Kolose 3:16 - Jaji ma Su-sungi

¹⁶ Ngini balasu ni 'elingi tau-taunu Kristus 'ai do-doto'o, la 'i parenta taninga de'oso re ḏegoro, demo re ganau. Dadi ngini ni mete'e ma duhu so'o ne: Ni ma'u doto'o, ni ma'u si'elingi di'a mete'e 'Ai do-doto'o reninga 'akala soro'unu. Re ni mete'e ma duhu so'o ne ḏi'i: Ni manyanyi Mazmur, puji-pujiana re manyanyi nyanyi ma lelegu. Re wakutu ngini manyanyi, ni sibere ie murasa ma la ra Ma Jou'ongu Madutu.

Kolose 3:16 Iomraidhean Croise

Matias 26:30

Gena ḏua, ananga 'aḏi manyanyi rimoi di'a puji re silamo'o Ma Jou'ongu Madutu togumu i'a, ananga 'aḏi tagi toma Polono Zaitun.

Lukas 2:51

Togumu i'a, Yesus 'o tagi mamete'e ra ananga 'aḏi maḏibo toma limau Nazaret, re 'o mete'e manga mau. 'Ori i'a mo-moini ga'a 'i dadi gena-ge, ngo Maria ma gogono tami 'akala re sinyingara ma dara.

Yohanes 15:7

Na'o ngini marimoi tau-taunu ra Ngoi re 'Ari do-doto'o ni gogono tau-taunu taninga 'akala re sinyingara ma dara, ni golo'o 'oru ḇato Tari Ḇaḇa, tantu ḏua Unanga nu pula'a ra ngini.

Roma 10:17

Sababu gena-ge ngowa'a pa'i nyengara 'aḏi ngaku ḇato Kristus, na'o 'aḏi 'isene 'Ai habari. Re habari gena-ge ananga pa'i nyengara ya 'isene ḇato, na'o ngowa'a ya'u singadolo habari mangale Kristus.

Roma 15:14

'Ari ioronongoḏu ngo-ngaku rimoi, ngoi nena-ne to ngaku mode-mode'e mangale ngini ninga de'oso re ḏegoro 'i la-la, re ngini ni waro Yesus 'ai do-doto'o ti-tiai. Ngini ḏi'i nga'unu ni ma'u doto'o matengo re matengo.

1 Korintus 14:15

Dadi ngoi balasu to 'a'a 'oru?! Ngoi balasu to manyiata rari roh, re rari fikirana ḏi'i. Ngoi to manyanyi rari roh re rari fikirana ḏi'i.

1 Korintus 14:26

Dadi ioronongoḏu ngo-ngaku rimoi, gena-ge mo-moini ma maksudu 'oru?! Wakutu ngini ni malomu di'a ni silamo'o re siḏubuso Ma Jou'ongu Madutu, 'age mamuni'a ga'a 'aḏi manyanyi, mamuni'a ga'a 'aḏi doto'o. 'Age mamuni'a ga'a gasa demo-demo da'u ra Ma Jou'ongu Madutu tala ga'a 'A sipula'a ra unanga. Mamuni'a ga'a 'aḏi kanau pake Ma Ngagara 'Ofi-'Ofi ma demo re mamuni'a ga'a nga'unu siguci demo-demo gena-ge. Mada'a gena-ge mo-moini ngini ni si'a'a, la ngowa'a ngaku Yesus sanga ma 'utungu.

Efesus 1:17

Ngoi to manyiata tau-taunu to golo'o tananga Ḇaḇa ga'a 'o mulia, Unanga gena-ge nanga Jou Yesus Kristus 'ai Jou'ongu Madutu, mangale Ma Ngagara 'Ofi-'Ofi ḏuanga i'a 'i pula'a 'akala ma soro'unu re 'i sijumu Ma Jou'ongu Madutu ra ngini, la ngini ni nana'o Unanga mode-mode'e:

Efesus 5:17

Sababu gena-ge, awa ni dadi sa'olo ngowa'a haga, mada'a ni disa waro Ma Jou'ongu Madutu 'ai 'akala ma mau.

Efesus 5:19

Ni pake mazmur, nyanyi Rohani re puji-pujiana di'a ni puji re silamo'o Ma Jou'ongu Madutu, la ni site'e matengo re matengo ninga ngo-ngaku. Ni manyanyi reninga 'akala re sinyingara mode-mode'e ra Ma Jou'ongu Madutu.

Efesus 5:26

Kristus 'o 'a'a so'o gena, la Unanga 'a sidadi ngene 'Ai 'umata. Unanga gena-ge ro si'ofi 'Ai jama'ata reo 'Ai do-doto'o re ḇanyo na'o wo sanga baptis.

Kolose 1:28

Kristus gena-ge ngomi mi singadolo ra guna ḇato. Ngomi mi si'elingi re mi doto'o ananga mo-moini reminga 'akala ma soro'unu. Ngomi minga maksudu di'a sigasa re sitalaḏi ngowa'a mo-moini ga'a raḏi marimoi ra Kristus, sa'olo ngowa'a ti-tiai ra Ma Jou'ongu Madutu.

