Kolose 4:3 - Jaji ma Su-sungi

³ Ngini ni manyiata di'a ngomi ḏi'i mangale Ma Jou'ongu Madutu 'a welanga ngalana di'a mi singadolo habari rahasia mangale Kristus. Sababu habari gena-ge ngowa'a 'aḏi singosama ngoi toma bui.

Kolose 4:3 Iomraidhean Croise

Matias 13:11

Yesus 'a sangoro, “Ngini reni sanga cocatu di'a ni sahe 'ori i'a go-gogono mangale Soroga ma Pareta, mada'a toma ngowa'a lelegu so'o gena ua.

Yesus 'ai so-soma'a 14:27

Wakutu ananga 'aḏi ngadolo toma limau Antiokhia, Paulus re 'a Barnabas 'aḏi lomu ngowa'a ngaku Yesus re ya siajele mangale ma duhu sa'olo Ma Jou'ongu Madutu 'o pake ananga di'a sidagi 'Ai munara. Ananga ya siajele ḏi'i mangale Ma Jou'ongu Madutu 'o mete'e ananga singadolo ngowa-ngowa'a Yahudi ua mai 'aḏi dadi ngowa'a ngaku Yesus.

Roma 16:25

Puji re silamo'o Ma Jou'ongu Madutu! Unanga ga'a Rai kuasa 'i site'e ninga ngo-ngaku sababu reni dawongo Habari Roanga ga'a ngoi reta singadolo mangale Yesus Kristus. Ngoi reta singadolo habari gena-ge mete'e 'oru ga'a Ma Jou'ongu Madutu ra sijumu ra ngoi, mada'a toma 'ua re 'au wali moju ngene wa waro ua.

1 Korintus 16:9

Sababu kalaha 'age tamanga sigolona rema ngowa'a ga'a 'aḏi dola'aku ngoi, 'age ḏi'i donga ma repe rema faeda lai lamo'o toma ngi'i gena-ge di'a ngoi ta singadolo Habari Roanga ra Ma Jou'ongu Madutu tala.

1 Korintus 4:1

Sababu gena-ge ngomi Yesus 'ai so-soma'a, ngini balasu ni fikiri sa'olo Kristus 'ai falalomu-falalomu. Ngomi minga haku di'a mi singadolo ra ngini mangale Ma Jou'ongu Madutu 'ai 'akala ma sanga ga'a manusia ya waro nyangu, singadolo 'orasa nange-ne.

2 Korintus 2:12

Wakutu ngoi to ngadolo toma limau Troas, 'ari maksudu to singadolo Habari Roanga mangale Kristus. Toma limau gena-ge, Ma Jou Yesus ro welanga ngalana di'a ngoi, la to munara di'a Unanga.

Efesus 3:1

Ma sababu gena-ge ngoi, Paulus to manyiata di'a ngini. Ngoi to osama bui sababu to singadolo Habari Roanga ra ngini, ngowa'a Yahudi ua, sababu ngoi to munara di'a Kristus Yesus.

Efesus 3:3

Ma Jou'ongu Madutu 'ai maksudu ga'a ma siḏa 'i rahasia, mada'a 'orasa nange-ne 'A sijumu re 'A siajele ra ngoi. Re gena-ge ga'a kiḏanga ua, ngoi ta lefo ḏua.

Efesus 3:4

Wakutu ngini ni baca 'oru ga'a ngoi reta lefo, ngini ḏuanga i'a ni sahe mangale rahasia gena-ge, ma tero sa'olo ngoi ta sahe. Rahasia gena-ge mangale Kristus.

Efesus 3:9

Re Unanga ḏi'i 'o siwatasa munara ra ngoi di'a to sitarangi rahasia gena-ge. Dadi ngowa'a mo-moini ya waro ma duhu sa'olo Ma Jou'ongu Madutu 'a siḏagi 'Ai maksudu ma rahasia gena-ge ga'a 'ua re 'au wali moju matengo i'a mai ua 'a waro. Unanga gena-ge 'O sidadi diwanga re dungia re ma dara mo-moini.

