Kolose 4:12 - Jaji ma Su-sungi

¹² 'Age rema ngowa'a matengo ḏi'i 'ai lomanga 'a Epafras, unanga ga'a ta Kristus Yesus ma tero sa'olo 'Ai budaka. Unanga ngowa'a Kolose re 'o siḏingoto 'ai tabea ra ngini. Unanga 'o manyiata tau-taunu rai 'akala re sinyingara mode-mode'e. Unanga 'o golo'o ra Ma Jou'ongu Madutu mangale ninga ngo-ngaku 'i te'oso ogo-ogoro kama elala ua, ma tero sa'olo ngowa'a raḏi ngimono tamanga ngo-ngaku. Re ḏi'i unanga 'o golo'o mangale ngini ni waro mode-mode'e 'oru ga'a Ma Jou'ongu Madutu 'ai 'akala ma mau.

Kolose 4:12 Iomraidhean Croise

Matias 5:48

Sababu gena-ge, ngini nena-ne balasu ni dadalara ti-tiai ngowa'a mo-moini ma tero sa'olo nanga Ḇaḇa toma soroga ga'a 'o dadalara ti-tiai ngowa'a mo-moini.”

Lukas 1:1

Teofilus, ngoi Lukas tini sayanga. Ngowa'a manga repe ḏua 'aḏi makutale ya lefo ya sidiai habari mangale Yesus 'ai 'ahu wakutu Unanga 'o 'ahu tananga sigolona moju.

Lukas 22:44

Yesus tai 'akala re sinyingara ma dara 'o basono sangisara re kangela madutu dadi Unanga 'o manyiata mode-mode'e singadolo 'Ai galasau'u 'i tege ma tero sa'olo ngaunu.

Yohanes 12:26

'A guna ḇato mau dadi 'Ari falalomu, ngowa'a gena-ge balasu 'o mete'e Ngoi, la 'Ari falalomu gena-ge 'o mamete'e ra Ngoi toma ngi'i le'a ḇato Ngoi to tagi. Re 'Ari Ḇaḇa 'o silamo'o falalomu gena-ge.”

Roma 15:14

'Ari ioronongoḏu ngo-ngaku rimoi, ngoi nena-ne to ngaku mode-mode'e mangale ngini ninga de'oso re ḏegoro 'i la-la, re ngini ni waro Yesus 'ai do-doto'o ti-tiai. Ngini ḏi'i nga'unu ni ma'u doto'o matengo re matengo.

Roma 15:30

Sababu nanga ngo-ngaku ra Ma Jou Yesus Kristus re sababu ḏi'i dadalara ga'a Ma Ngagara 'Ofi-'Ofi ri pula'a ra ngene matengo re matengo, ngoi to golo'o mode-mode'e ngini ni mamete'e ra ngoi di'a manyiata ra Ma Jou'ongu Madutu di'a ngoi.

1 Korintus 14:20

Ioronongoḏu ngo-ngaku rimoi, mangale kajahatana, ngini balasu ni ma tero sa'olo ngowa 'olo. Siḏibo ḏi'i mangale Ma Ngagara 'Ofi-'Ofi ma demo, awa ngini mafikiri ma tero sa'olo ngowa 'olo mada'a ngini balasu ni mafikiri ma tero sa'olo bi-biri'i.

1 Korintus 2:6

Kalaha ngoi 'ari demo-demo mete'e 'ari pahe ua di'a to baja ngini, la ni ngaku ngoi, mada'a ngoi to kanau mangale 'akala soro'unu ra ngini ga'a ninga ngo-ngaku lai te'e. Mada'a 'akala soro'unu gena-ge mete'e manusia manga 'akala ma soro'unu ua bolo 'akala soro'unu ra guna ḇato ua ga'a remanga kuasa toma dungia nena-ne. Toma wangere rimoi toma biono i'a manusia manga kuasa gena-ge 'i iranga.

