Kolose 3:10 - Jaji ma Su-sungi

¹⁰ Nange-ne ngini reni dawongo 'ahu su-sungi sababu Ma Jou'ongu Madutu ro sidadi ngini manusia su-sungi. Unanga 'o sidiai ninga de'oso re ḏegoro tau-taunu, la ngini ni dadi ma tero ra Unanga gena-ge re mode-mode'e ngini ni nana'o Unanga ti-tiai.

Kolose 3:10 Iomraidhean Croise

Yohanes 17:3

'Ahu kasingado-ngadolo i'a ma ngale so'o ne: Ngowa'a 'aḏi nana'o 'Ari Ḇaḇa, 'aḏi nana'o Ngoi ḏi'i. 'Ari Ḇaḇa pa'i matengo ḇato ga'a Ma Jou'ongu Madutu mode-mode'e; re Ngoi, Yesus Kristus ga'a 'Ari Ḇaḇa Ri 'utusu.

Roma 12:2

Ni mete'e ngowa'a manga tabeata rawara ga'a nana'o ua Ma Jou'ongu Madutu. Siḏibo ḏi'i, sieanga i'a Ma Jou'ongu Madutu 'o si'a'a ngini ninga fikirana su-sungi singadolo ninga tabeata 'i dadi su-sungi. Ḏua ngini nga'unu ni waro Ma Jou'ongu Madutu 'ai 'akala ma mau: 'oru 'i la-la, 'i ti-tiai re ḏi'i 'i sisanangi 'Ai 'akala re sinyingara.

Roma 13:12

Lobi'i sa'i ri palisi'i, ti'ara riwara ri wangere. Dadi, ino ngene wo matogumu siḏagi 'ori i'a ma hafu-hafu. Re ino ngene wo sidodahe dare ma tarangi.

Roma 13:14

Siḏibo ḏi'i, ngini balasu ni mete'e Ma Jou Yesus Kristus 'Ai tabeata re 'Ai de'oso re ḏegoro, singadolo 'Ai tabeata re de'oso re ḏegoro gena-ge, enanga 'i dadi ma tero sa'olo ninga pakeanga. Re ni fikiri riwara mangale ni mete'e ninga tabeata baraḏosa ma nyafusu.

Roma 6:4

Sababu gena-ge, wakutu ngene wo sanga ḇanyo, 'i ma tero sa'olo ngene siotomo marimoi ra Kristus, la ma tero sa'olo Kristus 'o dadunu 'ahu moju Tai sengene sababu 'Ai Ḇaḇa ma kuasa ga'a mulia, so'o gena ḏi'i ngene wo sanga 'ahu su-sungi.

Roma 8:29

Sababu 'ua re 'au wali ananga ga'a Ma Jou'ongu Madutu ro cumutu di'a dadi 'Ai ngowa-ngowa'a, Unanga ya'u sitantukanga ḏua mangale ananga gena-ge manga tabeata 'i ma tero sa'olo 'Ai Ngowa'a Nau'u 'Ai tabeata. Dadi Yesus gena-ge 'o dadi ngowa'a nau'u ma jomolo, re ngene wo dadi 'Ai no-nongoḏu ma repe.

2 Korintus 3:18

'Orasa nange-ne, enanga ma tero sa'olo Ma Jou ra woi'i jujuwurungu ra ngene mo-moini tananga fikirana. Dadi ngene wo basono Ma Jou 'ai mulia, gena-ge 'Ai kuasa. Sababu gena-ge, ngene nanga 'ahu 'i ngali 'i dadi ma tero sa'olo Unanga; lebe ti'ara lebe sijumu 'Ai kuasa tananga 'ahu. Kuasa gena-ge da'u ra Ma Jou tala, ga'a Ma Ngagara 'Ofi-'Ofi.

2 Korintus 4:16

Kalaha minga lese 'i dadi cira wange moi-wange moi, minga 'akala re sinyingara ma dara 'i dadi su-sungi wange moi-wange moi. Sababu gena-ge, ngomi minga 'akala re sinyingara 'i rapo'o ua.

2 Korintus 4:6

Sababu Ma Jou'ongu Madutu ga'a 'o kanau, “Toma hafu-hafu, balasu 'i waiti tarangi,” Unanga gena-ge ro sigare 'Ai tarangi tananga 'akala re sinyingara ma dara. Ma Jou'ongu Madutu ro si'a'a so'o gena-ge, la ngene nyengara wa sahe Unanga 'ai mulia. Unanga 'ai mulia gena-ge 'i ma tero sa'olo ma tarangi ga'a wa oḏi'i ra Kristus 'ai biono. Dadi Unanga 'a siwaiti Ma Jou'ongu Madutu 'ai mulia ra ngene.

