Kolose 1:6 - Jaji ma Su-sungi

⁶ Habari Roanga gena-ge 'i singadolo ḏua toma dungia sitabi donga, singadolo ganapu dogo ngowa-ngowa'a ngaku Yesus re ya si'a'a tamanga de'oso re ḏegoro re demo re ganau 'i dadi la-la. So'o gena-ge ḏi'i, wakutu ngini reni 'isene, ngini ni ngaku Yesus re ni basono mode-mode'e Ma Jou'ongu Madutu 'ai mura re dadalara singadolo ninga de'oso re ḏegoro 'i dadi la-la.

Kolose 1:6 Iomraidhean Croise

Matias 24:14

Re Habari Roanga mangale Soroga ma Pareta, enanga ḏuanga i'a 'i rera re walata toma dungia sitabi donga, la ngowa'a mo-moini ya 'isene, kara Kiamata ma Wangere 'i sapolo.”

Matias 28:19

Sababu gena-ge, ni tagi toma bangsa mo-moini toma dungia sitabi donga, ni singadolo Habari mangale Ngoi, la ngowa'a 'aḏi dadi 'Ari me-mete'e. Ni baptis ananga gena-ge re siterongo Ḇaḇa 'ai lomanga, Ma Ngowa'a Nau'u 'ai lomanga, re Ma Ngagara 'Ofi-'Ofi ma lomanga.

Markus 16:15

Ḏua, Yesus 'o kanau ra ananga, “Ni tagi sikoloḏi dungia, re ni singadolo Habari Roanga da'u ra Ma Jou'ongu Madutu tala toma ngowa'a mo-moini.

Markus 4:8

Mada'a 'age mamuni'a ḏi'i 'i eta'a toma tana'a ma la-la'eme, gisisi gena-ge 'i konyo rema ma go-gonyo lai rousu singadolo 'i sowo'o: 'Age ma sowo'o sidu'o sou nyagi ro'ange, 'age ma sowo'o sidu'o sou nyagi rarama re 'age ma sowo'o sidu'o sou latu moi.”

Yohanes 15:16

Ngini nena-ne ni cumutu Ngoi ua. Siḏibo ḏi'i, Ngoi nena-ne reto cumutu ngini ḏua, re Tini 'utusu ni tagi, la ninga sowo'o lai repe, re enanga gena-ge sowo'o kasingado-ngadolo i'a. Dadi 'oru ḇato ga'a ngini golo'o Tari Ḇaḇa ni pake 'Ari lomanga, ngini ḏuanga i'a ni sanga.

Yohanes 17:19

Ngoi ta sidoa'a 'Ari 'ahu ra Baba di'a mete'e 'Ani mau, la ananga ḏi'i 'aḏi sidoa'a manga 'ahu di'a 'aḏi mete'e 'Ani mau, sababu ananga raḏi ngaku 'Ani do-doto'o ga'a 'i banari.”

Yohanes 4:23

Mada'a enanga ma 'orasa ḏuanga i'a 'i ngadolo - re nange-ne ma 'orasa gena-ge 'i ngadolo ḏua - wakutu ngowa-ngowa'a ga'a mau 'aḏi silamo'o re siḏubuso Ma Jou'ongu Madutu manga Ḇaḇa ananga gena-ge balasu 'aḏi pake Ma Ngagara 'Ofi-'Ofi re pa'i 'aḏi mete'e Ma Jou'ongu Madutu 'ai ba-banari ḇato. Sababu ananga ga'a 'aḏi silamo'o re siḏubuso so'o gena-ge 'aḏi sisanangi Ma Jou'ongu Madutu 'ai 'akala re sinyingara.

Yesus 'ai so-soma'a 11:18

Ananga ya 'isene pasala i'a, ya lawana riwara re 'aḏi puji re silamo'o Ma Jou'ongu Madutu 'aḏi kanau, “Sababu gena-ge, Ma Jou'ongu Madutu 'o pula'a loasa ḏi'i toma ngowa'a Yahudi ua di'a 'aḏi maḏibo toma ngo'omo boloto re 'aḏi sanga 'ahu kasingado-ngadolo i'a!”

Yesus 'ai so-soma'a 12:24

Mada'a Ma Jou'ongu Madutu 'ai demo ganapu rera re walata singadolo ngowa'a repe 'aḏi ngaku Ma Jou Yesus.

