Yohanes 10:1 - Jaji ma Su-sungi

¹ “Ni ngaku mode-mode'e 'Ari demo-demo nena-ne: Ngowa'a matengo ga'a 'o osama toma doba ma karunga 'a mete'e ma ngalana ua, mada'a 'o pere mete'e ngo'omo lelegu; unanga gena-ge ngowa'a to-tori'i re ngowa'a ra-rabasa.

Yohanes 10:1 Iomraidhean Croise

Matias 7:15

“Ni ma'istiari toma nabi-nabi sa-sakala. Ananga 'aḏi sapolo ra ngini ma tero sa'olo doba. Mada'a ma ba-banari ananga manga maksudu 'i sijira ninga ngo-ngaku ma tero sa'olo serigala ga'a 'i oro-oromo ngowa'a.

Yohanes 10:7

Sababu gena-ge, Yesus 'o kanau soi moi moju, “Ni ngaku mode-mode'e 'Ari demo-demo nena-ne: Ngoi nena-ne karunga ma ngalana di'a doba-doba.

Yohanes 3:3

Yesus 'a sangoro, “No ngaku mode-mode'e 'Ari demo-demo nena-ne: Na'o ngowa'a matengo i'a dadunu sibuoro ua, unanga 'o osama nyo-nyoimi yoḏu'u ra Ma Jou'ongu Madutu 'ai Pareta.”

Roma 10:15

Re ma ngo'omo sa'olo ananga nyengara singadolo mangale Ma Jou, na'o ngowa'a sanga 'utusu nyangu? Toma Boku 'Ofi-'Ofi ma dara 'i silefo so'o ne: “Ma rousu mura ua rema ngowa'a ga'a sapolo sigasa Habari Roanga ra Ma Jou'ongu Madutu tala!”

Roma 16:18

Sababu ngowa'a ga'a 'aḏi 'a'a so'o gena-ge ananga 'aḏi munara ua di'a nanga Jou Kristus, mada'a di'a sisanangi ḇato ananga manga 'akala re sinyingara ma mau masiretene. Ananga gena-ge 'aḏi baja re 'aḏi kanau rema demo-demo lai rousu madutu di'a sihaga ngowa'a ga'a waro 'oru rimoi ua.

Titus 1:11

Ngowa'a so'o gena-ge pa'i simaha awa ananga 'aḏi doto'o, sababu pa'i sihaga ngowa'a repe manga ngitu re ngale remanga do-doto'o 'i banari ua, singadolo ngitu re ngale 'aḏi mete'e Yesus riwara. Ananga ya si'a'a so'o gena, sababu pa'i disa 'utungu mada'a gena-ge 'i patasa ua.

'Ibrani 5:4

Matengo i'a mai ua ga'a sitede unanga masiretene 'o dadi 'imam 'agung. Matengo i'a 'o dadi 'imam 'agung, pa'i na'o Ma Jou'ongu Madutu 'u 'aro'o ḇato; ma tero sa'olo 'a Harun.

1 Petrus 1:10

Mangale salamata gena-ge. Nabi-nabi raḏi lefo pasala ḏua mangale cocatu gena-ge ga'a Ma Jou'ongu Madutu ḏuanga i'a 'o pula'a ra ngini. Ananga gena-ge 'aḏi madoto'o mode-mode'e di'a disa waro mo-moini mangale salamata gena-ge, la ya sahe.

2 Petrus 2:1

Mada'a 'ua re 'au wali moju, nabi-nabi sa-sakala ri waiti toma ngowa-ngowa'a Israel manga sigolona. So'o gena ḏi'i, guru-guru sa-sakala ḏuanga i'a 'aḏi waiti masigogoro taninga sigolona. Ananga 'aḏi singosama manga do-doto'o ma banari ua, singadolo ngowa'a 'aḏi ngaku 'a Kristus riwara. Guru-guru sa-sakala gena-ge raḏi mangaku riwara Ma Jou, ga'a 'Ai kuasa ma pari cua re 'O tuusu ananga. Manga ga'a so'o gena, dadi ananga manga diri masiretene lai caiti sigasa toma sengene kasingado-ngadolo i'a.

2 Petrus 2:3

Guru-guru sa-sakala gena-ge 'aḏi nyafusu pipisi lai repe. Dadi ananga 'aḏi disa 'utungu madiga'a carita masiretene ra ngini. Ma di'ara ḏua Ma Jou'ongu Madutu ro sidodahe hukumu di'a ananga re ma 'orasa ri co-cori ḏua, wakutu Unanga ya'u singeta'a sengene kasingado-ngadolo i'a ra ananga.

1 Yohanes 4:1

Ioronongoḏu ngo-ngaku rimoi ga'a ngoi tunu dadalara, awa ngini cautu i'a ni ngaku ngowa'a ga'a 'aḏi aje remanga Roh ra Ma Jou'ongu Madutu tala. Mada'a ngini siḏa-siḏa ni disa waro, roh gena-ge ma 'asala ra Ma Jou'ongu Madutu tala, bolo ua. Sababu nange-ne nabi-nabi sa-sakala manga repe toma dungia sitabi donga.