2 Korintus 5:17

Sababu gena-ge, na'o 'age rema ngowa'a ga'a raḏi marimoi ra Kristus, ananga gena-ge raḏi dadi manusia su-sungi. Manusia manga 'ahu ma siḏa ri cua. 'Orasa nange-ne, ananga manga 'ahu 'i dadi su-sungi.

Galatia 3:27

Re sababu ngini mo-moini reni sanga baptis ra Kristus 'ai lomanga, ngini reni dawongo Kristus ma tero sa'olo ni mapake 'Ai pakeanga.

Galatia 6:15

Bae sanga suna bae sanga suna ua, gena-ge 'i 'oru ua. Mada'a ma la-lamo'o ma re'u i'a so'o ne: Ngowa'a matengo balasu dadi ma tero sa'olo manusia su-sungi sababu ro dawongo 'ahu su-sungi toma Ngagara 'Ofi-'Ofi ino.

Efesus 2:10

sababu Ma Jou'ongu Madutu masiretene 'o 'a'a ngene manusia su-sungi wo marimoi ra Kristus Yesus. Ma Jou'ongu Madutu 'o tuhu ngene so'o gena-ge, la ngene nyengara wo 'a'a ga'a ma la-la, ga'a Unanga ra sidodahe di'a ngene.

Efesus 2:15

Unanga masiretene 'o sidoa'a 'Ai lese sa'olo jou-jou rimoi di'a 'A singi-ngiranga Musa 'ai hukumu re 'agama ma 'atoranga. 'Ai maksudu bangsa romoḏiḏi 'i dadi rimoi, ma tero sa'olo manusia su-sungi, ga'a marimoi ra Unanga. Reo duhu gena-ge, Kristus 'o sidame ngowa'a Yahudi re ngowa'a Yahudi ua.

Kolose 3:12

Ma Jou'ongu Madutu ro cumutu ngini sa'olo 'Ai 'umata ga'a ngowa'a 'ofi-'ofi re Unanga ro dadalara ngini. Sababu gena-ge, ngini ni 'ahu so'o ne: Ni riono matengo re matengo, ni pake 'akala rousu, ni maholo ninga diri, ni pake 'akala re sinyingara mereoso re 'akala ḇanyo.

Kolose 3:14

Mo-moini gena-ge ma la-lamo'o ma re'u i'a: Ngini balasu ni ma'u dadalara. Sababu dadalara gena-ge 'i si'a'a ngini ni 'ahu marimoi ti-tiai.

Filemon 1:6

Ngoi to manyiata sababu ngene rewo ma'u ḏagilomu sa'olo ngowa'a ngaku Yesus, ma hasili wa sahe lebe lamo'o i'a mangale barakati mo-moini ga'a ngene rewa sanga sababu wo marimoi ra Kristus.

'Ibrani 6:6

Mada'a togumu i'a, na'o ananga 'aḏi ngaku ra Yesus riwara, sanga ua ngene nga'unu wa'u siḏibo ananga toma ngo'omo boloto moju. Sababu gena-ge ma tero sa'olo ananga mau 'aḏi sisalib soi moi moju Ma Jou'ongu Madutu 'ai Ngowa'a Nau'u re ananga 'aḏi sipula'a mara'a Unanga toma mandan.

1 Yohanes 2:3

Na'o ngene wa mete'e tau-taunu 'oru ḇato ga'a Ma Jou'ongu Madutu 'ai parenta, gena-ge 'i dadi nana'o rimoi mangale ngene mode-mode'e wo nana'o Unanga.

1 Yohanes 2:5

Mada'a na'o 'age rema ngowa'a matengo mete'e tau-taunu 'oru ḇato ga'a Ma Jou'ongu Madutu 'ai demo, ngowa'a gena-ge 'o sijumu rai 'ahu ma duhu mangale 'o dadalara mode-mode'e Ma Jou'ongu Madutu. 'Ahu ma duhu so'o gena-ge 'i dadi didina'o rimoi mangale ngene nanga 'ahu wo marimoi mode-mode'e ra Ma Jou'ongu Madutu.

Tingoýi 21:5

Ma Jou'ongu Madutu ga'a 'O tegoro toma ḏe-ḏegoro gena-ge 'O kanau, “Nange-ne, Ngoi to 'a'a mo-moini 'i dadi su-sungi!” Unanga 'o kanau ḏi'i ra ngoi, “Nena-ne balasu na lefo, sababu demo-demo gena-ge 'i banari re tantu ḏua 'i sitotomo.”