Kolose 1:9

Sababu gena-ge, ngomi mi manyiata tau-taunu di'a ngini. Wakutu ma mulaingi i'a ngomi mi 'isene mangale ngini, ngomi golo'o ra Ma Jou'ongu Madutu mangale 'Ai Ngagara 'Ofi-'Ofi 'i sipula'a 'akala soro'unu re wo-waro ra ngini, singadolo ngini nyengara ni waro ti-tiai, 'oru ga'a Ma Jou'ongu Madutu 'ai 'akala ma mau.

Kolose 4:6

Dadi 'oru ga'a ngini ni siajele toma ngowa'a gena-ge, ninga 'akala re sinyingara balasu romanga reo mura re dadalara, la ngini ni sisanangi manga 'akala re sinyingara. Dadi ngini ḏuanga i'a ni waro ma duhu sa'olo ngini balasu ni sangoro manga so-sano.

1 Tesalonika 1:8

Pa'i toma daeraha Makedonia re Akhaya ḇato ua mada'a Habari Roanga mangale Ma Jou Yesus 'i rera re walata ngadolo le'a bolo le'a sababu ngini. So'o gena ḏi'i, habari mangale ninga ngo-ngaku ra Ma Jou'ongu Madutu 'i rera re walata ngadolo le'a bolo le'a ḏi'i. Sababu gena-ge, ngomi kama dogo demo riwara toma ngowa'a gena-ge.

1 Tesalonika 4:18

Sababu gena-ge, ngini mo-moini balasu ni ma'u site'e ninga 'akala re sinyingara matengo re matengo re demo-demo gena-ge.

2 Tesalonika 3:15

Mada'a ananga gena-ge awa sidadi ninga lawana. Siḏibo ḏi'i, ngini balasu na'u ḇangata ma tero sa'olo ninga ioro bolo ninga nongoḏu.

1 Timotius 6:17

Ngana balasu no golo'o toma ngowa-ngowa'a rema-enanga toma dungia nena-ne, awa ananga 'aḏi momole re awa 'aḏi masinganono toma 'ori i'a 'i kakali ua ma tero sa'olo manga harata. Ananga balasu 'aḏi masinganono ra Ma Jou'ongu Madutu ga'a 'o pula'a 'oru ḇato ra ngene pai-pai'i di'a ngene nanga 'ahu.

2 Timotius 3:15

Ngana balasu no 'elingi tau-taunu mangale wakutu no ce-ceka'a ie moju, ngana reno sahe Boku 'Ofi-'Ofi ga'a pula'a wo-waro toma ngowa'a, la ngowa'a nyengara 'aḏi sanga salamata sababu manga ngo-ngaku ra Yesus Kristus.

Yakobus 1:5

Mada'a, na'o 'age matengo taninga sigolona 'ai 'akala soro'unu enanga 'i kuranga mangale ma duhu sa'olo unanga 'o 'ahu na'o 'o sanga dola'aku re bo-baja, unanga gena-ge balasu 'o golo'o ra Ma Jou'ongu Madutu. Ḏua Ma Jou'ongu Madutu ḏuanga i'a 'o pula'a 'akala soro'unu ra guna ḇato Rai 'akala re sinyingara sa-sanangi kama kuḏubungu ua.

Yakobus 3:17

Siḏibo ḏi'i, ngowa'a ga'a 'ai 'akala soro'unu ma 'asala da'u ra Ma Jou'ongu Madutu tala, ma mulaingi 'ai 'ahu 'i 'ofi-'ofi, unanga gena-ge 'o nyanyaḏi dame, 'akala re sinyingara mereoso, nga'unu 'o dawongo ngowa'a lelegu manga 'akala ma sanga, re 'o sijumu 'ai 'akala re sinyingara ma la-la toma ngowa'a lelegu singadolo 'ai ga'a mo-moini rousu madutu. Re Unanga ḏi'i pa'ala kaci moi ua re 'ai demo re ganau 'i ma tero tai de'oso re ḏegoro

Yakobus 5:13

Na'o taninga sigolona matengo i'a sanga ma sangisara, unanga balasu 'o manyiata ra Ma Jou'ongu Madutu. Na'o 'age rema ngowa'a matengo i'a maroanga, unanga balasu 'o manyanyi puji re silamo'o Ma Jou'ongu Madutu.

