Hosea 10:2 - Baibuli Ekibono kya Katonda 2014

² Bali n'emyoyo emiguyaguya. Kale ni buti bali n'okubonerezebwa olw'ebibi byaibwe. Musengwa Katonda alimenhagho alutaari dhaibwe, era yaazikiriza empango edh'amabaale dhe basinza.

Hosea 10:2 Iomraidhean Croise

1 Bakyabazinga 18:21

Agho Eliya yaaja eri abantu abo boonaboona, yaabakoba ati: “Mulituusa li okuyuugira eno n'ere nga timusalagho? Oba nga Musengwa Katonda ni Katonda, oyo ye mube musinze. Aye oba nga Baali ni Katonda, kale musinze oyo.” Aye abantu baaloba kumwiramu kibono waire ekirala.

Okuvaayo 23:24

Otakubiranga misambwa gyaibwe makiryaivu, oba okugisinza, oba okukola ebyo beene bye bagikolera. Aye ogizikirizanga, era waamenhamenhanga empango dhaagyo edh'amabaale.

Ensambo 11:18

Omukozi w'ebibi yeerimba ati katyo anaabifunamu empeera emugasa, aye ate omuntu omutuufu n'afuna empeera yeene egasa.

Isaia 44:18

Abantu abo bazira kye baidhi era bazira kye balowooza kikalamu. Baaziba amaiso gaibwe n'emyoyo gyaibwe, baaloba kubona waire okutegeera.

Yeremia 43:13

Kyabazinga oyo alimenhamenha empango dh'amabaale edh'ebiidhukizo edhiri e Heliopoli mu nsi Misiri, era yaayokya n'amasabo ga bakatonda baayo.”

Ezekieli 14:5

Olwo nsobole okwiza ye ndi ab'omu ighanga Isiraeli boonaboona, ebisinzibwa ebyo ebitali Katonda be byaleetera okunvaaku.

Hosea 12:11

Abakozi b'ebibi ab'omu Gileadi, bwenebwene balizikirira. N'alutaari edh'omu Giligali dhe bagheeraku ente enume ng'emisengo, dhirifuuka ng'oti mmungo dha mabaale edhiri mu nimiro.”

Hosea 13:16

Ab'e Samaria balivunaanibwa omusango olw'okundheemera nze Katonda waibwe. Abazigu balibaitira mu ntalo, era abazigu abo balikuba abaana baibwe abaghere ku itaka, baabasekembula okutuusa okufa. N'abakazi baibwe abali enda balibasala amabunda baagaawuza.”

Hosea 3:4

Mu nsambo ng'oti n'eyo, Abaisiraeli boona balimala ekiseera kireeyi nga bazira kyabazinga waire omukulembeze, nga bazira misengo gye baghaayo waire okuba n'empango dh'amabaale edhisinzibwa, nga bazira bivaalo bakabona bye bakozesa mu kulagula waire okuba n'ebifaananie ebisinzibwa ebyetebwa terafimu.

Hosea 7:8

Musengwa Katonda era akoba ati: “Abaisiraeli bali ng'oti mugaati ogufumbiibwa ni guyaaku oluuyi olulala lwonka. Beetabula n'abamaghanga agandi,

Abalevi 26:30

Ndidha kuzikiriza ebifo byaimwe ebigulumivu bye musinzizaamu emisambwa, era mmenheregho irala alutaari dhe muniokezaaku obubbaani olw'emisambwa egyo, n'emirambo gyaimwe ngisuule ku bifaananie eby'emisambwa egyo gye musinza. Mu busungu obungi

Mika 5:13

Ndizikiriza ebintu bye musinza ebitali Katonda n'empango edh'amabaale dhe musinza, era naabalobera okusinza ebintu bye mwekoleire n'engalo dhaimwe beene.

Zefania 1:5

Nja kuzikiriza abo abaaniina ghaigulu ku ndhu okusinza ebintu eby'oku igulu, n'abo boonaboona abansinza nze Musengwa Katonda, kabiri ni bamala balayira omusambwa Moleki.

Zekaria 13:2

Nditoola mu nsi Isiraeli ebisinzibwa ebitali Katonda, ghalobe kubaagho muntu abiidhukira waire okwidhukira amaina gaabyo. Nditoolagho n'abo boonaboona abeeyeta abalanzi, era naatoola ni mu bantu omwoyo ogwenda okusinza ebitali Katonda.

Matayo 6:24

“Ghazira asobola kugheereza basengwa babiri kuba, oba alikyagha mulala yaayenda owundi, oba aligumira ku mulala yaasambaadha owundi. Timusobola kugheereza Katonda ate na bya bufuni.

Luka 16:13

“Ezira mugheereza aja kuba ni basengwa be babiri kuba akyaghaku mulala yaayenda owundi, oba yeekubira ku mulala yaanhooma owundi. Timusobola kugheereza byombi: Katonda na bukombe bwa nsi.”

Yakobo 4:4

Ye bano abatatya Katonda! Timwidhi ng'okuba bakagwa b'ensi kitegeeza kuba bazigu ba Katonda? Kiisi ayenda kuba mukagwa wa nsi aba yeefiire muzigu wa Katonda.

1 Yoanne 2:15

Mutagonzanga nsi oba ebintu by'ensi. Omuntu yeenayeena bw'agonza ensi, tabaamu kugonza kwa Lata.

1 Samueli 5:4

Aye bwe baasitukagho ku nkyo ku lunaku olundi olwairirira, baaja okubona ng'ekiwumbe eky'omusambwa Dagoni kabiri kigwire n'obweni bwakyo bwatuuka ku itaka, emberi w'Esanduuku ey'Endagaano ya Musengwa Katonda ng'omutwe n'emikono bikutwikeku, nga bigwire gha mulyango. Ekiwumbe eky'omusambwa Dagoni ogwo, kyasigala kiwuduwudu kyereere.