2 Korintus 13:11

Ioronongoḏu ngo-ngaku rimoi, ma ḏo-ḏogumu, ngini balasu ni maroanga re makutale ni dadi ngowa'a 'aḏi 'a'a 'oru ḇato mete'e tau-taunu Ma Jou'ongu Madutu 'ai 'akala ma mau, re na dawongo 'ari ajele mangale mo-moini. Ngini balasu ninga 'akala re sinyingara 'i dadi rimoi re ninga 'ahu balasu toma dame ma dara. Ma Jou'ongu Madutu ga'a 'o dadalara re dame ma cimi, Unanga ḏuanga i'a 'o sieanga i'a ngini ua.

Galatia 1:10

Wakutu ngoi to kanau so'o gena, ngoi to disa lomanga ua, la ngowa'a ri sitoro. Re ḏi'i ngoi 'ari maksudu ua di'a ngoi to sisanangi manusia manga 'akala re sinyingara! Siḏibo ḏi'i, ngoi to mau Ma Jou'ongu Madutu 'o sitoro ngoi. Na'o ngoi to mau sisanangi manusia manga 'akala re sinyingara moju, ngoi to munara yoḏu'u di'a Kristus ma tero sa'olo 'Ai budaka.

Galatia 4:19

'Ari ngowa-ngowa'a ga'a tunu dadalara, 'orasa nange-ne ngoi to basono kangela ma tero sa'olo we-were'a matengo mo basono sangisara sa'i mo maḏe-ḏegoro i'a. Ngoi ḏuanga i'a ta basono kangela, singadolo Kristus 'ai de'oso re ḏegoro ri konyo tiai taninga 'akala re sinyingara ma dara.

Kolose 1:22

Kalaha so'o gena-ge, Ma Jou'ongu Madutu 'a sirimoi moju ngene ra Unanga sababu Unanga 'ai Ngowa'a Nau'u 'O sengene sa'olo manusia. 'Ai se-sengene gena-ge 'i sidadi ngini ninga 'ahu 'i 'ofi-'ofi, kama faja ua, re kaninga sala ua ra Ma Jou'ongu Madutu 'ai momina.

Kolose 1:28

Kristus gena-ge ngomi mi singadolo ra guna ḇato. Ngomi mi si'elingi re mi doto'o ananga mo-moini reminga 'akala ma soro'unu. Ngomi minga maksudu di'a sigasa re sitalaḏi ngowa'a mo-moini ga'a raḏi marimoi ra Kristus, sa'olo ngowa'a ti-tiai ra Ma Jou'ongu Madutu.

Kolose 1:29

Sababu gena-ge, ngoi to munara mode-mode'e to pake 'ari de-de'e mo-moini ga'a Kristus 'o pula'a ra ngoi. De-de'e gena-ge 'i munara rema kuasa tari 'ahu ma dara ḏi'i.

Kolose 1:7

Habari Roanga gena-ge 'a Epafras ra singadolo ra ngini. Epafras 'o dadi Kristus 'ai falalomu ga'a 'o munara cufala madutu di'a 'o riono ngini. Unanga gena-ge ḏi'i ngomi minga ḏagilomu munara, ga'a mu dadalara.

Kolose 1:9

Sababu gena-ge, ngomi mi manyiata tau-taunu di'a ngini. Wakutu ma mulaingi i'a ngomi mi 'isene mangale ngini, ngomi golo'o ra Ma Jou'ongu Madutu mangale 'Ai Ngagara 'Ofi-'Ofi 'i sipula'a 'akala soro'unu re wo-waro ra ngini, singadolo ngini nyengara ni waro ti-tiai, 'oru ga'a Ma Jou'ongu Madutu 'ai 'akala ma mau.