Efesus 4:1

Sababu gena-ge, ngoi — ga'a to osama bui sababu 'ari munara di'a Ma Jou'ongu Madutu — to golo'o mode-mode'e ra ngini mangale ninga 'ahu balasu 'i patasa sa'olo ngowa'a ga'a Ma Jou'ongu Madutu ro 'aro'o di'a dadi 'Ai ngowa-ngowa'a masiretene.

Filipi 1:19

Sababu ngoi ta waro mangale ngoi ḏuanga i'a to sanga salamata sababu ngini ni manyiata di'a ngoi; re sababu ḏi'i ri-riono toma Ngagara 'Ofi-'Ofi ga'a ra Yesus Kristus.

Filipi 1:7

Tero mode'e ngoi to basono maroanga ra ngini mo-moini. Sababu bae ngoi toma bui, bolo talaḏi toma juruhakimi di'a ngoi to sitarangi mangale i'a sa'olo ngoi to singadolo Habari Roanga re to sijumu habari gena-ge 'i banari, ngini mo-moini ni riono ngoi di'a to siḏagi 'ari munara ga'a Ma Jou'ongu Madutu 'o pula'a ra ngoi sababu 'Ai mura re dadalara. Sababu gena-ge, ngini ni tegoro tari 'akala re sinyingara ma dara.

Kolose 1:26

Ma Jou'ongu Madutu 'ai habari gena-ge Unanga 'a sirahasia moju musungu rema latu-latu toma ḏuḏunu toma ngowa'a mo-moini. Mada'a nange-ne, Ma Jou'ongu Madutu ra siwaiti Tai 'umata.

Kolose 4:18

Tabea ra ngoi, Paulus. Ngoi ta lefo tabea gena-ge rari giama masiretene. Awa ni sidaioranga ngoi, ga'a toma bui ma dara moju! Ngoi to golo'o Ma Jou'ongu Madutu mangale 'Ai mura re dadalara sieanga i'a ngini ua.

1 Tesalonika 5:25

Ioronongoḏu ngo-ngaku rimoi, sidaioranga ngomi awa wakutu ni manyiata.

2 Timotius 1:16

Ngoi to golo'o Ma Jou'ongu Madutu 'a sijumu 'Ai 'akala re sinyingara ma la-la ra Onisiforus 'ai ngitu re ngale, sababu wakutu 'a Onisiforus 'o sapolo toma limau Roma, unanga 'o disa ngoi tau-taunu singadolo mi ma'u sanga. Re kalaha ngoi toma bui ma dara, Onisiforus 'o mara'a ua 'o tutumu ngoi tau-taunu re 'o sisanangi 'ari 'akala re sinyingara.

2 Timotius 2:9

Sababu gena-ge, ngoi to sanga sangisara singadolo to sanga lara sa'olo ngowa'a ma jira. Mada'a Ma Jou'ongu Madutu 'ai demo ya lara yoḏu'u.

2 Timotius 4:2

Ngana balasu no singadolo tau-taunu Habari ra Ma Jou'ongu Madutu ino, re ngana balasu no ḏu-ḏuanga ḏua singadolo habari gena-ge ra ananga, la ananga ya 'isene: bae 'aḏi nyengara bolo 'aḏi oḏu'u. Ngana balasu na'u site'e manga ngo-ngaku ra Ma Jou Yesus re na'u sitarangi manga sala re na'u babata ananga. Mada'a ngana balasu na'u doto'o pake 'akala ḇanyo.

Filemon 1:22

Re ḏi'i, pahala no sidodahe kamara rimoi tani wala di'a ngoi. Sababu ngoi to nganono Ma Jou'ongu Madutu 'a dawongo ioronongoḏu ngo-ngaku rimoi mo-moini ninga nyiata, la ngoi nyengara to maḏibo ra ngini.