Yakobus 1:12 - Jaji ma Su-sungi

¹² Bara'utungu ngowa'a ga'a manga ngo-ngaku elala ua na'o sanga bo-baja toma 'Iblisi. Sababu wakutu bo-baja ma 'orasa ri togumu, ḏuanga i'a ya sanga 'ahu kasingado-ngadolo i'a sa'olo ngogele rimoi ga'a Ma Jou'ongu Madutu 'o sijaji pasala ḏua di'a ngowa-ngowa'a ga'a 'aḏi dadalara Unanga.

Yakobus 1:12 Iomraidhean Croise

Matias 10:22

Ngowa'a mo-moini ḏuanga i'a 'aḏi emono ngini, sababu ngini Ngoi 'ari me-mete'e. Mada'a ngowa'a ga'a 'aḏi cako'o namo-namoto tamanga ngo-ngaku ra Ngoi singadolo ma ḏo-ḏogumu, ḏuanga i'a 'aḏi sanga salamata.

Matias 25:34

Togumu i'a, Ngoi 'Olana gena-ge, to kanau toma ngowa-ngowa'a Tari giama ma kuwiḏa, ‘Ino, ngini mo-moini ga'a 'Ari Ḇaḇa renu sibarakati. Ni osama toma Soroga ma Pareta ga'a Ngoi ta sidodahe ḏua di'a ngini wakutu dungia 'i dadi nyangu.

Lukas 6:22

Bara'utungu ngini, na'o ngowa'a 'aḏi emono ngini, 'aḏi dawongo ngini ua, sipake-pake ngini ua, re 'aḏi sikanau ngini, sababu ngini ni mete'e Ngoi, Manusia ma Ngowa'a Nau'u.

Roma 5:4

Re na'o ngene wo tahana ma tero gena-ge Ma Jou'ongu Madutu 'o 'akoru ngene nanga de'oso re ḏegoro. Sidogo ḏi'i, ngene nanga ngo-nganono ganapu te'e ra Unanga, sababu ngene wo waro Unanga na 'akoru.

Roma 8:28

Re ngene wa waro mangale mo-moini ga'a Ma Jou'ongu Madutu 'o 'aturu di'a ngene nanga la-la. Ngene gena-ge ga'a dadalara Unanga, re Unanga na 'aro'o mete'e Unanga 'ai 'akala ma mau.

1 Korintus 2:9

Siḏibo ḏi'i, gena-ge 'i dadi ma tero sa'olo silefo toma Boku 'Ofi-'Ofi ma dara: “ 'Oru ga'a manusia 'aḏi oḏi'i re ya 'isene nyangu re 'i osama toma manusia manga 'akala nyangu, gena-ge Ma Jou'ongu Madutu ra sidodahe di'a ngowa'a ga'a 'aḏi dadalara Unanga.”

1 Korintus 8:3

Mada'a na'o 'a guna ḇato 'o dadalara Ma Jou'ongu Madutu, unanga gena-ge Ma Jou'ongu Madutu 'u nana'o.

1 Korintus 9:25

'A guna ḇato na'o 'o mau mete'e tandingi, ngowa'a gena-ge balasu 'o manahana 'ai diri toma 'ori i'a mo-moini. Unanga 'o 'a'a so'o gena-ge sababu, kalaha lastari saya-saya ti'ara ua 'i wa'alo, unanga 'o nyafusu sanga lastari saya-saya siteru tai sae'e. Mada'a ngene wo manahana diri toma 'ori i'a mo-moini, sababu ngene wo nyafusu nanga sae'e 'i siteru lastari saya-saya gena-ge kama wa'alo ua nena-ne re si'a.

2 Timotius 2:15

Ngana balasu no makutale mode-mode'e, la no dadi guru ga'a no doto'o la-la do-doto'o banari ra Ma Jou'ongu Madutu ino. Na'o 'a'a so'o gena, ḏuanga i'a ngana no mara'a ua re 'ani do-doto'o 'i sisanangi Ma Jou'ongu Madutu 'ai 'akala re sinyingara.

2 Timotius 4:8

'Orasa nange-ne, ngoi pa'i ta totoma ma ngogele ḇato ga'a Ma Jou'ongu Madutu ro gogono ḏua toma soroga di'a ngoi. Toma Kiamata ma Wangere, Ma Jou 'o dadi juruhakimi 'adili, ḏuanga i'a 'O sipula'a 'ari ngogele gena-ge, sababu ngoi 'ari 'ahu 'i mete'e Ma Jou'ongu Madutu 'ai 'akala ma mau. Pa'i ngoi ḇato ua mada'a ngowa'a mo-moini ga'a 'aḏi dadalara re 'aḏi totoma Ma Jou dadunu 'o sapolo moju.

'Ibrani 10:32

Mada'a 'eli-'elingi 'orasa toma ḏuḏunu ioronongoḏu ngo-ngaku rimoi, wakutu ngini ni ngaku Habari Roanga ma mulaingi, ga'a ma tero sa'olo Ma Jou'ongu Madutu 'ai cahaya Nu'u 'erese ḏua. Ngini tantu ni basono sangisara ma repe, mada'a ni macako'o namo-namoto moju taninga ngo-ngaku.

'Ibrani 11:17

Sababu Abraham 'ai ngo-ngaku, unanga gena-ge 'o ḏu-ḏuanga ḏua di'a sidoa'a 'a Isak sa'olo 'ai jou-jou wakutu sanga tai'i ra Ma Jou'ongu Madutu. Kalaha Unanga ro sijaji ra Abraham so'o ne: “Pa'i 'ani ngowa'a nau'u matengo ḇato Isak unanga ḏuanga i'a sanga ju'uda ma repe,” Abraham 'o ḏu-ḏuanga ḏua di'a sidoa'a Isak sa'olo jou-jou.

