Amosi 8:3 - Baibuli Ekibono kya Katonda 2014

³ Ku lunaku olwo, edhibairenga enhembo dhe bembera mu isinzizo, dhirifuuka maliro. Ghalibaagho emirambo kamaala inho, nga giri kusuulibwa buli ghantu mu kasirise.” Musengwa Katonda atyo bw'akoba.

Amosi 8:3 Iomraidhean Croise

Zabbuli 39:9

Ka nsirike, tiidha kwogera kibono kyonakyona, kuba okudaagadaaga kwange kuva y'oli.

Isaia 37:36

Agho obwire obwo, malaika wa Musengwa Katonda yaaja mu kifo Abassiria ghe baasimba weema dhaibwe, yaita abantu emitwalo ikumi na munaana n'enkumi itaanu (185,000). Abantu bwe baazuuka ku nkyo, baaja okulinga bati ng'abo boonaboona mirambo!

Yeremia 22:18

Kale ni, Musengwa Katonda bino by'akoba ebigema ku Yehoiakimu mutabane wa Yosia, era kyabazinga wa Buyudaaya: “Tibalimulirira mbu, ‘Wo muganda wange!’ Oba mbu, ‘Wo mwanhinaze!’ Tibaligegenga mbu, ‘Wo musengwa wange!’ Oba mbu, ‘Wo kyabazinga wange!’

Okulira 2:10

Abasaadha abakaire ab'omu kibuga Sioni batyama agho ku itaka baasiriikirira. Beeyugha enkungu mu mitwe nga beesibye ebikaakaati olw'enaku. N'abaghala baamu boona baakuba amakiryaivu agho ku itaka.

Yoeli 1:11

Imwe abalimi munakughale; imwe abalabirira emizabbibu muwowoole. Kuba engaano, ni Sayiri, n'ebindi byonabyona ebikungulwa bizikiriire.

Yoeli 1:13

Imwe bakabona muvaale ekutiya mulire enaku, muwowoole imwe abagheereza ku alutaari. Imwe abagheereza ba Katonda wange, mwingire mu isinzizo musule nga muvaire kutiya olw'okunakughala; kuba tighakaali bigheebwayo bya mere ya mpeke waire ebigheebwayo eby'okunhwa ebireetebwa mu isinzizo lya Katonda waimwe.

Yoeli 1:5

Imwe abatamiivu, muzuuke mulire amaziga; muwowoole imwe abanhwa omwenge; kuba emizabbibu mwe bakola omwenge ogubawoomera gizikiriziibwa!

Abalevi 10:3

Agho Musa yaakoba Aaroni ati: “Kino Musengwa Katonda kye yayogeraku bweyakoba ati, ‘Ndyeyoleka nga ndi mutukuvu mu abo abampeereza, era nnaasaakibwanga mu maiso g'abantu boonaboona.’ ” Aye Aaroni yaasirika busirike.

Amosi 4:10

“Era ninze eyabasindikira ebibamba okubagwaku, ng'ebyo ebyagwa ku Bamisiri. Naita abaisuka baimwe mu lutalo era abazigu baaja n'embalaasi dhaimwe. Era naidhuza enhindo dhaimwe ekivundu eky'emirambo woonawoona ghe mwasimba weema dhaimwe. Aye era mwaloba okwira ye ndi.

Amosi 5:16

Kale ni Musengwa Katonda Afuga Amagye kyava n'akoba ati: “Ghalibaagho okuwowoola mu mpya edh'ekibuga, ni mu nguudo dhaakyo dhoonadhoona, ng'abantu balira bati, ‘Woowe! Woowe!’ Abalimi ghalala n'abo abakola ogw'okugegenga, balyetebwa okukuba empungu n'okuwowoola.

Amosi 5:23

Mulekere agho okundhasiikanira mbu munhembera. Era tiidha kuwulirisa kuvuga kwa ntongooli dhaimwe.

Amosi 6:4

Mukagwireku imwe abalambaala mu buliri obw'amasanka, era mwegolomola mu miito, nga muli kulya emamba ye mutoire mu bisibo byaimwe eno ya ntaama, kabiri ere ya nte.

Amosi 6:5

Mwembera ku ntongooli enhembo edh'ekigayaavu, era mweyiiyiza beene ebivuga ng'oti ni Daudi bwe yakola.

Amosi 6:8

Musengwa Katonda afuga amagye, alayiire ati: “Neesiniirwa okwekuluntaza kw'Abaisiraeli, era endhu dhaibwe edhibeeyagaza tidhiinhoonha naire. Kye ndiva ni mpaayo ekibuga kyaibwe ekikulu n'ebikirimu byonabyona eri abazigu baibwe.”

Amosi 8:10

Era akoba ati: “Ndifuula ebibinuko byaimwe byaba mikolo gya kulira, n'enhembo dhaimwe dhaaba kugegenga. Ndibamwesaaku enviiri ku mitwe gyaimwe okudhimaliriraku ng'oti mpaata, naabaleetera okwesiba ebikaakaati mu nkende mwanakughala, mwaba ng'oti n'abazaire abafiiriirwa omwana waibwe omulenzi omulala bedengedenge. Olunaku olwo luliba lwa bulumi lwonalwona.

Nahumu 3:3

Ab'oku mbalaasi bali kulumba ng'empiima dhaibwe dhiri kumyansa era nga n'amafumo gaibwe gali kumirimiinha. Emirambo giri kugwa mmungo na mmungo, era abalwani bali kuja nga bagyekontolaku.

Zefania 1:7

Musiriikirire aghali Musengwa Katonda, kuba olunaku lwe luli kumpi kutuuka. Musengwa Katonda ategeike okughaayo abantu be basalibwe ng'oti musengo, era amaze n'okweta abageni abaja okukola omukolo ogwo.