Yohanes 21:16 - Jaji ma Su-sungi

¹⁶ Yesus 'o sano ma soi ḏiḏi ra unanga gena-ge, “Simon, Yohanes 'ai ngowa'a nau'u, ngana no dadalara Ngoi mode-mode'e?” Unanga 'a sangoro, “Ya Ma Jou reno waro mangale ngoi to dadalara Ma Jou.” Yesus 'o kanau, “Na kadiarata 'Ari doba-doba.”

Yohanes 21:16 Iomraidhean Croise

Matias 2:6

‘Hei ngowa'a Betlehem toma daeraha Yehuda. Kalaha ngini ninga gamu ga'a 'i ceka'a, ḏuanga i'a 'i dadi gamu ma lamo'o, sababu taninga sigolona ie baolo pareta ma bi-biri'i ga'a sibi-biri'i 'Ari 'umata Israel.’ ”

Matias 25:32

Bangsa mo-moini toma dungia ma dara 'aḏi malomu ra Ngoi 'ari biono. Ḏua Ngoi ta'u siwo-wola ngowa-ngowa'a gena-ge dadi balangu romoḏiḏi, ma tero sa'olo sowohi siwo-wola doba reo 'abingi.

Matias 26:72

Ḏua Petrus 'o masoloto moju re 'o masisasi, “Mode-mode'e, ngoi to nana'o ngowa'a gena-ge ua!”

Lukas 19:10

Ngoi, Manusia ma Ngowa'a Nau'u to sapolo di'a To disa re To sisalamata ngowa'a ga'a 'aḏi iranga ngo'omo.”

Yohanes 18:17

We-were'a ngalana ma ja-jaga mo sano i'a ra Petrus, “Hei ngana ḏi'i Unanga nena-ne 'Ai me-mete'e?” Petrus 'a sangoro, “Ngoi ua.”

Yohanes 18:25

Simon Petrus 'o made-de'oso 'o marasu'u moju toma ngi'i gena-ge, 'age ngowa-ngowa'a 'aḏi sano, “ 'Oru ngana nena-ne ḏi'i Yesus 'ai me-mete'e?” Mada'a Petrus 'o masoloto, “Ngoi ua!”

Yohanes 21:17

Yesus 'o sano ma soi ro'ange ra unanga gena-ge, “Simon, Yohanes 'ai ngowa'a nau'u, ngana no dadalara Ngoi mode-mode'e?” Petrus 'ai 'akala re sinyingara 'i kangela sababu Yesus 'o sano soi ro'ange, na'o unanga 'o dadalara Yesus mode-mode'e. Petrus dadunu 'o sangoro, “Ma Jou reno waro 'ori i'a mo-moini, Ma Jou rena waro mangale ngoi to dadalara Ma Jou.” Yesus 'o kanau, “Na kadiarata 'Ari doba-doba.”

Yesus 'ai so-soma'a 20:28

Ngini balasu ni ma'istiari ninga 'ahu ma dara re ni sioḏi'i ngowa'a ngaku Yesus mo-moini ga'a Ma Ngagara 'Ofi-'Ofi 'i siwatasa re 'i sitede ngini ni dadi jama'ata ma bi-biri'i. Ngini balasu ni sioḏi'i ngowa-ngowa'a ngaku Yesus sa'olo sowohi 'o jaga 'ai doba sababu jama'ata-jama'ata gena-ge ananga 'aḏi dadi Ma Jou'ongu Madutu 'ai 'umata sababu Ma Jou 'ai se-sengene.

'Ibrani 13:20

Ngoi to manyiata ra Ma Jou'ongu Madutu, Unanga 'o dame ma cimi ga'a dadunu 'o si'ahu moju Ma Jou Yesus. Unanga gena-ge ro dadi ngene nanga Sowohi La-lamo'o re ngene wo dadi 'Ai doba-doba sababu Tai se-sengene. Re ḏi'i Tai se-sengene gena-ge si'aku sah Ma Jou'ongu Madutu 'ai jaji ga'a kasingado-ngadolo i'a di'a ngene.

1 Petrus 2:25

Ma siḏa ninga 'ahu ma tero sa'olo doba 'i iranga. Mada'a nange-ne ngini sanga siḏibo di'a mete'e Unanga gena-ge ninga Sowohi ga'a 'O sioḏi'i ninga nyawa.

1 Petrus 5:2

Ngoi to golo'o mode-mode'e ra ngini, ni jaga la-la jama'ata ga'a Ma Jou'ongu Madutu 'o siwatasa ra ngini, ma tero sa'olo sowohi 'aḏi jaga la-la manga doba-doba. Munara gena-ge awa ni 'a'a rema pakisa, mada'a reninga 'akala re sinyingara sa-sanangi. Sababu Ma Jou'ongu Madutu 'o mau ngini ni 'a'a so'o gena. Awa ngini ni 'a'a sababu 'age rema karana. Siḏibo ḏi'i, sababu ngini nyafusu masala ni riono ananga.

Tingoýi 7:17

Sababu Doba ma Ngowa gena-ge ga'a 'o tegoro sebanga ra Ma 'Olana 'ai ḏe-ḏegoro 'o dadi ananga manga sowohi. Unanga ḏuanga i'a ya'u sigasa toma ḇanyo 'ahu ma utu'u. Re Ma Jou'ongu Madutu 'a singi-ngiranga manga la'o ma 'ongoro mo-moini.”