Danieli 10:21 - Baibuli Ekibono kya Katonda 2014

²¹ Aye ndidha kukukobera ebyaghandiikibwa mu kitabo ekirimu eby'amazima. Ezira anhambaku kulwanisa bamalaika abo, okutoolaku Mikaeli, malaika oyo omukuumi w'ensi yaimwe Isiraeli.

Danieli 10:21 Iomraidhean Croise

Danieli 10:13

Malaika omukuumi w'obwakyabazinga bw'e Perusia yamala enaku amakumi abiri na lulala (21) nga tali kunganha kwidha, okutuusa Mikaeli owundi ku bamalaika abakulu bwe yaidha n'anhamba. Naamala naamulekayo eyo ng'ali ghalala ni bakyabazinga b'e Perusia.

Danieli 12:1

Malaika yaayongera okukoba ati: “Mu kiseera ekyo, Mikaeli, malaika oyo omukologho omukuumi w'abantu bo, aliboneka. Olwo ghalibaagho ekiseera ekizibu ekitabangaghooku kasookanga nsi dhibaagho. Era ekiseera ekyo bwe kirituuka, abantu bo abo beene maina agaliba nga gaaghandiikibwa mu kitabo kya Katonda, n'abalirokolebwa.

Danieli 12:4

Agho yankoba ati: “Mperaano ni, iwe Danieli, wumbaku ekitabo ekyo okisibeku n'akamanhiso, okutuusa ku kiseera eky'enkomerero. Abantu kamaala balizungira eno n'ere nga benda okwongera ku bumanhi bwaibwe.”

Danieli 8:26

Era okubonekerwa okugema ku misengo egigheebwayo enkyo n'eigulo kwe nkwinhonhoire, kwidha kutuukirira. Aye iwe kuuma ebiri mu kubonekerwa okwo nga bya kyama, kuba ghaidha kubitagho ekiseera kinene memale bituukirire.”

Danieli 9:22

Yaidha yankoba ati: “Danieli, ndidhie okukuyamba ofune amagezi otegeere.

Danieli 9:25

Agho ni kimanhe era okitegeere ng'okuva ku kiseera ekiragiro eky'okuzimba Yerusalemu obuyaaka lwe kirigheebwa, okutuuka ku kwidha kw'omukulembeze omulonde wa Katonda, ghaja kubitagho emyaka nsanvu emikuzi musanvu. Olwo ghabeegho emyaka nkaaga n'ebiri emikuzi musanvu, egy'okuzimbiramu Yerusalemu obuyaaka, n'enguudo dhaakyo, n'ekimante ekigumu okukyezunguluza. Aye ekiseera ekyo kiriba kya bizibu.

Amosi 3:7

Mu butuufu bwene, ghazira Musengwa Katonda ky'akola mu kyama nga takyoleike bagheereza be abalanzi.

Ebikolwa by'Abatume 15:15

Ekyo kiikirizagania bukalamu n'eby'abalanzi ebyaghandiikibwa biti,

Ebikolwa by'Abatume 15:18

Musengwa atyo bw'akoba eyakola ebintu bino ni bimanhibwa okuva eira n'eira.’

Yuda 1:9

Ate nga ni bw'aba Mikaeli omukulu wa bamalaika, tiyakola ekyo bwe yali ali kukaayana ni Sitaani, nga bakaayanira omulambo gwa Musa; tiyakana n'akozesa bibono bivuma ng'asalira Sitaani omusango, okutoolaku okumukoba ati: “Katonda akubonereze.”

Okwolekebwa 12:7

Agho obulwa bwatanukagho mu igulu. Mikaeli ni bamalaika be, baalwanisa ogusota. Ogusota gwona gwabalwanisa ni bamalaika baagwo.