1 Ebyomubyanda 22:5 - Baibuli Ekibono kya Katonda 2014

⁵ Daudi yaakoba mule ati: “Eisinzizo lye baja okuzimbira Musengwa Katonda ligwaine okuba nga lya kitiisa inho era nga limanhikaine mu nsi yoonayoona. Aye Solomoni aja okulizimba akaali mwana muto, azira bumanhirivu naire. Kyenva ndi n'okutaagho eby'okulizimbisa.” Kale Daudi yaataagho eby'okuzimbisa kamaala inho ng'akaali kufa.

1 Ebyomubyanda 22:5 Iomraidhean Croise

1 Bakyabazinga 3:7

Wo Musengwa Katonda wange, iwe buti onfiire nze omugheereza wo, mbe kyabazinga mu kifo kya lata wange Daudi, waire nga ndi mwana muto. Nzira kye ndidhi naire.

1 Bakyabazinga 9:8

Eisinzizo lino lirifuuka mmungo ya bimunku, era kiisi baliribitangaku balitengeesanga bwa mitwe beewuunhia. Era balibuuzanga bati, ‘Lwaki Musengwa Katonda yakola atyo ensi eno n'eisinzizo lino?’

1 Ebyomubyanda 29:1

Agho kyabazinga Daudi yaakoba abaali beesoloiza ati: “Mutabane wange Solomoni Katonda y'alonzeemu akaali mwana muto, ate nga omulimo oguli n'okukolebwa mukologho inho kuba kino ti kisaagaati kya bwakyabazinga bwa bantu buntu, aye isinzizo lya Musengwa Katonda.

2 Ebyomubyanda 13:7

Abantu abazira kye bagasa baidha beeyimba naye, baanhooma Rehoboamu mutabane wa Solomoni era baamweyawulaku, alobe kuba kyabazinga waibwe. Rehoboamu oyo yali akaali muto, ng'azira bumanhirivu obumusobozesa okubalobera okukola ekyo.

2 Ebyomubyanda 2:4

Bona, ndi kutegeka okuzimbira Musengwa Katonda wange eisinzizo, okumugheesa ekitiisa. Ndidha kughaayo eisinzizo eryo libe lya Musengwa Katonda oyo olw'okumuniokezangamu obubbaani obuwunha akawoowo, n'okumuteerangamu emigaati egigheereibwayo y'ali, n'okumugheerangamu ebigheebwayo eby'enkyo n'eigulo ebya buli lunaku, n'eby'oku Sabbato, n'eby'oku mbaga edh'Ebibinuko eby'Okuboneka kw'Omwezi, n'eby'oku mbaga edh'ebibinuko ebindi ebyateebwagho, nga Musengwa Katonda waife oyo bwe yalagira Abaisiraeli okukolanga olubeerera.

2 Ebyomubyanda 2:5

Era eisinzizo lye nja okuzimba lija kuba ikologho, kuba Katonda waife mukologho okusinga bakatonda boonaboona.

2 Ebyomubyanda 2:8

Mpeereza emiti emivule, n'emisipuressi, n'emyalumugi, okuva mu Lebanoni, kuba ndidhi ng'abantu bo bwe baidhi einho okutema emiti eyo mu Lebanoni. Era abantu bange baidha kukolera ghalala n'ababo,

2 Ebyomubyanda 7:21

Eisinzizo lino mpegaano lya kitiisa inho, aye mu biseera ebyo buli abaliribitangaku balyewuunhianga. Era balibuuzanga bati, ‘Lwaki Musengwa Katonda yakola atyo ensi eno n'eisinzizo lino?’

Ezera 3:12

Aye bangi ku bakabona, n'Abalevi, n'abakulu ab'enda dha baiseibwe, abaali abakulu mu myaka nga n'abaabona ku isinzizo eryasooka, bwe baabona omusingi ogwo nga guli kuteebwagho, baawowoola amaziga. Aye abandi abaali agho, baakuba emizira olw'eisanhu.

Ensambo 4:3

Bwe nali nkaali n'abazaire bange nga ndi muto mwene era nga ninze omwana waibwe omulala ati,

Omulangirizi 9:10

Buli mulimo gw'okola gukolenga na maani, kuba eyo e magombe y'olija ezira kukola oba okubaayo okulowooza, era ezira kumanha waire okubaayo amagezi.

Isaia 64:11

Eisinzizo lyo eitukuvu eriboneka obulungi, badhaadha baife mwe baakusaakiranga, lyayokebwa omuliro. N'ebifo byaife byonabyona ebisanhusa, byafuuka bifulukwafulukwa.

Ezekieli 7:20

Ebyamadholobera byaibwe ebyabonekanga obulungi era nga bibeeyagaza, baabigheesaamu bwa bifaananie ebyenhinhalwa ebiziramu muganhulo naire. Kale ni, Musengwa Katonda kyaviire n'abireetera okubafuukira ebitali birongoofu.

Haggai 2:3

“Naani ku imwe abakaasigairegho, eyabona eisinzizo lino mu kitiisa kyalyo ekyasooka? Mperaano libabonekera litya? Liteekwa kuba nga lyaweeramu irala ekitiisa!

Haggai 2:9

Eisinzizo eiyaaka liriba lya kitiisa okusinga lire eryasooka. Era mu eryo mwe ndireetera abantu bange ebintu okubajiiranga obukalamu nga bali mu miraala. Nze Musengwa Katonda Afuga Amagye, ninze nkobye.”

Luka 21:5

Abantu bwe baali boogera ku isinzizo engeri ye lyazimbibwamu n'amabaale ag'omughendo agaboneka obulungi, n'ebirabo abantu bye baagha, yaabakoba ati:

Yoanne 13:1

Mperaano Ekibinuko eky'Okubitizibwa kyali kiri kumpi okutuuka. Yesu yamanha ng'esaawa ye ey'okuva mu nsi okwirayo ye Ise yoona yali etuuse. Bwe yagonza ababe abaali mu nsi yabagonza okutuukiza irala ku nkomerero.

Yoanne 3:30

Oyo ali n'okweyongera okuja ghaigulu nze ndhike ghansi.”

Yoanne 9:4

Tuteekwa okukola eby'oyo eyantuma nga bukaali musana, kuba obwire buli kwidha nga ghazira aghanga kukola.