Lukas 12:5 - Jaji ma Su-sungi

⁵ Dadi Ngoi to siajele ra ngini ra guna ngini balasu ni mojongo: Pa'i ni mojongo Ma Jou'ongu Madutu ḇato! Sababu Unanga rai kuasa 'o upa'a ngini toma naraka na'o ni sengene pasala i'a! Mode-mode'e ngoi to kanau ra ngini, Unanga gena-ge balasu nu mojongo.

Lukas 12:5 Iomraidhean Croise

Matias 10:28

Awa ni mojongo manusia. Sababu ananga pa'i 'aḏi sisengene ninga lese, mada'a manga kuasa 'i cua di'a sihukumu ngini toma naraka. Momongolo ua Ma Jou'ongu Madutu, Unanga rai kuasa, 'O sisengene ninga lese re 'O sihukumu ngini toma naraka. Sababu gena-ge, mojongo pa'i Ma Jou'ongu Madutu ḇato.

Matias 25:41

Gena ḏua, Ngoi 'Olana gena-ge to kanau toma ngowa-ngowa'a Tari kuḇali, ‘Ngini ngowa'a ma jira, ni tagi. Ni osama toma u'u ma lejanga ga'a kama sora-sora ua ga'a sidodahe ḏua di'a 'Iblisi re enanga ma mala'ekata-mala'ekata!

Matias 25:46

Ḏua ngowa'a gena-ge ga'a Tari kuḇali, ananga 'aḏi tagi toma ngi'i di'a sanga hukumu kasingado-ngadolo i'a. Mada'a ngowa'a loasa re banari ga'a Tari kuwiḏa, ananga gena-ge 'aḏi tagi toma ngi'i lelegu di'a sanga 'ahu kasingado-ngadolo i'a.”

Matias 5:22

Mada'a Ngoi to siajele ra ngini nena-ne: 'A guna ḇato 'o ruta toma ngowa'a lelegu, unanga gena-ge ḏuanga i'a 'o sanga hukumu. Re 'a guna ḇato ga'a do-doana ngowa'a lelegu, unanga ḏuanga i'a sitalaḏi toma Mahkamah 'Agama. Mada'a 'a guna ḇato ga'a si'aro'o ‘Haga’ toma ngowa'a lelegu, unanga gena-ge ḏuanga i'a sanga upa'a toma naraka ma dara.

Markus 13:23

Dadi balasu ni ma'istiari mo-moini Ngoi to siajele ḏua ra ngini, mada'a gena-ge 'i dadi nyangu.”

1 Tesalonika 4:6

Toma dara ma tero so'o gena-ge, awa ngini ni 'a'a sala bolo ni sihaga taninga ioronongoḏu ngo-ngaku rimoi. 'Au wali, ngomi mi sipo-poma ḏua ra ngini sababu na'o ni 'a'a so'o gena, Ma Jou'ongu Madutu nu sihukumu.

'Ibrani 10:31

Sababu gena-ge, na'o ngene wo sangaja wo 'a'a ḏosa tau-taunu, ngene balasu 'o basono mojongo madutu, sababu ngene ḏuanga i'a wo sanga hukumu ra Ma Jou'ongu Madutu ga'a 'O 'ahu kasingado-ngadolo i'a!

2 Petrus 2:4

'Ua re 'au wali moju Ma Jou'ongu Madutu 'o singi-ngiranga ua 'Ai hukumu di'a mala'ekata-mala'ekata, wakutu ananga 'aḏi 'a'a ḏosa. Mada'a ya'u siupa'a ananga toma naraka ma dara re ya'u sigae ananga toma aḏu'u ga'a lai hafu. Toma ngi'i gena-ge ananga 'aḏi totoma singadolo ma wangere 'i ngadolo, wakutu Ma Jou'ongu Madutu 'o sijuruhakimi ngowa-ngowa'a.

Tingoýi 14:7

Mala'ekata gena-ge 'o kanau rai iḏingi siduga-duga: “Ni mojongo Ma Jou'ongu Madutu re ni puji re silamo'o 'Ai kabasarana, sababu ma 'orasa ri ngadolo di'a Ma Jou'ongu Madutu 'o sijuruhakimi manusia. Ni silamo'o re siḏubuso Unanga ga'a 'o sidadi 'ori i'a mo-moini: diwanga, tana'a, ngoloto re 'o ḇanyo ma utu'u mo-moini!”

Tingoýi 15:4

'A guna 'o mojongo ua Ma Jou'ongu Madutu?! 'A guna 'o oḏu'u siajele 'Ani kabasarana, Ma Jou'ongu Madutu?! Pa'i Ma Jou'ongu Madutu masiretene ḇato no 'Ofi-'Ofi. Bangsa mo-moini ḏuanga i'a 'aḏi sapolo re 'aḏi silamo'o re siḏubuso Ma Jou'ongu Madutu, sababu ngowa'a repe raḏi oḏi'i 'Ani munara loasa re banari.”

Tingoýi 20:14

Gena ḏua, Maut re Maut ma pareta 'i siupa'a toma ngoloto u'u ma dara. (Ngoloto u'u gena-ge ma ngale: sengene ma soi ḏiḏi.)