 22:19

Mikaia yeeyongera okukoba ati: “Kale ni wulira Musengwa Katonda by'akoba: Mboine Musengwa Katonda oyo ng'atyaime ku kityamo kye eky'obwakyabazinga, ng'eigye lyonalyona ery'omu igulu lyemereire ku luuyi lwe olw'omukono omusaadha ni ku lw'omugooda.

Zabbuli 81:9

Mutasinzanga katonda wundi okutoolaku nze Katonda zenka; mutakubiranga makiryaivu misambwa egisinzibwa abamaghanga agandi.

Isaia 1:10

Muwulirise Musengwa Katonda by'akoba, imwe abakulembeze ba Yerusalemu abali ng'oti n'ab'e Sodoma; mutege kutu imwe abantu abali ng'oti n'ab'e Gomorra, mwetegereze Katonda waife by'abeegeresa.

Isaia 1:18

Musengwa Katonda akoba ati: “Kale ni mwidhe twogere ku bintu ebyo twisanie. Ebibi byaimwe ni bwe biba nga byabamyusa bwe myu myu myu, ndidha kubanaaza mutukule ng'oti mugozi; era ebibi ebyo ni bwe biba nga byabafuula ba kasaayisaayi omugemu, ndidha kubaamula mube beeru ng'oti n'enhonhi dhe beeta enhange.

Isaia 28:14

Kale muwulire imwe abanhoomi abafuga abantu bano mu Yerusalemu.

Isaia 34:1

Imwe abantu ab'amaghanga goonagoona museete kumpi. Abantu mwenamwena mutege amatu muwulire. Iwe ensi idha owulirise, ghalala n'ebikulimu byonabyona.

Isaia 34:8

Ekyo n'ekiseera Musengwa Katonda ky'alyesasuuliza ku bazigu ba Sioni, n'ababonereza olw'ebyo bye baakola abantu be.

Isaia 5:3

Mukagwa wange oyo mperaano akoba ati: “Kale ni, imwe abatyamye b'omu Yerusalemu n'ab'omu Buyudaaya, mbasaba mutusalire omusango ghagati ghange n'eisamba lyange eryo ery'emizabbibu.

Isaia 59:4

Ghaziragho muntu awoza musango mu butuufu ng'ali kukolera ku mazima. Aye muwoza ebiziragho, mwayogera eby'obuguya, memale mwasinga omusango. Mutegeka okukola ebibi era mwamala mwabikola, mwayonoonera irala.

Isaia 59:8

Timwidhi kyetebwa miraala, era bye mukola tibijiira ku mazima. Mutambulira mu ngira engodegode, era kiisi adhibitamu taba na miraala naire.

Isaia 66:5

Imwe abafuba einho okugondera Musengwa Katonda by'alagira ni mubikola, muwulire Musengwa Katonda oyo ky'akoba: “Olw'okuba muli beesigwa ye ndi, abandi ku bantu baimwe beene babakyagha era baababingagania, nga babayeeyereza bati, ‘Musengwa Katonda leka abawonie ayolese nga bw'ali ow'ekitiisa, tuboneku nga bwe musagamba.’ Aye beene n'abaliswazibwa.

Yeremia 11:7

kuba bwe natoola badhaadha baibwe mu nsi Misiri, nabalabuliragho irala okumpuliranga. Era nkaabalabula ni ye buli eno aghazira kukoogha naire.

Yeremia 19:3

Oidha kubakoba oti, ‘Imwe bakyabazinga ab'omu Buyudaaya n'imwe abantu ab'omu Yerusalemu, mumpulirise nze Musengwa Katonda Afuga Amagye era Katonda wa Isiraeli. Nja kuleeta ku kifo kino akabi nga kiisi akawuliraku, amatu ge gamuwaawaala buwaawaale.

Yeremia 2:4

Muwulire obukwenda obuva ye Musengwa Katonda, imwe baidhukulu ba Yakobo, imwe Abaisiraeli mwenamwena.

Yeremia 2:9

“Kale ni ndidha kusigala nga nkaabalumiriza omusango gwaimwe, era nsigale nga nkaagulumiriza n'abaana baimwe n'abaidhukulu.

Yeremia 25:31

Amamiro ge baligawulira eyo yoonayoona ensi y'ekanga, kuba ghaligho omusango Musengwa Katonda oyo gw'avunaana amaghanga. Aliwozesa abantu boonaboona, yaabaghaayo baabaita.’ ”

Yeremia 34:4

Iwe Zedekia, wulirisa bye nja okukukoba ebikugemaku: Tibalikwitira mu lutalo.

Yeremia 4:22

Musengwa Katonda akoba ati: “Abantu bange basiru tibandidhi naire. Basiru ng'oti bwa baana bato; baziramu kutegeera naire. Bakugu mu kukola ebibi, aye tibaidhi kukola birungi.”

Yeremia 4:28

‘Ekyo kirireetera ensi okulira, ni ku igulu kwairugala; kuba nze kye ndhogeire tiidha kukikyusaamu naire, era kye nsazeegho tiidha kukivaaku naire.’

