Danieli 9:2 - Baibuli Ekibono kya Katonda 2014

² nze Danieli nali ndi kwetegereza ebyaghandiikibwa ebitukuvu, naabona ng'emyaka gija kuba nsanvu, ekibuga Yerusalemu gye kiri n'okumala nga kisigaire bifulukwa byereere, nga Musengwa bwe yamanhisa Yeremia omulanzi.

Danieli 9:2 Iomraidhean Croise

2 Ebyomubyanda 36:21

Ekyo kyabaagho okutuukiriza Musengwa Katonda bye yayogera ng'abita mu Yeremia omulanzi, ati: “Ensi erirekebwa agho etyo okumala entangama ya myaka nsanvu ng'ewuumula, olw'okwesasuuza ekiwuumulo kya Sabbato kye baali tibakuzanga.”

Ezera 1:1

Mu mwaka ogwasooka ogwa kyabazinga Kuro okufuga Perusia, Musengwa Katonda yatuukiriza ekyo kye yayogera ng'abita mu Yeremia omulanzi. Musengwa Katonda oyo yaleetera kyabazinga Kuro oyo okulangirira ekiragiro mu bwakyabazinga bwe bwonabwona, nga kighandiikiibwa kiti:

Zabbuli 119:24

Mba musangaavu okukola nga bw'onkoba, kuba by'onkoba n'ebimpa amagezi.

Isaia 64:10

Ebibuga byo ebitukuvu byafuuka ng'oti irungu: olusozi Sioni luli ng'oti irungu, ekibuga Yerusalemu kyafuuka ng'oti kifulukwa.

Yeremia 1:1

Bino n'ebibono Yeremia bye yayogera. Yeremia oyo yali mutabane wa Hilikia, eyali owundi ku bakabona ab'e Anathothi mu kiketezo kya Benjamini.

Yeremia 25:18

Ab'omu Yerusalemu n'ab'omu bibuga byonabyona ebya Buyudaaya, ghalala ni bakyabazinga n'abakungu baabyo baakinhwa. Olwo, ebibuga ebyo bisobole okufuuka ebifulukwafulukwa mu nsambo etiisa einho. Era olwo abantu babyesimoozenga bwesimooze era babikolimirenga, nga bwekiri ni ye buli eno.

Yeremia 26:18

“Hezekia bwe yali nga ni kyabazinga wa Buyudaaya, omulanzi Mika eyabanga e Moreshethi yakobera abantu ati Musengwa Katonda Afuga Amagye akoba ati, ‘Olusozi Sioni balirulima ng'oti nimiro; ekibuga Yerusalemu kirifuuka mmungo dha bifunfugu, n'olusozi lwonalwona oluliku eisinzizo lwafuuka kibira.’

Yeremia 26:6

Era bwemutaalekere agho kubanga badheemu, nja kukola eisinzizo lino kye nakola Shilo. Olwo amaghanga goonagoona ku nsi, gaidha kukozesanga eriina ery'ekibuga kino nga gakolima.”

Yeremia 27:7

Amaghanga goonagoona galimugheereza era gaagheereza ni mutabane we ni mwidhukulu we, okutuusa ekiseera bwe kirituuka eighanga lye ni ligwa. Olwo eighanga lye lyona lyafuuka mugheereza wa amaghanga kamaala ag'amaani, agafugibwa bakyabazinga abakologho.

Yeremia 29:10

“Musengwa Katonda akoba ati, ‘Emyaka ensanvu gye nagha Babilonia okubafugiramu bwe giriwaaku, imwe ndibooleka nga bwe mbalumirwa, naatuukiriza kye nasuubiza eky'okubaiza eka.

Yeremia 7:34

Mu bibuga bya Buyudaaya ni mu nguudo dha Yerusalemu, ndidha kulekeza emizira egy'abali mu binhumo ni mu kusagamba, ndekeze n'egy'abo abali mu mbaga edh'obugole kuba ensi eyo ya kufuuka bifulukwafulukwa omutaba bantu.”

Okulira 1:1

Ha, ekibuga ekyaidhulanga abantu kamaala, kyasigalira kweinhamira. Ekibuga ekyateebwangamu ekitiisa ensi yoonayoona, buti kiri ng'oti namwandu! Ekyalinga ng'oti ni muka omufuzi, buti kyafuuka ng'oti mukazi mwiru.

Ezekieli 29:11

Ezira kigere kya muntu waire kya nsolo ekiribita omwo. Ensi Misiri erisigala agho ng'eziramu muntu agibaamu okumala emyaka amakumi ana (40).

Danieli 9:3

Agho naakyukira eri Musengwa Katonda wange, naamusaba nga mweghemba, naasiiba, naavaala ekutiya, era naatyama mu ivu.

Mika 3:12

Kale ni ku lwaimwe, olusozi Sioni balirulima ng'oti nimiro, ekibuga kya Katonda Yerusalemu kyasigala agho nga mmungo ya bifunfugu n'olusozi lwonalwona oluliku eisinzizo lwafuuka kibira.

Zekaria 1:12

Agho malaika oyo yaakoba ati: “Wo Musengwa Katonda Afuga Amagye, oligemerwa li ekisa Yerusalemu n'ebibuga eby'omu Buyudaaya, by'osungughaliire emyaka gino ensanvu?”

Zekaria 7:5

“Kobera abantu boonaboona abali mu nsi eno, ni ba kabona, oti bwe baasiibanga ni baliranga maziga mu mwezi ogwokutaanu n'ogwomusanvu okumala emyaka egyo ensanvu, tibaabikolanga lwa kugheesa nze kitiisa.

Matayo 24:15

“Kale bwe mubonanga Ekyenhinhalwa Ekizikiriza, ekyayogerwaku Danieli omulanzi, nga kiri mu kifo ekitukuvu, asoma bino ategeere.

Mariko 13:14

“Aye bwe mulibona Ekyenhinhalwa Ekizikiriza nga kiri ghe kitagwaine kuba, olwo oyo asoma bino ategeeranga, era abali mu Buyudaaya balumukiranga mu nsozi.

Ebikolwa by'Abatume 8:34

Omulaawe yaakoba Filipo ati: “Nkobera, omulanzi ayogera ku ani? Yeeyogeraku mwene oba ayogera ku muntu wundi?”

1 Timotheo 4:13

Weemalire ku kusomeranga abantu Ebyaghandiikibwa, n'okubalambanga, n'okubeegeresa, okutuusa lwe ndiidha.

Okwolekebwa 1:3

Wa nkabi asomera abantu ebibono bino eby'obulanzi, era ba nkabi abo abawulira ebyaghandiikibwa bino ni babigema. Kuba ekiseera kiri kumpi.