Yohanes 10:10 - Jaji ma Su-sungi

¹⁰ To-tori'i 'aḏi sapolo pa'i 'aḏi tori'i, 'aḏi sisengene re 'aḏi singiranga ḇato. Mada'a Ngoi nena-ne to sapolo, la manusia nyengara 'aḏi sanga 'ahu ga'a 'i romanga reo Ma Jou'ongu Madutu 'ai barakati.

Yohanes 10:10 Iomraidhean Croise

Matias 18:10

“Awa si'u'ua ngowa'a ma pake ua ga'a raḏi ngaku Ngoi, ananga gena-ge ma tero sa'olo ngowa 'olo nena-ne. Sababu Ngoi to siajele ra ngini nena-ne: Mala'ekata-mala'ekata ga'a 'aḏi jaga ngowa 'olo gena-ge, 'age tau-taunu toma soroga ra Ma Jou'ongu Madutu 'ai momina. [

Matias 18:11

Sababu Ngoi, Manusia ma Ngowa'a Nau'u, to sapolo, di'a sisalamata ngowa-ngowa'a ga'a kiḏanga ra Ma Jou'ongu Madutu ma tero sa'olo doba-doba ga'a 'i iranga.]

Matias 20:28

So'o gena-ge ḏi'i ma tero sa'olo Ngoi, Manusia ma Ngowa'a Nau'u. Ngoi to sapolo di'a ngowa-ngowa'a 'aḏi de-de'oso Ngoi ua. Mada'a Ngoi to sapolo di'a To de-de'oso ngowa-ngowa'a, re Ta sidoa'a 'Ari 'ahu di'a To tuusu ngowa'a repe tamanga ḏosa.”

Matias 21:13

Ḏua Unanga 'o kanau i'a ra ananga, “Toma Boku 'Ofi-'Ofi 'i silefo mangale Ma Jou'ongu Madutu 'o kanau so'o ne: ‘ 'Ari wala ngowa'a ḏuanga i'a ya silomanga manyiata ma wala.’ Mada'a ngini ni si'a'a ngowa'a to-tori'i manga ngi'i!”

Matias 23:13

“Bahala ra ngini guru-guru 'agama re ngowa-ngowa'a Farisi! Ngini, ngowa'a munafiki! Ngini ni simaha ua ngowa'a 'aḏi osama nyo-nyoimi toma Soroga ma Pareta. Ngini masiretene ni oḏu'u osama nyo-nyoimi toma Soroga ma Pareta, re ni dola'aku ngowa'a lelegu ga'a mau osama nyo-nyoimi toma Soroga ma Pareta. [

Markus 11:17

Gena ḏua, Yesus 'o doto'o ngowa-ngowa'a toma ngi'i gena-ge re 'o kanau, “Ra Ma Jou'ongu Madutu 'ai Boku ma dara, 'i silefo ḏua Ma iḏingi so'o ne: ‘ 'Ari Wala gena-ge, bangsa mo-moini ya silomanga manga manyiata ma wala.’ Mada'a ngini ni si'a'a ngowa'a to-tori'i manga ngi'i!”

Lukas 19:10

Ngoi, Manusia ma Ngowa'a Nau'u to sapolo di'a To disa re To sisalamata ngowa'a ga'a 'aḏi iranga ngo'omo.”

Yohanes 10:1

“Ni ngaku mode-mode'e 'Ari demo-demo nena-ne: Ngowa'a matengo ga'a 'o osama toma doba ma karunga 'a mete'e ma ngalana ua, mada'a 'o pere mete'e ngo'omo lelegu; unanga gena-ge ngowa'a to-tori'i re ngowa'a ra-rabasa.

Yohanes 10:11

Ngoi nena-ne Sowohi ma La-La. Sowohi ma La-La sidoa'a 'ai 'ahu di'a sisalamata doba-doba.

Yohanes 12:47

Ngowa'a ga'a 'aḏi 'isene 'Ari do-doto'o mada'a ya siḏagi ua tamanga 'ahu ma dara, Ngoi masiretene ua ta'u sihukumu. Sababu Ngoi to sapolo di'a to sihukumu ua manusia toma dungia nena-ne, mada'a di'a sisalamata ananga.

Yohanes 12:6

Yudas 'o kanau so'o gena sababu unanga ngowa'a to-tori'i re soi rai o'o i'a unanga 'o tori'i pipisi toma kas, ga'a unanga 'a gu'u. Unanga 'o sioḏi'i ua ngowa'a ma dinga'unu ua!

Yohanes 3:17

Sababu Ma Jou'ongu Madutu 'o 'utusu 'Ai Ngowa'a Nau'u di'a sihukumu ua manusia toma dungia nena-ne, mada'a di'a sisalamata ananga gena-ge.

Yohanes 5:40

Mada'a ngini masiretene ni oḏu'u sapolo ra Ngoi, la ni sanga 'ahu kasingado-ngadolo i'a.

Yohanes 6:33

Sababu roti ga'a Ma Jou'ongu Madutu 'a pula'a, gena-ge Ngoi nena-ne, ga'a To 'uci da'u soroga tala re To pula'a 'ahu kasingado-ngadolo i'a toma manusia.”

Yohanes 6:51

Ngoi nena-ne roti 'ahu ga'a 'i 'uci da'u soroga tala. Na'o 'a guna ḇato oromo roti gena-ge, ḏuanga i'a 'o 'ahu kasingado-ngadolo i'a. Roti gena-ge 'Ari lese ga'a ḏuanga i'a ta sidoa'a, la manusia nyengara sanga 'ahu.”

Roma 2:21

Dadi, ngini ga'a ni doto'o ngowa'a lelegu, i'a sa'olo ni doto'o ua ninga diri masiretene?! Ngini ni doto'o ngowa'a lelegu: Tori-tori'i awa; mada'a ngini masiretene ni tori-tori'i!

1 Timotius 1:15

'Age demo ma betongo so'o ne: “Kristus Yesus 'o sapolo toma dungia di'a 'O sisalamata ngowa-ngowa'a baraḏosa.” Demo gena-ge 'i tero re balasu wa dawongo re wa ngaku mode-mode'e. Ngoi masiretene 'ari ḏosa lai lamo'o toma ngowa'a baraḏosa mo-moini.

'Ibrani 6:17

Ma Jou'ongu Madutu mau 'A site'e 'Ai jaji toma ngowa'a ga'a ḏuanga i'a 'aḏi sanga 'Ai jaji, la ananga gena-ge 'aḏi waro mode-mode'e Unanga 'a singali 'ai jaji ua. Sababu gena-ge Unanga 'o jaji re 'O tede sasi.

'Ibrani 7:25

Sababu gena-ge, Yesus nyengara 'o sisalamata kasingado-ngadolo i'a ngowa'a mo-moini ga'a 'aḏi sapolo ra Ma Jou'ongu Madutu. Gena-ge 'i dadi sababu ananga gena-ge 'aḏi ngaku Yesus sa'olo manga 'imam, re sababu ḏi'i Unanga 'o 'ahu kasingado-ngadolo i'a 'o manyiata ra Ma Jou'ongu Madutu di'a ananga.

2 Petrus 1:11

Ḏua Ma Jou'ongu Madutu ḏuanga i'a 'o dawongo ngini rai hormati wakutu ni osama ra Ma Jou Yesus Kristus 'ai Pareta kasingado-ngadolo i'a, Unanga ga'a nanga Salamata ma Cimi.