Yeremia 5:4

Agho naakoba mule nti: “Abantu bano baavu inho era bazira kye baidhi. Tibaidhi Musengwa Katonda by'ayenda, waire okumanha amateeka ga Katonda waibwe oyo.

Yeremia 51:5

kuba nze Musengwa Katonda, Katonda Afuga Amagye, tirekuliire agho Baisiraeli na Bayudaaya, waire nga beene baiza omusango ye ndi, nze Omutukuvu wa Isiraeli.

Yeremia 6:13

kuba okuviira irala ku basembayo ghansi okutuukira irala ku babbede beene, boonaboona bagwidhubanira bya kufuna mu bukyamu. Waire abalanzi ni bakabona, boona bakupankupania.

Yeremia 7:28

Oidha kubakoba oti eighanga lyaibwe tirimpulira nze Musengwa Katonda waalyo era tiriganha kugalagirwa. Tirikaali na mazima, waire okugoogeraku obwogere.’”

Yeremia 9:20

Nze naakoba nti: “Bakazi imwe, muwulire ebibono bya Musengwa Katonda, era mwetegereze by'akoba. Mwegerese baghala baimwe okulira amaziga, era buli muntu ayegerese mwine okugegenga;

Yeremia 9:3

Olulimi lwe bakozesa ti lutereevu naire, lwidhwire buguya bwereere. Ensi yaibwe mu kifo ky'okubaamu amazima, eidhwire bukupankupania. Musengwa Katonda akoba ati: “Abantu bange beeyongera bwa kukola bibi, era nze tibandidhi naire.”

Yeremia 9:7

Kale ni Musengwa Katonda oyo Afuga Amagye akoba ati: “Bona eno, ndidha kubasaanuusa ng'omuntu bw'asaanuusa ekyuma, era mbeekebeedhe; kuba nzira kindi kya kukolera bantu bange abo.

Ezekieli 16:35

Kale ni, iwe Yerusalemu malaaya, wulira Musengwa Katonda by'akoba.

Hosea 12:2

Musengwa Katonda ali n'omusango gw'avunaana Abayudaaya, era alibonereza ni Isiraeli olw'eneebisa abantu baayo ye beebisaamu. Alibeesasuulizaaku olw'ebikolwa byaibwe ebibi.

Hosea 12:3

Dhaadha waibwe Yakobo yagemerera mu mukono gwe ekibbonge kya muganda we Esau, nga bakaali mu nda ya inhaibwe. Yakobo oyo bwe yakula yaalwana ni Katonda.

Hosea 5:1

“Imwe bakabona muwulire kino! Imwe Abaisiraeli mufeeyo ku kye nkoba! Imwe ab'endhu ya kyabazinga mutege kutu! Omusango baligubasalira; kuba e Mizipa mwafuukira abantu ekizibu ng'oti mutego, e Tabori mweraliikiriza abantu ng'oti lutuula olutegeibwa,

Hosea 5:4

Ebikolwa byaibwe tibibaganha kukyuka kwira ye Katonda waibwe; kuba batwalirizibwa okusinza ebitali Katonda, baaloba okumanha Musengwa Katonda oyo.

Yoeli 1:2

Imwe abantu abakaire, muwulire kino imwe mwenamwena ab'omu mu Buyudaaya, mutege amatu. Ekintu ng'oti ni kino kibangaghooku mu biseera byaimwe oba mu bya badhaadha baimwe?

Amosi 3:1

Imwe Abaisiraeli abantu Musengwa Katonda be yatoola mu Misiri, muwulire Musengwa Katonda oyo by'aboogeireku.

Amosi 7:16

Buti ni wulira Musengwa Katonda by'akoba, iwe ali kunkoba ndekere okulanga ebivumirira Isiraeli, n'okukoba ebitali bikalamu ku baidhukulu ba Isaaka.

Mika 6:2

Imwe ensozi n'imwe emisingi egy'ensi egy'olubeerera, muwulirise omusango gwa Musengwa Katonda. Musengwa Katonda ali n'omusango gw'aghaghabira abantu be. Aja kulumiriza Abaisiraeli.

Yoanne 8:55

Timumumanhangaku aye nze mwidhi. Bwe nkoba nti timwidhi mba muguya ng'oti niimwe aye mmwidhi era ngema by'akoba.

Ab'e Roma 1:28

Olw'okuba baaloba okumanha Katonda, kyova Katonda yabaleka ni badankaana mu myoyo, ni bakola ebitasaana.

1 Ab'e Korintho 15:34

Mweireku mulekere agho okukola ebibi, kuba abandi ku imwe timwidhi Katonda. Kino nkyogeire mbagemye ensoni.

Okwolekebwa 2:11

Ali n'amatu awulire Mwoyo ky'akoba Ebikunsu eby'Abaikiriza mu Kurisito. Oyo aghangula, okufa okwokubiri tikulimukolaku kabi.

Okwolekebwa 2:29

Ali n'amatu, awulire Mwoyo ky'akoba Ebikunsu eby'Abaikiriza mu Kurisito.