Kolose 3:13 - Jaji ma Su-sungi

¹³ Ngini matengo re matengo balasu ni pake 'akala ḇanyo, awa ni gogono 'akala na'o ngowa'a lelegu 'aḏi 'a'a sala ra ngini, re ma'u si'apongo matengo re matengo na'o ngowa'a 'aḏi 'a'a ḏosa ra ngini. Ma Jou'ongu Madutu rai 'akala re sinyingara sa-sanangi 'O singi-ngiranga ninga ḏosa-ḏosa, dadi ngini ḏi'i reninga 'akala re sinyingara balasu ma'u si'apongo matengo re matengo na'o ngowa'a 'aḏi 'a'a ḏosa ra ngini.

Kolose 3:13 Iomraidhean Croise

Matias 5:44

Mada'a Ngoi to siajele ra ngini nena-ne: Ngini balasu ni dadalara ninga lawana-lawana, re ni nyiata ḏi'i ngowa-ngowa'a ga'a 'aḏi sisikisa ngini sababu ni mete'e Ngoi.

Matias 6:12

Re No singi-ngiranga minga sala, ma tero ngomi ḏi'i remi si'apongo ngowa'a ga'a 'aḏi 'a'a sala ḏua ra ngomi.

Markus 11:25

Re na'o ngini ni manyiata, mada'a ninga 'akala re sinyingara 'i sanangi ua ra matengo i'a, siḏa-siḏa na si'apongo ngowa'a matengo gena-ge, la ninga Ḇaḇa da'u toma soroga 'A singi-ngiranga ḏi'i ninga ḏosa-ḏosa. [

Lukas 11:4

Re No singi-ngiranga minga ḏosa, sababu ngomi ḏi'i mi si'apongo ngowa'a mo-moini ga'a 'a'a sala ra ngomi. Re awa No sieanga i'a ngomi mi sanga bo-baja.’ ”

Lukas 23:34

Ḏua Yesus 'o manyiata, “Baba, singi-ngiranga manga ḏosa, sababu 'oru ga'a ananga ya 'a'a 'i mete'e tamanga waro ua ma dara.” Gena ḏua, sordado-sordado 'aḏi 'a'a loterei, la 'a guna 'o sanga Unanga 'ai pakeanga.

Roma 15:7

Sababu gena-ge ioronongoḏu ngo-ngaku rimoi, ngini balasu ni ma'u dawongo matengo re matengo ma tero sa'olo Kristus 'o dawongo ngini, la ngowa'a 'aḏi puji re silamo'o Ma Jou'ongu Madutu.

2 Korintus 2:10

Nange-ne, ngoi to siajele sihukumu rawara unanga ga'a 'o 'a'a ḏosa re nu si'apongo unanga gena-ge. Na'o ngini ni si'apongo unanga, ngoi ḏi'i to si'apongo unanga. Na'o 'ori i'a ga'a paralu madutu ngoi ta si'apongo, Kristus 'ari sakisi mangale ngoi reto si'apongo unanga. Re ngoi reto si'a'a so'o gena-ge di'a ngini ninga la.

2 Korintus 6:6

Re ḏi'i ngomi sijumu mangale ngomi mi dadi Ma Jou'ongu Madutu 'ai falalomu mode-mode'e, sababu mi sijumu minga 'akala re sinyingara boloto, minga wo-waro lai ngido mangale Ma Jou'ongu Madutu 'ai demo, minga 'akala ḇanyo re 'akala rousu ra guna ḇato. Ngomi mi masidiriwa ra Ma Jou'ongu Madutu 'ai de-de'e toma Ngagara 'Ofi-'Ofi, re mi dadalara mode-mode'e 'a guna ḇato.

Galatia 6:2

Wakutu matengo i'a sanga susa, ngini balasu ni ma'u riono. Na'o ni madaga'a so'o gena, ngini ni mete'e Kristus 'ai hukumu.

Efesus 4:2

Ngini balasu ni maholo ninga 'akala re sinyingara, 'akala re sinyingara mereoso, pake 'akala ḇanyo, ni manahana ninga diri sababu ninga dadalara di'a ngowa'a lelegu, wakutu manga de'oso re ḏegoro 'i ma'u rapu ra ngini.

Efesus 4:32

Siḏibo ḏi'i, ngini balasu ninga 'akala re sinyingara lai rousu, ni ma'u dadalara re ma'u si'apongo matengo re matengo, ma tero sa'olo Ma Jou'ongu Madutu 'o singi-ngiranga ninga ḏosa sababu ni marimoi ra Kristus.

Efesus 5:2

Taninga 'ahu ma dara balasu romanga reo dadalara, ma tero sa'olo Kristus ḏi'i 'O dadalara ngene. Unanga 'ai lese 'a sidoa'a sa'olo jou-jou di'a ngene sa'olo jou-jou rimoi ga'a ma bounu lai sa'i re sisanangi Ma Jou'ongu Madutu 'ai 'akala re sinyingara.

Kolose 3:12

Ma Jou'ongu Madutu ro cumutu ngini sa'olo 'Ai 'umata ga'a ngowa'a 'ofi-'ofi re Unanga ro dadalara ngini. Sababu gena-ge, ngini ni 'ahu so'o ne: Ni riono matengo re matengo, ni pake 'akala rousu, ni maholo ninga diri, ni pake 'akala re sinyingara mereoso re 'akala ḇanyo.

Yakobus 2:13

Ma Jou'ongu Madutu ḏuanga i'a 'o sijuruhakimi kai 'akala re sinyingara ma la-la ua toma ngowa'a ga'a 'aḏi sijumu ua 'akala re sinyingara ma la-la, mada'a 'aḏi sijuruhakimi ngowa'a lelegu. Mada'a na'o ngowa'a ngaku Yesus 'aḏi sijumu 'akala re sinyingara ma la-la toma ngowa-ngowa'a, ḏuanga i'a Ma Jou'ongu Madutu 'o sijumu 'ai 'akala re sinyingara ma la-la toma ngowa'a gena-ge wakutu Unanga 'o sijuruhakimi ngowa'a mo-moini.

1 Petrus 2:21

Ma Jou'ongu Madutu 'o 'aro'o ngini di'a ni matahana sangisara gena-ge. So'o gena 'a Kristus ḏi'i 'o sanga sangisara di'a ngini. Duhu so'o gena-ge, Unanga 'o sijumu ngo'omo, la ngini ni 'a'a ma tero sa'olo Unanga: