Lukas 16:15 - Jaji ma Su-sungi

¹⁵ Mada'a Yesus 'o kanau ra ananga, “Ngini nena-ne ni matuhu ngowa'a loasa re banari toma mandan. Mada'a Ma Jou'ongu Madutu 'a waro ninga 'akala re sinyingara. Sababu 'ori i'a ga'a manusia 'aḏi nyafusu, Ma Jou'ongu Madutu 'a emono.

Lukas 16:15 Iomraidhean Croise

Matias 23:5

'Oru ḇato ga'a ananga ya si'a'a, enanga gena-ge di'a pa'i ngowa'a ya oḏi'i ḇato: Ananga 'aḏi mapake gumi ma nyiata ma ro-roata tamanga sae'e re giama re 'aḏi mapake juba ma renge-renge lai ki-kiḏanga.

Matias 6:16

“Wakutu ngini ni puasa, awa ninga biono ḇuta, ma tero sa'olo ngowa'a munafiki! Ananga gena-ge ya tuhu manga biono wa'alo, la ngowa'a ya waro ananga 'aḏi puasa kara ya'u puji re silamo'o ananga. Ni ngaku mode-mode'e 'Ari demo-demo nena-ne: Ananga gena-ge manga ngogele rema enanga ḏua! Tantu ḏua Ma Jou'ongu Madutu nu puji re silamo'o ua!

Matias 6:2

Sababu gena-ge na'o ngini ni pula'a ninga bu-bula'a toma ngowa'a ma dinga'unu ua, awa na si ie tala-ie tala toma ngowa'a lelegu ma tero sa'olo ngowa'a munafiki. Ananga 'aḏi nyanyaḏi ya si'a'a toma wala puji ma dara re toma ngo'omo lamo'o, la ngowa'a ya'u sihie-hie. Ni ngaku mode-mode'e 'Ari demo-demo nena-ne: Ananga gena-ge manga ngogele rema enanga ḏua! Tantu ḏua Ma Jou'ongu Madutu nu puji re silamo'o ua!

Matias 6:5

Re wakutu ngini ni manyiata, awa ni dadi sa'olo ngowa'a munafiki! Wakutu ananga gena-ge 'aḏi manyiata 'aḏi nyanyaḏi made-de'oso toma wala-wala puji re toma ngo'omo ma sola, la ngowa'a ya'u oḏi'i kara ya'u puji re silamo'o ananga. Ni ngaku mode-mode'e 'Ari demo-demo nena-ne: Ananga gena-ge manga ngogele rema enanga ḏua! Tantu ḏua Ma Jou'ongu Madutu nu puji re silamo'o ua!

Lukas 10:29

Mada'a guru 'agama gena-ge 'o oḏu'u awa-awa ngowa'a 'aḏi aje unanga 'o haga, dadi unanga 'o sano ra Yesus, “Ngoi 'ari ioronongoḏu gena-ge 'a guna ga'a ngoi balasu to dadalara ma tero sa'olo to dadalara 'ari diri masiretene?”

Lukas 11:39

Dadi Ma Jou 'o kanau ra unanga, “Ngini ngowa'a Farisi, ninga moku re ninga suḏe ma ḏuḏunu na soso'o 'i 'ofi madutu. Mada'a taninga 'akala re sinyingara ma dara 'i romanga reo 'ori i'a ma faja re ni nyafusu ngowa'a manga 'ori i'a rana.

Lukas 18:11

Ngowa'a Farisi gena-ge 'o te'oso kara 'o manyiata mangale 'ai diri masiretene, ‘Ya Ma Jou'ongu Madutu ngoi to pula'a murasa ma la, sababu ngoi to ma tero ua ngowa'a lelegu: ngowa'a ga'a tori'i, 'akala re sinyingara 'i boloto ua, tinikai bolo ma tero sa'olo ngowa'a golo-golo'o balastengi nena-ne.

Lukas 18:14

Yesus 'o kanau, “Ngoi to siajele ra ngini nena-ne: Wakutu ananga 'aḏi sisoi'i tala Ma Jou'ongu Madutu 'ai Wala, pa'i ngowa'a golo-golo'o balastengi ḇato Ma Jou'ongu Madutu 'o dawongo sa'olo ngowa'a loasa re banari. Sababu 'a guna ḇato 'o sihie 'ai diri, unanga Ma Jou'ongu Madutu ḏuanga i'a 'u siholo. Re 'a guna ḇato 'o maholo 'ai diri, unanga Ma Jou'ongu Madutu ḏuanga i'a 'u sihie.”

Lukas 18:21

Ngowa'a Yahudi gena-ge 'o sangoro, “Parenta mo-moini gena-ge ngoi ta si'a'a ḏua wakutu ngoi to ngowa 'olo i'a moju singadolo 'orasa nange-ne.”

Lukas 18:9

Yesus 'a sijarita ḏi'i 'ade-'ade nena-ne di'a ngowa'a ga'a 'aḏi si'aḏu-'aḏu ngowa'a lelegu, re 'aḏi matoro manga diri aje ananga ngowa'a loasa re banari.

Lukas 20:20

Dadi 'aḏi disa donga gasa 'i rousu i'a. Ananga 'aḏi siḏingoto mata-mata ga'a 'aḏi masa-sakala matuhu ma tero sa'olo ngowa'a la-la di'a disa Yesus 'ai sala, la ananga 'aḏi sitalaḏi Yesus ra gubernur Pilatus.

Lukas 20:47

Ananga 'aḏi sihaga balo-balo, re ya'u ra-rabasa ananga manga 'ori i'a rana tamanga wala ma dara. Re ananga 'aḏi manyiata lai kiḏa-kiḏanga di'a ya damunu manga kajahatana. Sababu gena-ge, Ma Jou'ongu Madutu ḏuanga i'a 'o sihukumu lai tubuso madutu ra ananga!”

