Lukas 19:47 - Jaji ma Su-sungi

⁴⁷ Wange moi-wange moi Yesus 'o doto'o ngowa'a ra Ma Jou'ongu Madutu 'ai Wala. Mada'a 'imam-'imam ma sae'e, guru-guru 'agama, re Yahudi manga bi-biri'i, ananga 'aḏi mau sisengene Unanga.

Lukas 19:47 Iomraidhean Croise

Matias 21:23

Gena ḏua, Yesus dadunu 'o maḏibo re 'o osama ra Ma Jou'ongu Madutu 'ai Wala ma soana, di'a 'O doto'o. Wakutu Unanga 'o doto'o ngowa'a moju, 'imam-'imam ma sae'e re Yahudi manga bi-biri'i 'aḏi sapolo ra Unanga re 'aḏi sano, “No sanga 'Ani kuasa le'a ino, singadolo Ngana no 'a'a mo-moini gena-ge? Re 'a guna 'o pula'a kuasa ra Ngana?”

Matias 26:55

Toma 'orasa gena-ge, Yesus 'o kanau toma ngowa'a kawasa gena-ge, “I'a sa'olo ngini ni sapolo re ninga samaranga re bu-butulu di'a ni cako'o ngoi ma tero sa'olo ngowa'a ma jira?! Ma wangere ma jelele i'a, Ngoi to tegoro di'a to doto'o ra Ma Jou'ongu Madutu 'ai Wala, mada'a ngini rini cako'o Ngoi ua!

Markus 11:18

Wakutu 'imam-'imam ma sae'e re guru-guru 'agama ya 'isene Yesus 'o kanau so'o gena, ananga mulaingi 'aḏi disa ngo'omo mau sisengene Unanga. Ananga manga 'akala re sinyingara 'i go-goḏi, sababu ngowa'a mo-moini 'aḏi nyanyaḏi masala ya 'isene 'Ai do-doto'o.

Markus 12:12

Wakutu 'o Yahudi manga bi-biri'i ya 'isene 'ade-'ade gena-ge, ananga 'aḏi disa ngo'omo 'u cako'o Unanga. Sababu ananga ya waro 'ade-'ade gena-ge Yesus simeta-meta ra ananga (ananga ma tero sa'olo ngowa-ngowa'a munara toma guḏa re tukanga-tukanga 'a'a wala ya upa'a maḏi). Mada'a ananga 'aḏi mojongo ngowa'a repe. Dadi ananga 'aḏi tagi sisoi'i tala Yesus.

Markus 14:1

Wange ḏiḏi moju 'o Paskah ma Wangere re Roti Kama Ragi Ua ma wangere 'i ngadolo, 'imam-'imam ma sae'e re guru-guru 'agama ananga 'aḏi disa ngo'omo, la 'aḏi cako'o Yesus sigo-gogoro re 'u sengene Unanga.

Markus 14:49

Ma wangere ma jelele i'a, ngoi to osama ra Ma Jou'ongu Madutu 'ai Wala re to pula'a do-doto'o taninga biono, mada'a ngini rini cako'o Ngoi ua. Mada'a balasu so'o nena-ne ḏua, la 'i mete'e 'oru 'i silefo pasala ḏua toma Boku 'Ofi-'Ofi.”

Lukas 19:48

Mada'a ananga ya sanga ma donga ua, sababu ngowa'a repe ya 'isene 'Ai do-doto'o tau-taunu remanga 'akala re sinyingara ya daene.

Lukas 20:19

Guru-guru 'agama re 'imam-'imam ma sae'e ya waro 'ade-'ade gena-ge Yesus 'o kanau mangale ananga. Sababu gena-ge, ananga 'aḏi disa ngo'omo, la cako'o 'a Yesus toma 'orasa gena-ge ḏua, mada'a 'aḏi mojongo ngowa'a kawasa.

Yohanes 10:39

Wakutu ananga 'aḏi isene gena-ge, ananga dadunu 'aḏi makutale moju cako'o 'a Yesus, mada'a 'aḏi nga'unu ua.

Yohanes 18:20

Yesus 'o sangoro, “Ngoi to kanau toma mandan. Ngoi to doto'o tau-taunu toma wala-wala puji re ra Ma Jou'ongu Madutu 'ai Wala ma soana, ngi'i ngowa'a Yahudi 'aḏi malomu, soi moi nyangu Ngoi to kanau 'ori i'a Ta go-gogono.

Yohanes 7:19

'A Musa ro pula'a Ma Jou'ongu Madutu 'ai hukumu ra ngini. Mada'a taninga sigolona matengo i'a mai ua ya mete'e hukumu gena-ge. I'a sa'olo ngini mau ni sisengene Ngoi?”

Yohanes 7:44

Mamuni'a mau 'aḏi cako'o Unanga, mada'a matengo i'a mai ua 'aḏi gare giama ra Unanga.