'Ibrani 12:5

Re ni sidaioranga ḏua Ma Jou'ongu Madutu 'ai demo nena-ne ga'a 'i pula'a de-de'e ra ngini sababu ngini 'Ai ngowa-ngowa'a nau'u: “ 'Ari ngowa'a nau'u na totoho la-la ino Ma Jou'ongu Madutu 'ai do-doto'o, re awa 'ani 'akala re sinyingara 'i rapo'o na'o Tini ḇangata.

'Ibrani 6:15

Abraham 'a totoma rai 'akala ḇanyo di'a jaji gena-ge, singadolo unanga 'a sanga.”

Yakobus 2:5

'Ari ioronongoḏu ngo-ngaku rimoi ga'a ngoi tini dadalara. 'Elingi, ngowa'a ma dinga'unu ua toma dungia, Ma Jou'ongu Madutu ya'u cumutu dadi ngowa'a rema-enanga toma ngo-ngaku ma dara. Ngowa'a gena-ge, ḏuanga i'a 'aḏi sanga bara'utungu ra Ma Jou'ongu Madutu 'ai Pareta ma tero sa'olo 'O sijaji pasala ḏua ra guna ḇato 'aḏi dadalara Unanga.

Yakobus 5:11

Mode-mode'e ngene wo waro ḏua bara'utungu 'a guna ḇato ga'a manga ngo-ngaku kama elala ua singadolo 'aḏi sengene. Ngini ni 'isene ḏua mangale Ayub 'o pake 'akala ḇanyo, re na waro ḏi'i Ma Jou'ongu Madutu togumu i'a 'o sibarakati Ayub, sababu Ma Jou'ongu Madutu 'ai 'akala re sinyingara 'i romanga reo dadalara re ḏi'i Unanga 'o sijumu 'Ai 'akala re sinyingara ma la-la.

1 Petrus 3:14

Mada'a na'o ngini ni sanga sangisara sababu ni 'a'a 'ori i'a ma la-la, Ma Jou'ongu Madutu 'o sibarakati ngini. Ngini ni mojongo awa 'a guna ḇato re ni dodato awa 'oru ḇato.

1 Petrus 4:13

Siḏibo ḏi'i, jobilaha ngini ni dawongo reninga roanga, sababu ngini sanga sangisara ḏi'i ma tero Yesus sanga sangisara. Kalaha so'o gena nange-ne, ḏuanga i'a toma 'orasa ngowa-ngowa'a ya oḏi'i simulia Unanga, ngini lebe maroanga.

1 Petrus 4:14

Na'o ngowa'a 'aḏi je-jengere ngini sababu ni mete'e Kristus, ngini ni bara'utungu. Enanga gena-ge 'i dadi nana'o rimoi mangale Ma Jou'ongu Madutu 'ai Ngagara 'Ofi-'Ofi ga'a mulia, enanga 'age 'i tegoro ra ngini.

1 Petrus 5:10

Ti'ara ua, ngini ni basono ma sangisara. Togumu i'a Ma Jou'ongu Madutu 'o sitiai ngini moju: Unanga gena-ge masiretene 'O site'e ninga ngo-ngaku, la ninga ngo-ngaku kama elala ua, mada'a ni nga'unu tahana toma 'oru ḇato. Unanga 'o 'a'a so'o gena-ge, sababu Unanga romanga mura re dadalara re Ro 'aro'o ngini di'a ni sanga balangu Tai kabasarana kama ḏo-ḏogumu ua, sababu ni marimoi ra Kristus.

1 Petrus 5:4

Wakutu ḏuanga i'a Sowohi ma Sae'e Unanga 'o sapolo, Unanga 'o pula'a lastari ra ngini. Lastari gena-ge 'i jama-jamanga kama iranga ua, nange-ne re si'a.

1 Yohanes 4:19

Ngene nyengara wo dadalara, sababu Ma Jou'ongu Madutu lebe siḏa na dadalara ngene.

Tingoýi 2:10

Ni mojongo awa, na'o ti'ara riwara ni sanga susa re sangisara. Ngoi to siajele ra ngini, mamuni'a ḏuanga i'a 'Iblisi singosama ngini toma bui di'a ni sanga tai'i. Re ngini gena-ge ḏuanga i'a sanga sikisa ma di'ara wangere nyagi moi. Mada'a ngini balasu ni macako'o namo-namoto ra Ngoi singadolo ni sengene, kara Ngoi to pula'a 'ahu kasingado-ngadolo i'a ra ngini sa'olo ngogele rimoi.

Tingoýi 3:19

Ngowa-ngowa'a ga'a Ngoi nena-ne ta'u dadalara, ananga gena-ge Ngoi ta'u ḇangata re Ta'u sihukumu di'a Ta'u doto'o. Sababu gena-ge, ngini balasu sibabata ninga dadalara ra Ngoi, re ni maḏibo toma ngo'omo boloto.

Tingoýi 3:21

'A guna ḇato 'ai ngo-ngaku ra Ngoi kama elala ua singadolo 'o sengene, Ngoi ta'u pula'a ma 'olana 'ai ḏe-ḏegoro Tari 'Olana 'ai ḏe-ḏegoro ma kaci moi i'a. So'o gena-ge ḏi'i, nange-ne Ngoi to tegoro toma 'Olana 'ai ḏe-ḏegoro Tari Ḇaḇa ma 'Olana 'ai ḏe-ḏegoro tai kuwiḏa, sababu Ngoi masiretene ḏi'i 'Ari ngo-ngaku ra Unanga kama elala ua singadolo To sengene.