Yohanes 2:25

Unanga 'o paralu ua duga re domolo mangale manusia manga de'oso re ḏegoro, sababu Unanga masiretene ra waro 'oru ga'a 'age toma manusia manga 'akala re sinyingara ma dara.

Yohanes 21:17

Yesus 'o sano ma soi ro'ange ra unanga gena-ge, “Simon, Yohanes 'ai ngowa'a nau'u, ngana no dadalara Ngoi mode-mode'e?” Petrus 'ai 'akala re sinyingara 'i kangela sababu Yesus 'o sano soi ro'ange, na'o unanga 'o dadalara Yesus mode-mode'e. Petrus dadunu 'o sangoro, “Ma Jou reno waro 'ori i'a mo-moini, Ma Jou rena waro mangale ngoi to dadalara Ma Jou.” Yesus 'o kanau, “Na kadiarata 'Ari doba-doba.”

Yesus 'ai so-soma'a 1:18

(Yudas gena-ge ro sanga tana'a reo bo-bangu. Unanga sanga bo-bangu gena-ge sababu 'o dadi sae'e di'a ngowa-ngowa'a ga'a 'aḏi cako'o 'a Yesus. Toma tana'a gena-ge, unanga 'o masisengene kara 'o eta'a re 'ai po'olo 'i pici singadolo 'ai ga-gale mai otiti simoini.

Yesus 'ai so-soma'a 1:24

Ḏua ananga 'aḏi manyiata 'aḏi golo'o, “Ma Jou, Ma Jou na waro ngowa'a mo-moini manga 'akala re sinyingara, 'a Yudas, Yesus 'ai soma'a, ro eta'a tai ḏe-ḏegoro re ro sengene, kara osama toma naraka. Dadi No sijumu ra ngomi ra ananga nga muḏiḏi nena-ne No cumutu 'a guna di'a 'a dowanga 'a Yudas 'ai munara sa'olo Yesus 'ai so-soma'a.”

Yesus 'ai so-soma'a 15:8

Ma Jou'ongu Madutu ga'a 'A waro manusia manga 'akala re sinyingara, Unanga 'o pula'a Ma Ngagara 'Ofi-'Ofi toma ngowa-ngowa'a Yahudi ua 'i ma tero sa'olo ra ngene ḏi'i. Gena-ge 'i dadi nana'o rimoi mangale Ma Jou'ongu Madutu ya'u dawongo ananga ḏi'i.

Roma 3:20

Sababu gena-ge, matengo i'a mai ua nga'unu 'o dadi loasa re banari ra Ma Jou'ongu Madutu 'ai momina sababu unanga ra mete'e Musa 'ai hukumu. Siḏibo ḏi'i, Musa 'ai hukumu pa'i sijumu ḇato ra ngene mangale ngene ngowa'a baraḏosa.

Roma 8:27

Dadi Ma Jou'ongu Madutu ga'a 'o waro manusia nanga 'akala re sinyingara ma dara, Unanga ḏi'i 'o sahe Ma Ngagara 'Ofi-'Ofi ma mau sababu Enanga gena-ge 'i golo'o ra Ma Jou'ongu Madutu di'a 'Ai 'umata re go-golo'o gena-ge mete'e Unanga 'ai mau.

1 Korintus 4:5

Sababu gena-ge ma wakutu ngadolo nyangu, awa ngini cautu i'a ni sijuruhakimi matengo i'a unanga rai sala bolo ua, mada'a totoma ḇato singadolo Ma Jou dadunu 'O sapolo moju. Unanga gena-ge ḏuanga i'a 'a welanga rahasia mo-moini ga'a nange-ne 'i go-gogono toma hafu-hafu ma dara moju. Unanga ḏi'i 'a sisupu manusia manga 'ulungu tamanga 'akala ma dara. Toma 'orasa gena-ge ḏi'i, Ma Jou'ongu Madutu ḏuanga i'a 'o sitoro ngowa'a mo-moini 'i mete'e manga munara ra Unanga.

1 Petrus 3:4

Mada'a ngini balasu ni sijumu ninga jamani mode-mode'e taninga nau'u reni sidodai ninga 'akala re sinyingara mereoso re kama 'oro mangale ua ga'a 'i baolo taninga 'akala re sinyingara ma dara. Jamani gena-ge kasingado-ngadolo i'a, re lai hali madutu ra Ma Jou'ongu Madutu 'ai momina.

1 Petrus 5:5

So'o gena ḏi'i, ngini ngowa'a tubaie-tubaie ngini balasu ni ta'aloko ngowa'a ga'a raḏi 'umuru i'a. Ioronongoḏu ngo-ngaku rimoi mo-moini, ngini balasu ma'u riono i'a re ino, reninga 'akala re sinyingara maholo tala. Sababu toma Boku 'Ofi-'Ofi 'i silefo so'o ne: “Ma Jou'ongu Madutu 'o lawana ngowa'a ga'a 'o matoro, mada'a unanga ga'a 'o siholo 'ai 'akala re sinyingara, Ma Jou'ongu Madutu 'u pula'a 'Ai mura re dadalara.”

Tingoýi 2:23

Sidogo ḏi'i, ngo Izebel 'ami me-mete'e ga'a ma tero sa'olo 'ami ngowa'a, Ngoi ḏuanga i'a Ta'u sisengene, la Ngoi 'ari 'umata mo-moini ya waro mangale Ngoi nena-ne nga'unu to du-dumunu ngowa'a manga 'akala re sinyingara. Re Ngoi ḏuanga i'a to balasa mete'e ngini ni maḏiga'a masiretene.