Yohanes 3:16 - Jaji ma Su-sungi

¹⁶ Ma Jou'ongu Madutu 'o dadalara manusia toma dungia ma tero so'o ne: Unanga ro 'utusu 'Ai Ngowa'a Nau'u pa'i matengo, la 'a guna ḇato 'o ngaku 'Ai Ngowa'a Nau'u gena-ge, 'o iranga ua kasingado-ngadolo i'a, mada'a 'o sanga 'ahu kasingado-ngadolo i'a.

Yohanes 3:16 Iomraidhean Croise

Matias 9:13

So'o gena ḏi'i, Ngoi to sapolo ua di'a 'aro'o ngowa'a loasa re banari mada'a to sapolo di'a 'aro'o ngowa'a baraḏosa. Dadi ngini ni disa waro toma Boku 'Ofi-'Ofi ma dara bu-bula'a nena-ne ma ngale: ‘Ngoi to mau ngowa'a 'aḏi sijumu manga 'akala re sinyingara ma la-la toma ngowa'a lelegu, awa pa'i 'aḏi pula'a jou-jou haiwani ra Ngoi!’ ”

Markus 12:6

'A guna moju guḏa ma dutu 'o siḏingoto? Ḏuga-ḏuga soi'i tala 'ai ngowa'a nau'u masiretene, ga'a 'a dadalara. Dadi, unanga 'o siḏingoto 'ai ngowa'a nau'u gena-ge 'o tagi toma ngowa-ngowa'a munara toma guḏa gena-ge. Unanga 'o fikiri so'o ne: ‘Tantu ḏua ngowa-ngowa'a munara toma guḏa, ananga 'aḏi silamo'o 'ai ngowa'a nau'u.’

Lukas 2:14

“Puji re silamo'o Ma Jou'ongu Madutu toma soroga, re dame toma dungia toma manusia ga'a Ma Jou'ongu Madutu ya'u sanangi.”

Yohanes 1:14

'Idini gena-ge ri dadi manusia, re Unanga 'o tegoro tananga sigolona re wa oḏi'i ḏua 'Ai kabasarana. Kabasarana gena-ge ma 'asala ra Ma Jou'ongu Madutu sababu Unanga 'Ai Ngowa'a Nau'u pa'i matengo. Sababu Unanga, ngene wa basono tala Ma Jou'ongu Madutu 'ai mura re dadalara masala ra ngene, re Unanga 'o sijumu ma ba-banari mangale Ma Jou'ongu Madutu ra ngene.

Yohanes 1:18

Matengo i'a mai nyangu ro oḏi'i Ma Jou'ongu Madutu, mada'a pa'i 'Ai Ngowa'a Nau'u matengo, ga'a 'O marimoi rai Ḇaḇa. Unanga gena-ge ra sibaiti re Ra sitarangi mangale Ma Jou'ongu Madutu ra ngene.

Yohanes 1:29

Ma ḇiḇini ino Yohanes 'o oḏi'i 'a Yesus 'o sapolo ra unanga. Ḏua Yohanes 'o kanau, “Oḏi'i Unanga nena-ne Ma Jou'ongu Madutu 'ai Doba ma Ngowa, ga'a 'O singi-ngiranga manusia manga ḏosa!

Yohanes 10:28

Ngoi to pula'a 'ahu kasingado-ngadolo i'a ra ananga, re kasingado-ngadolo i'a ananga kama binasa ua. Ananga Tari giama ma sata re matengo i'a mai ua nga'unu 'u ra-rabasa.

Yohanes 3:15

la ngowa'a mo-moini ga'a 'aḏi ngaku Unanga, 'aḏi sanga 'ahu kasingado-ngadolo i'a.”

Yohanes 3:18

'A guna ḇato 'o ngaku Ma Jou'ongu Madutu 'ai Ngowa'a Nau'u, Ma Jou'ongu Madutu ḏuanga i'a 'u sihukumu ua. Mada'a 'a guna ḇato 'o ngaku ua Ma Jou'ongu Madutu 'ai Ngowa'a Nau'u, unanga pa'i totoma ḇato di'a Ma Jou'ongu Madutu 'u sihukumu, sababu unanga gena-ge 'o ngaku ua Ma Jou'ongu Madutu 'ai Ngowa'a Nau'u, pa'i matengo.

Yohanes 3:36

'A guna ga'a ngaku Ma Jou'ongu Madutu 'ai Ngowa'a Nau'u, unanga 'o sanga 'ahu kasingado-ngadolo i'a. Mada'a 'a guna ga'a 'o ngaku ua, unanga 'o sanga ua 'ahu kasingado-ngadolo i'a, mada'a ḏuanga i'a 'o sanga hukumu kasingado-ngadolo i'a.

