Yakobus 1:9 - Jaji ma Su-sungi

⁹ Ngini, ngowa'a ngaku Yesus ga'a ma dinga'unu ua, awa ninga 'akala re sinyingara ce-ceka'a. Siḏibo ḏi'i, ngini balasu ni maroanga, sababu Ma Jou'ongu Madutu sitede ngini sa'olo 'Ai ngowa-ngowa'a.

Yakobus 1:9 Iomraidhean Croise

Lukas 1:52

Unanga 'o siguci 'olana-'olana tamanga ḏe-ḏegoro mada'a ngowa-ngowa'a ga'a 'aḏi maholo Unanga ya'u sikau'u.

Lukas 10:20

Kalaha so'o gena, awa pa'i ngini ni maroanga ḇato sababu ni nga'unu dusu'u roh-roh ma jira. Jobilaha ngini ni maroanga sababu ninga lomanga 'i silefo ḏua da'u toma soroga.”

Lukas 14:11

Sababu 'a guna ḇato 'o sihie 'ai diri, unanga gena-ge ḏuanga i'a Ma Jou'ongu Madutu 'u siholo. Mada'a 'a guna ḇato 'o maholo 'ai diri, unanga gena-ge ḏuanga i'a Ma Jou'ongu Madutu 'u sihie.”

Lukas 9:48

Ḏua 'o kanau i'a Tai me-mete'e, “ 'A guna 'o dawongo ngowa 'olo matengo ma tero sa'olo ngowa 'olo nena-ne sababu unanga 'o mete'e Ngoi, unanga gena-ge ro dawongo Ngoi ḏi'i. Re 'a guna 'o dawongo Ngoi, 'o dawongo Ma Jou'ongu Madutu ga'a 'o 'utusu Ngoi. Sababu 'a guna ga'a 'o maholo taninga sigolona, unanga gena-ge 'o dadi ngowa'a lebe la-lamo'o.”

Roma 8:17

Re sababu ngene Unanga 'ai ngowa-ngowa'a, tantu ḏua ḏuanga i'a ngene wo sanga warisi ga'a Unanga 'o sidodahe di'a 'Ai ngowa-ngowa'a. Re ngene ḏuanga i'a sanga warisi gena-ge mamete'e ra Kristus. Sababu toma dungia nena-ne ngene wo sanga sikisa ma tero sa'olo Kristus, dadi ḏuanga i'a ngene wo sanga 'Ai mulia ma balangu ḏi'i.

2 Korintus 6:10

Kalaha ananga ya sikangela minga 'akala re sinyingara, ngomi reminga roanga! Ngowa'a 'aḏi ta'ajiri ngomi sa'olo ngowa'a ma dinga'unu ua, mada'a re mi si'a'a ngowa'a repe raḏi dadi ngowa'a rema-enanga sababu 'aḏi dawongo Habari Roanga. Ngowa'a 'aḏi oḏi'i ngomi kaminga 'ori i'a ua, mada'a 'ori i'a mo-moini ta ngomi, sababu Kristus.

Filipi 3:14

Sababu gena-ge, ngoi to lalara turusu ta meta-meta i'a 'ari maksudu, la ta sanga ngogele. Gena-ge ma ngale: 'Ahu toma soroga, di'a gena-ge Ma Jou'ongu Madutu ri 'aro'o ngoi di'a to marimoi ra Kristus Yesus.

Filipi 3:3

Momongolo ua, ngene nena-ne ga'a sanga ḏua suna 'i banari ga'a rewo dadi mode-mode'e Ma Jou'ongu Madutu 'ai ngowa-ngowa'a sababu rewo ngaku Kristus Yesus. Ngene nena-ne ga'a Ma Ngagara 'Ofi-'Ofi na sinyanyasele wakutu wo silamo'o re siḏubuso Ma Jou'ongu Madutu. Re ḏi'i ngene sibere ie nanga murasa ma la sababu ngene nanga 'ahu marimoi ra Kristus Yesus. Ngene nena-ne ga'a wo sigare ua nanga ngo-nganono mete'e 'agama ma 'atoranga di'a sisalamata ngene.

1 Petrus 2:9

Mada'a ngini ngowa-ngowa'a ga'a Ma Jou'ongu Madutu renu siwola i'a, re ngini ni dadi ma tero sa'olo 'Ai 'imam-'imam di'a munara ra Unanga sa'olo ninga 'Olana. Re ḏi'i, ngini ni dadi bangsa 'ofi-'ofi, re Unanga masiretene 'ai 'umata. Unanga 'o 'a'a so'o gena-ge, la ngini ni sihabari mangale 'Ai ga'a lai rousu. Unanga gena-ge ga'a 'O 'aro'o sisupu ngini toma hafu-hafu re 'O singosama ngini Tai tarangi ma dara ga'a ma pari cua.

Tingoýi 2:9

Ngoi ta waro ḏua ngini ninga 'ahu kangela. Ngoi ta waro ngini ngowa'a ma dinga'unu ua, mada'a ma banari ngini ngowa'a rema-enanga. Ngoi to waro 'age rema ngowa'a Yahudi 'aḏi jajaha demo ra ngini, ananga gena-ge mode-mode'e ua ngowa'a Yahudi tamanga 'akala re sinyingara, mada'a 'o 'Iblisi ma me-mete'e.