Yesus 'ai so-soma'a 16:14

'Age rema ngowa'a matengo mo mawu'unu 'ami bu-bu'unu ḇa'a ungu tamanga sigolona. 'Ami lomanga ngo Lidia mi 'asala toma limau Tiatira ino re munanga mo silamo'o re siḏubuso Ma Jou'ongu Madutu. Ma Jou'ongu Madutu 'o siwelanga 'ami 'akala re sinyingara singadolo munanga mo dawongo 'a Paulus 'ai do-doto'o.

Yesus 'ai so-soma'a 26:18

di'a na siwelanga manga la'o, la 'aḏi supu toma hafu-hafu re 'aḏi osama toma tarangi ma dara re silalo'o ananga toma 'Iblisi ma pareta re 'aḏi osama nyo-nyoimi ra Ma Jou'ongu Madutu 'ai Pareta, la Unanga 'a singi-ngiranga manga ḏosa-ḏosa re 'aḏi dadi 'Ai 'umata ga'a Unanga 'o cumutu ḏua sababu ananga 'aḏi ngaku Ngoi.’ ”

Roma 1:13

Ioronongoḏu ngo-ngaku rimoi, ngoi to mau ngini ni waro mangale soi muḏuo ḏua ngoi 'ari maksudu tini tutumu ngini, mada'a singadolo nange-ne rema dola'aku. Ngoi 'ari maksudu di'a tutumu ngini, la 'ari munara taninga sigolona sigasa ngowa'a di'a ngaku Yesus Kristus, ma tero sa'olo 'ari munara toma gamu-gamu ma lelegu, ri sigasa ngowa'a Yahudi ua di'a raḏi ngaku Unanga.

Roma 15:19

Ngoi nga'unu to 'a'a didina'o heranga re 'ori i'a hera-heranga sababu Ma Ngagara 'Ofi-'Ofi ma kuasa. Dadi Habari Roanga mangale Kristus, ngoi reta singadolo toma ngowa'a mo-moini: mulaingi toma limau Yerusalem singadolo toma limau Ilirikum.

Roma 15:28

Sababu gena-ge, si-siḏa ngoi balasu to siḏuanga 'ari munara gena-ge di'a to pula'a bu-bula'a ra ananga toma Yerusalem. Togumu i'a, ngoi to tagi toma Spanyol to tola'a i'a ngini ninga limau Roma.

Roma 16:26

Mada'a nange-ne mete'e Ma Jou'ongu Madutu 'ai parenta, Unanga ga'a 'ahu kasingado-ngadolo i'a, habari gena-ge 'i siajele re sijumu toma bangsa mo-moini mete'e nabi-nabi manga boku, la ngowa'a mo-moini nyengara ya ngaku re ya mete'e Unanga.

2 Korintus 10:14

Sababu gena-ge, wakutu ngomi mi siajele mangale 'au nga'ene ngomi mi sapolo di'a mi singadolo Habari Roanga ra ngini, mode-mode'e ngomi supu ua taminga daeraha munara ma bati. Sababu 'au nga'ene, ngomi remi singadolo Habari Roanga mangale Kristus ra ngini.

2 Korintus 6:1

Sababu ngomi mi munara mamete'e ra Ma Jou'ongu Madutu, mi golo'o mode-mode'e ra ngini, awa ni siparasaja Ma Jou'ongu Madutu 'ai mura re dadalara ra ngini.

Efesus 3:2

Tantu ḏua, ngini reni 'isene mangale Ma Jou'ongu Madutu ro siwatasa munara ra ngoi di'a to singadolo Habari Roanga ra ngini sababu Unanga 'ai mura re dadalara.

Efesus 4:21

Ngoi ta waro mode-mode'e mangale ngini reni 'isene mangale Kristus. Re sababu ngini ni marimoi ra Unanga gena-ge, ngini reni sanga do-doto'o banari mangale Kristus:

Efesus 4:23

Ngini reni dawongo do-doto'o mangale ngini balasu ni sipula'a ninga fikirana ra Ma Jou'ongu Madutu, la 'A singali reo fikirana su-sungi.

Efesus 5:9

Sababu na'o ngini ni 'ahu toma tarangi gena-ge, ngini ḏuanga i'a madaga'a 'ori i'a la-la mo-moini re ninga de'oso re ḏegoro 'i boloto re banari ra Ma Jou'ongu Madutu 'ai momina.

Filipi 1:11

Re ḏi'i mangale ninga 'ahu ma duhu enanga 'i romanga reo de'oso re ḏegoro ma la-la ga'a pa'i sababu Yesus Kristus masiretene 'ai kuasa ḇato. Dadi ngowa'a ḏuanga i'a 'aḏi simulia re 'aḏi puji re silamo'o Ma Jou'ongu Madutu.

Filipi 4:17

Ngoi 'ari maksudu ua, ngoi to nyafusu to dawongo ninga bu-bula'a! Mada'a ngoi to nyafusu Ma Jou'ongu Madutu 'o pula'a barakati 'i madogo-dogo ra ngini sababu ngini ni riono ngoi pasala ḏua.

Kolose 1:10

Dadi, ngini nga'unu ni 'ahu mete'e Ma Jou'ongu Madutu 'ai 'akala ma mau, la ni sisanangi Unanga 'ai 'akala re sinyingara. Re ḏi'i ngini ninga ga'a la-la fara muḏuo i'a re ninga wo-waro mangale Ma Jou'ongu Madutu, enanga gena-ge 'i ganapu madogo-dogo toma 'ori i'a mo-moini.

Kolose 1:23

Mada'a ngini balasu ni cako'o namo-namoto ninga ngo-ngaku kama elala awa toma Habari Roanga. Re ḏi'i ngini ni matogumu awa ni masinganono mangale 'oru ga'a toma Habari Roanga ra Ma Jou'ongu Madutu ga'a ro sijaji ra ngini. Habari Roanga gena-ge ya singadolo ḏua di'a ngowa-ngowa'a toma dungia sitabi donga. Ngoi, Paulus, reto dadi falalomu ḏi'i di'a singadolo Habari Roanga gena-ge.

1 Tesalonika 1:5

Ngomi mawaro gena-ge 'i banari, sababu wakutu ngomi mi singadolo Habari Roanga ra ngini 'i mete'e pa'i ngomi minga demo-demo ḇato ua, mada'a 'i mete'e rema Ngagara 'Ofi-'Ofi ma kuasa. Sidogo ḏi'i, ngomi mi sijumu ra ngini mangale ngomi mi ngaku mode-mode'e Habari Roanga gena-ge 'i banari, sababu ngini masiretene ni waro ma duhu sa'olo ngomi mi 'ahu de-de'oso ngini wakutu ngomi taninga sigolona.

1 Tesalonika 2:13

'Age fara moi moju 'i si'a'a ngomi mi sibere ie minga murasa ma la tau-taunu ra Ma Jou'ongu Madutu, sababu wakutu ngomi mi singadolo habari ra Ma Jou'ongu Madutu ino, ngini ni 'isene re ni ngaku habari gena-ge ma tero ua manusia manga demo, mada'a sa'olo demo ra Ma Jou'ongu Madutu ino, ga'a 'i banari. Unanga 'o munara tau-taunu sipake habari gena-ge taninga 'akala re sinyingara ma dara, ngini gena-ge ga'a reni ngaku Kristus.

2 Tesalonika 2:13

Ioronongoḏu ngo-ngaku rimoi ga'a Ma Jou Yesus 'o dadalara, mode-mode'e 'i banari mangale ngomi mi sibere ie minga murasa ma la ra Ma Jou'ongu Madutu tau-taunu mangale ngini. Sababu toma 'ua re 'au wali moju Ma Jou'ongu Madutu 'o cumutu ḏua ngini, la sisalamata ngini. Enanga gena-ge 'i dadi, sababu Ma Ngagara 'Ofi-'Ofi 'i sidadi ngini Unanga 'ai ngowa'a 'ofi-'ofi, re sababu ngini ni ngaku habari banari ra Ma Jou'ongu Madutu ino.

1 Petrus 5:12

Wakutu ngoi to lefo surata nena-ne 'i kiḏanga ua, 'a Silwanus 'o riono ngoi. Re ngoi to waro unanga sa'olo ioronongoḏu ngo-ngaku rimoi ga'a 'o munara cufala ra Yesus. Tari surata gena-ge ma dara, to babata ngini re to siajele mode-mode'e mangale ma duhu sa'olo Ma Jou'ongu Madutu 'o sijumu 'ai mura re dadalara ra ngene. Kalaha ngini reni sanga sangisara, awa ni matogumu ni macako'o namo-namoto Tai mura re dadalara gena-ge.