1 Yohanes 2:14

Ngoi to lefo surata nena-ne ra ngini ga'a ninga ngo-ngaku ma tero sa'olo ngowa 'olo-ngowa 'olo, sababu ngini ni nana'o Ma Jou'ongu Madutu ḏua sa'olo ninga Ḇaḇa. Ngoi to lefo surata nena-ne ra ngini ga'a ninga ngo-ngaku ma tero sa'olo ḇaḇa-ḇaḇa, sababu ngini reni nana'o Unanga ga'a 'ua re 'au wali moju, rema enanga ḏua wakutu dungia 'i sidadi nyangu. Ngoi to lefo surata nena-ne ra ngini ga'a ninga ngo-ngaku ma tero sa'olo ngowa-ngowa'a tubaie, sababu ngini ngowa'a te-te'e taninga ngo-ngaku, re ninga de'oso re ḏegoro 'i mete'e Ma Jou'ongu Madutu 'ai do-doto'o re ninga ngo-ngaku kama elala ua toma 'Iblisi ma bo-baja.

1 Yohanes 2:24

Sababu gena-ge, ngini ninga de'oso re ḏegoro balasu mete'e tau-taunu Habari Roanga ra Ma Jou'ongu Madutu ino, ga'a na 'isene ḏua wakutu ngini mulaingi ni ngaku Kristus. Na'o ngini ni 'a'a so'o gena-ge, ngini ninga 'ahu ḏuanga i'a 'i marimoi tau-taunu ra Ma Jou'ongu Madutu re 'Ai Ngowa'a Nau'u.

1 Yohanes 2:27

Mada'a mangale ngini masiretene, Kristus 'a sipa'ala ḏua Ma Ngagara 'Ofi-'Ofi ra ngini. Sababu Ma Ngagara 'Ofi-'Ofi 'i tegoro taninga 'akala re sinyingara moju, ngini ni paralu ua ngowa'a lelegu 'aḏi doto'o ngini. Sababu Ma Ngagara 'Ofi-'Ofi masiretene 'I doto'o 'ori i'a mo-moini ra ngini re enanga ma do-doto'o mo-moini 'i banari; sa-sakala ua. Sababu gena-ge, ngini ninga de'oso re ḏegoro balasu na mete'e 'oru ḇato ga'a Ma Ngagara 'Ofi-'Ofi sidoto'o ngini, la ngini ni 'ahu marimoi tau-taunu ra Yesus Kristus.

2 Yohanes 1:2

Sababu Ma Jou'ongu Madutu 'ai demo 'i banari 'i tegoro ra ngene nanga 'akala re sinyingara re demo gena-ge 'i tegoro tau-taunu ra ngene kasingado-ngadolo i'a.

Tingoýi 14:3

Ngowa'a nga cala latu moi re cala nyagi rata re cala rata (144,000) gena-ge 'aḏi manyanyi nyanyi su-sungi ra Ma Jou'ongu Madutu 'ai ḏe-ḏegoro ma biono re makhluk nga ḏuata re bi-biri'i—bi-biri'i ma biono, mo-moini ga'a sigoloḏi 'Ai ḏe-ḏegoro gena-ge. Nyanyi gena-ge matengo i'a mai ua nga'unu 'o manyanyi, ḏuga-ḏuga ananga nga cala latu moi re cala nyagi rata re rata (144,000) ḇato; ananga gena-ge ga'a raḏi salamata ḏua.

Tingoýi 15:3

Ananga ya sinyanyi 'a Musa 'ai nyanyi, unanga ga'a to de-de'oso Ma Jou'ongu Madutu ma tero sa'olo 'Ai budaka, re sinyanyi Doba ma Ngowa 'ai nyanyi, “Ma Jou ga'a Ma Jou'ongu Madutu, Unanga ga'a 'Ai kuasa ma pari cua, 'Ani munara 'i heranga masala, Ma Jou'ongu Madutu no dadi bangsa-bangsa manga 'Olana. 'Oru ḇato Ma Jou'ongu Madutu no 'a'a, enanga 'i 'adili re banari.

Tingoýi 19:10

Ngoi to mapagara 'ari biono tala toma mala'ekata gena-ge 'ai biono di'a to silamo'o re siḏubuso unanga. Mada'a unanga 'o kanau, “Ra ngoi awa! Awa no silamo'o re siḏubuso ngoi. Pa'i no silamo'o re siḏubuso Ma Jou'ongu Madutu ḇato! Sababu ngoi ḏi'i ta Unanga ma tero sa'olo 'Ai budaka ma tero ngana re ma tero 'ani ioronongoḏu ngo-ngaku rimoi ga'a 'aḏi macako'o namo-namoto do-doto'o ba-banari ga'a Yesus 'o pula'a pasala ḏua. Do-doto'o ba-banari gena-ge 'i sigaraki ngowa-ngowa'a di'a 'aḏi pula'a habari da'u ra Ma Jou'ongu Madutu tala.”

Tingoýi 5:9

Re ananga gena-ge 'aḏi manyanyi nyanyi su-sungi rimoi. “Doba ma Ngowa 'I patasa ḇato di'a 'oro kartasi lo-lolo gena-ge re 'I woi'i ma segele. Sababu Enanga ri sengene re Ma ngaunu 'i pa'ala, la 'I tuusu ngowa-ngowa'a toma suku mo-moini, demo-demo mo-moini, nagara mo-moini re bangsa mo-moini di'a Ma Jou'ongu Madutu.