Yohanes 6:40

Nena-ne 'Ari Ḇaḇa 'ai mau: ngowa'a mo-moini ga'a oḏi'i Ngoi, Manusia ma Ngowa'a Nau'u, re 'aḏi ngaku Ngoi, ananga gena-ge 'aḏi sanga 'ahu kasingado-ngadolo i'a, re toma Kiamata ma Wangere, Ngoi dadunu ta'u si'ahu moju ananga gena-ge.”

Roma 5:10

Sababu na'o wakutu ngene Ma Jou'ongu Madutu 'ai lawana, Unanga 'o sirimoi ngene ra Unanga sababu 'Ai Ngowa'a Nau'u 'ai se-sengene; tantu ḏua toma 'orasa nange-ne, wakutu ngene rewo marimoi ra Ma Jou'ongu Madutu, Kristus ḏuanga i'a 'o sisalamata ngene sababu Unanga dadunu 'o 'ahu moju!

Roma 5:8

Mada'a Ma Jou'ongu Madutu masiretene 'a sijumu 'Ai dadalara madutu ra ngene so'o ne: Wakutu ngene wo 'ahu toma ḏosa moju, Kristus 'o sengene di'a ngene!

Roma 8:32

'Ai Ngowa'a Nau'u masiretene Unanga 'a sidoa'a toma ngowa'a ma jira, la ananga 'U sisengene di'a sisalamata ngene mo-moini ga'a ngowa'a baraḏosa. Dadi, tantu ḏua Unanga 'o pula'a 'oru ḇato ga'a ngene wo paralu!

Efesus 2:4

Mada'a sababu Ma Jou'ongu Madutu 'o dadalara ngene lai lamo'o, Unanga 'a sijumu 'Ai 'akala re sinyingara ma la-la lai lamo'o ra ngene.

2 Tesalonika 2:16

Ma Jou'ongu Madutu nanga Ḇaḇa 'o dadalara ngene re mete'e 'Ai mura re dadalara, Unanga na si'a'a ngene nanga 'akala namo-namoto re dadi site'e nanga ngo-nganono. Sababu gena-ge, ngoi to golo'o Ma Jou'ongu Madutu nanga Ḇaḇa re nanga Jou Yesus Kristus masiretene 'o babata ngini re site'e ninga 'akala re sinyingara, la ngini nga'unu ni si'a'a re ni sihabari 'ori i'a la-la.

Titus 3:4

Mada'a Ma Jou'ongu Madutu, nanga Salamata ma Cimi, 'a sijumu 'Ai dadalara re 'Ai la-la ra ngene,

'Ibrani 2:9

Mada'a ngene wo oḏi'i Yesus: Ma Jou'ongu Madutu 'o sidadi mala'ekata pa'i lebe la-lamo'o ceka'a i'a ḇato reo Unanga wakutu 'O 'ahu toma dungia nena-ne. Mada'a 'orasa nange-ne, ngene wo oḏi'i Unanga ro sanga ḏe-ḏegoro lebe kau'u ga'a 'i mulia re Ma Jou'ongu Madutu 'U silamo'o sa'olo 'olana. Sababu Unanga 'a basono sangisara ḏua singadolo sengene di'a manusia mo-moini, gena-ge mete'e Ma Jou'ongu Madutu 'ai mura re dadalara.

1 Yohanes 3:1

Ngene mode-mode'e wo heranga ma duhu sa'olo Ma Jou'ongu Madutu na dadalara ngene: Ngene nena-ne, Unanga 'o si'aro'o 'Ai ngowa-ngowa'a! Re mode-mode'e ngene Ma Jou'ongu Madutu 'ai ngowa-ngowa'a! Ngowa'a ga'a ngaku Yesus ua 'aḏi mangaku ua ngene sa'olo Ma Jou'ongu Madutu 'ai ngowa-ngowa'a, sababu ananga gena-ge 'aḏi nana'o Ma Jou'ongu Madutu ua.

1 Yohanes 4:19

Ngene nyengara wo dadalara, sababu Ma Jou'ongu Madutu lebe siḏa na dadalara ngene.

Tingoýi 1:5

Yesus Kristus gena-ge Sakisi ma cufala re Unanga ma mulaingi dadunu 'O 'ahu moju toma ngowa'a senge-sengene manga sigolona, ma tero sa'olo ngowa'a nau'u ma jomolo. Re Unanga 'o dadi 'Olana ma Sae'e toma 'olana-'olana mo-moini toma dungia nena-ne. Yesus gena-ge 'o dadalara ngene re Unanga 'o sengene, la ngene sanga bebasa tananga ḏosa-ḏosa.