Kolose 4:9

Onesimus ḏuanga i'a 'o mamete'e ra Tikhikus, 'aḏi tagi toma Kolose. Onesimus, unanga ngowa'a Kolose re 'o cufala mete'e Yesus re ngomi mu dadalara. Ananga gena-ge ḏuanga i'a 'aḏi siajele mangale 'oru ḇato ga'a ri dadi tari ngi'i.

1 Tesalonika 5:23

Ngomi manyiata ra Ma Jou'ongu Madutu, ga'a 'O sipula'a dame ra ngene, mangale Unanga masiretene 'O sidadi ngini mode-mode'e sa'olo 'Ai ngowa'a 'ofi-'ofi: bae ninga nyawa, ninga 'akala re sinyingara re ninga de'oso re ḏegoro kama rapu ua singadolo nanga Jou Yesus Kristus dadunu 'o sapolo moju.

Filemon 1:23

'A Epafras 'o mamete'e ra ngoi toma bui ma dara, sababu 'ai munara ra Kristus Yesus, 'o siḏingoto 'ai tabea ra ngana, dowara.

'Ibrani 5:14

Ngo-ngoromo ga'a te-te'e gena-ge di'a ngowa'a bi-biri'i sababu ananga remanga wo-waro ḏua di'a ya siwo-wola de'oso re ḏegoro ma la-la re ma jira.

'Ibrani 5:7

Wakutu Yesus 'o 'ahu-'ahu moju toma dungia nena-ne, Unanga 'o manyiata re 'o golo'o reo poa'a rai 'ongoro ra Ma Jou'ongu Madutu ga'a nga'unu sisalamata Unanga toma sengene. Sababu Unanga 'o ta'aloko rai 'akala re sinyingara sa-sanangi ra Ma Jou'ongu Madutu, Unanga 'ai go-golo'o Ma Jou'ongu Madutu 'a dawongo.

Yakobus 1:1

'Ari ioronongoḏu ngo-ngaku rimoi, suku Israel nga nyagi moi re nga muḏiḏi ga'a 'aḏi matai are toma dungia sitabi donga; Yakobus ga'a ta Ma Jou'ongu Madutu ma tero sa'olo 'Ai budaka re so'o gena ḏi'i ga'a ta Ma Jou Yesus Kristus ma tero sa'olo 'Ai budaka, ngoi to siḏingoto 'ari tabea ra ngini.

Yakobus 1:4

Na'o so'o gena, ngini ḏuanga i'a ni dadi ngowa'a ngaku Yesus ga'a manga ngo-ngaku enanga 'i la'ere re manga de'oso re ḏegoro 'i ma'u rapu ua: kama kuranga ua.

Yakobus 5:16

Sababu gena-ge, ngini balasu ni ma'u mangaku ninga ḏosa matengo re matengo re ngini ni ma'u manyiata matengo re matengo, la ni la toma si-siḏi mo-moini. Ngowa'a loasa re banari manga nyiata rema kuasa lai lamo'o:

2 Petrus 1:1

Ngoi, Simon Petrus, Yesus Kristus 'ai so-soma'a re ngoi ta Unanga ma tero sa'olo 'Ai budaka. Ngoi to lefo surata nena-ne ra ngini ga'a ninga ngo-ngaku ra Yesus Kristus ma tero sa'olo ngomi minga ngo-ngaku. Yesus Kristus, Unanga Ma Jou'ongu Madutu re ḏi'i nanga Salamata ma Cimi. Unanga gena-ge 'O si'a'a ngene mo-moini wo ngaku Unanga re gena-ge 'i dadi sababu Unanga 'o 'adili.

Yudas 1:24

Ni puji re silamo'o Ma Jou'ongu Madutu ga'a nga'unu 'o kadiarata ngini, la ni eta'a toma ḏosa awa re nga'unu 'o sigasa re sitalaḏi ngini ra Unanga ga'a mulia. Toma 'orasa gena-ge ngini ninga sala cua re ninga 'akala re sinyingara 'i romanga reo roanga.