Kolose 3:17 - Jaji ma Su-sungi17 'Oru ḇato ga'a ngini ni si'a'a re ni siajele, gena-ge mode-mode'e balasu 'i patasa di'a ngowa'a ga'a mete'e Ma Jou Yesus. Re ḏi'i ngini balasu ni sibere ie murasa ma la ra Ma Jou'ongu Madutu sababu 'oru ga'a Ma Jou Yesus 'o 'a'a di'a ngini. Faic an caibideil |
Ngini ninga 'akala re sinyingara balasu 'i utu'u ra Unanga tau-taunu ma tero sa'olo ate ma utu'u 'i osama lai kiḏanga toma tana'a ma dara. Ngini ninga 'akala re sinyingara balasu 'i simomi'i ra Unanga tau-taunu ma tero sa'olo wala 'i simomi'i toma bangini te-te'e ma re'u. Ngini balasu ni dogo ninga ngo-ngaku re ninga ngo-nganono mode-mode'e ra Kristus, mete'e ma do-doto'o banari ngini reni dawongo. Re ḏi'i, ngini ninga 'akala re sinyingara balasu 'i romanga reo murasa ma la tau-taunu ra Ma Jou'ongu Madutu.
Ma Jou'ongu Madutu 'o sirimoi ngini ma tero sa'olo lese rimoi ḇato re 'o 'aro'o ngini ni tegoro toma lese gena-ge matengo re matengo reninga dame tau-taunu. Sababu gena-ge, Kristus 'ai dame balasu 'i parenta taninga 'akala re sinyingara ma dara. Re ḏi'i ngini balasu ni sibere ie murasa ma la tau-taunu ra Ma Jou'ongu Madutu.
Ngomi, Paulus, Silas re Timotius mi siḏingoto surata ne tananga ioronongoḏu ngo-ngaku rimoi toma jama'ata Tesalonika, ngini ga'a ni marimoi ra Ma Jou'ongu Madutu nanga Ḇaḇa re Yesus Kristus nanga Jou. Ngomi mi manyiata ra Ma Jou'ongu Madutu nanga Ḇaḇa, re Yesus Kristus nanga Jou, la ḏuanga i'a 'Aḏi pula'a manga mura re dadalara re 'Aḏi pula'a ḏi'i manga dame tau-taunu ra ngini mo-moini.
Soi moi nyangu Ma Jou'ongu Madutu 'o kanau Tai mala'ekata matengo so'o ne: “Ngana nena-ne Ngoi 'ari Ngowa'a Nau'u; toma wangere nange-ne, Ngoi to dadi Ngana 'ani Ḇaḇa.” Re soi moi nyangu ḏi'i Ma Jou'ongu Madutu 'o kanau Tai mala'ekata ma lelegu so'o ne: “Ngoi ḏuanga i'a to dadi Unanga 'ai Ḇaḇa, re Unanga ḏuanga i'a 'o dadi Ngoi 'ari Ngowa'a Nau'u.”
Ngini ḏi'i ma tero sa'olo maḏi ga'a 'i 'ahu, ga'a Ma Jou'ongu Madutu 'a pake di'a 'a simomi'i 'ai jama'ata. Re Ma Jou'ongu Madutu masiretene 'o cumutu ngini ni dadi 'Ai 'imam-'imam di'a ni pula'a jou-jou ra Unanga. Re ngini ni pula'a ninga 'akala re sinyingara mete'e Ma Ngagara 'Ofi-'Ofi ma mau sa'olo ninga jou-jou ra Unanga. Ma Jou'ongu Madutu nyengara 'a dawongo jou-jou gena-ge, sababu 'oru ga'a Yesus Kristus 'a si'a'a pasala ḏua di'a ngini.
Mada'a ngini ngowa-ngowa'a ga'a Ma Jou'ongu Madutu renu siwola i'a, re ngini ni dadi ma tero sa'olo 'Ai 'imam-'imam di'a munara ra Unanga sa'olo ninga 'Olana. Re ḏi'i, ngini ni dadi bangsa 'ofi-'ofi, re Unanga masiretene 'ai 'umata. Unanga 'o 'a'a so'o gena-ge, la ngini ni sihabari mangale 'Ai ga'a lai rousu. Unanga gena-ge ga'a 'O 'aro'o sisupu ngini toma hafu-hafu re 'O singosama ngini Tai tarangi ma dara ga'a ma pari cua.
Na'o matengo i'a 'o singadolo Habari ra Ma Jou'ongu Madutu ino, unanga balasu 'o kanau sa'olo ngowa'a ga'a Unanga 'o 'utusu di'a singadolo pa'i Habari gena-ge ḇato. Na'o matengo i'a 'o riono ngowa'a, 'o riono rai de-de'e ga'a Ma Jou'ongu Madutu ro pula'a ra unanga. Ngini ni 'a'a so'o gena-ge, la ngowa-ngowa'a ga'a oḏi'i ninga ga'a lai rousu, ḏuanga i'a 'aḏi puji re silamo'o Ma Jou'ongu Madutu sababu Yesus Kristus 'ai munara taninga 'akala re sinyingara ma dara. Ma Jou'ongu Madutu Unanga masiretene ga'a 'O parenta re 'O dawongo puji re silamo'o kasingado-ngadolo i'a. 'Amin.