Lukas 11:36 - Jaji ma Su-sungi

³⁶ Na'o ninga lese rimoi mo-moini 'i tarangi re ceka'a i'a mai ua 'i hafu-hafu, ḏua ninga lese rimoi mo-moini 'i romanga reo tarangi, ma tero sa'olo lapuru ma tarangi ya 'erese.”

Lukas 11:36 Iomraidhean Croise

Matias 13:52

Dadi Yesus 'o kanau, “Sababu gena-ge, guru 'agama mo-moini ga'a raḏi sahe do-doto'o mangale Soroga ma Pareta ma tero sa'olo wala ma dutu ga'a sisupu harata su-sungi re ma siḏa tai harata ma ngi'i.”

Matias 5:15

Re matengo i'a mai ua tagala 'o poci, kara 'a sidamunu reo tampayanga! Siḏibo ḏi'i, 'a sigare toma poci ma ngi'i, la 'i sitarangi ngowa'a mo-moini toma wala ma dara.

Lukas 11:35

Sababu gena-ge, balasu ni ma'istiari, awa-awa ninga tarangi 'i dadi hafu-hafu.

Lukas 11:37

Yesus 'o doto'o togumu i'a, 'age rema ngowa'a Farisi matengo 'o saele 'a Yesus oromo ra unanga 'ai wala. Ḏua Yesus 'o tagi oromo.

2 Korintus 4:6

Sababu Ma Jou'ongu Madutu ga'a 'o kanau, “Toma hafu-hafu, balasu 'i waiti tarangi,” Unanga gena-ge ro sigare 'Ai tarangi tananga 'akala re sinyingara ma dara. Ma Jou'ongu Madutu ro si'a'a so'o gena-ge, la ngene nyengara wa sahe Unanga 'ai mulia. Unanga 'ai mulia gena-ge 'i ma tero sa'olo ma tarangi ga'a wa oḏi'i ra Kristus 'ai biono. Dadi Unanga 'a siwaiti Ma Jou'ongu Madutu 'ai mulia ra ngene.

Efesus 4:14

Dadi ngene sa'olo ngowa 'olo riwara: Ngowa'a sa-sakala 'aḏi sihaga ngene yoḏu'u re ḏi'i ngene wo ngaku ua do-doto'o sa-sakala. Dadi ngene ma tero ua sa'olo kapala ga'a 'i tagi i'a ino, wakutu sanga baoso bolo karawiana lai siḏi.

Kolose 3:16

Ngini balasu ni 'elingi tau-taunu Kristus 'ai do-doto'o, la 'i parenta taninga de'oso re ḏegoro, demo re ganau. Dadi ngini ni mete'e ma duhu so'o ne: Ni ma'u doto'o, ni ma'u si'elingi di'a mete'e 'Ai do-doto'o reninga 'akala soro'unu. Re ni mete'e ma duhu so'o ne ḏi'i: Ni manyanyi Mazmur, puji-pujiana re manyanyi nyanyi ma lelegu. Re wakutu ngini manyanyi, ni sibere ie murasa ma la ra Ma Jou'ongu Madutu.

'Ibrani 5:14

Ngo-ngoromo ga'a te-te'e gena-ge di'a ngowa'a bi-biri'i sababu ananga remanga wo-waro ḏua di'a ya siwo-wola de'oso re ḏegoro ma la-la re ma jira.

Yakobus 1:25

Ma Jou'ongu Madutu 'ai hukumu enanga ti-tiai, rema de-de'e rema kuasa nyengara sibebasa ngowa'a toma 'Iblisi ma pareta. Dadi na'o matengo i'a awa pa'i 'isene ḇato re togumu i'a sidaioranga Ma Jou'ongu Madutu 'ai hukumu, mada'a unanga 'o mete'e tau-taunu Ma Jou'ongu Madutu 'ai hukumu, unanga gena-ge Ma Jou'ongu Madutu 'u sibarakati.

2 Petrus 3:18

Sidiḇo ḏi'i, ngini balasu ni 'ahu boloto, la ngini ganapu basono Unanga 'ai mura re dadalara re ni sidogo ninga wo-waro ra Unanga. Unanga gena-ge nanga Jou Yesus Kristus ga'a nanga Salamata ma cimi. Puji re silamo'o Unanga nange-ne re singado-ngadolo i'a. 'Amin.