Kolose 1:27 - Jaji ma Su-sungi

²⁷ Ma Jou'ongu Madutu mau 'a siwaiti Tai 'umata mangale 'ai rahasia ga'a 'i rousu re mulia gena-ge di'a ngini, ngowa'a Yahudi ua. Rahasia gena-ge Kristus 'o tegoro taninga 'akala re sinyingara ma dara. Dadi ngini ni waro mode-mode'e ḏuanga i'a Ma Jou'ongu Madutu 'o pula'a 'Ai mulia ma balangu ra ngini.

Kolose 1:27 Iomraidhean Croise

Matias 13:11

Yesus 'a sangoro, “Ngini reni sanga cocatu di'a ni sahe 'ori i'a go-gogono mangale Soroga ma Pareta, mada'a toma ngowa'a lelegu so'o gena ua.

Lukas 17:21

Ngowa'a 'aḏi kanau yoḏu'u, ‘Enanga nanga 'ane!’ bolo ‘Enanga nanga da'a!’ Sababu Ma Jou'ongu Madutu 'ai Pareta 'i tegoro ra ngini ninga 'akala re sinyingara ma dara.”

Yohanes 14:17

Ri-riono gena-ge Ma Ngagara 'Ofi-'Ofi ra Ma Jou'ongu Madutu tala. Enanga gena-ge 'i siajele mangale ba-banari ra Ma Jou'ongu Madutu tala. Ngowa'a toma dungia nena-ne 'aḏi dawongo Enanga ua, sababu ananga gena-ge 'aḏi oḏi'i ua re 'aḏi nana'o Enanga ua. Mada'a ngini ni nana'o Enanga gena-ge, sababu Enanga 'i mamete'e ra ngini re ḏuanga i'a 'I marimoi ra ngini.

Yohanes 14:20

Wakutu ma wangere enanga 'i ngadolo ḏua ga'a Ngoi dadunu to 'ahu moju, ngini ḏuanga i'a ni waro mangale Ngoi re 'Ari Ḇaḇa, ngomi mi marimoi. Re ngini ni marimoi ra Ngoi, re Ngoi to marimoi ra ngini.

Yohanes 14:23

Yesus 'o sangoro, “Na'o 'a guna ḇato 'o dadalara Ngoi, unanga 'a mete'e 'Ari do-doto'o. 'Ari Ḇaḇa ḏuanga i'a 'o dadalara unanga. Re 'Ari Ḇaḇa re Ngoi, ngomi mi sapolo ra unanga remi tegoro marimoi ra unanga.

Yohanes 17:26

Ngoi reta siajele ḏua mangale Baba ra ananga, re Ngoi ḏuanga i'a ta siajele tau-taunu, la ananga 'aḏi basono tala 'Ani dadalara tamanga 'akala re sinyingara ma tero Ngoi to basono tala 'Ani dadalara Tari 'akala re sinyingara re dadi Ngoi ḏi'i to tegoro tamanga 'akala re sinyingara.”

Yohanes 6:56

'A guna ḇato 'o oromo 'ari lese re ka'e 'ari ngaunu, unanga gena-ge 'o marimoi ra Ngoi, re Ngoi to marimoi ra unanga.

Roma 11:33

Ma Jou'ongu Madutu 'ai mura re dadalara ma pari cua toma ngowa'a mo-moini. Unanga gena-ge 'Ai 'akala ma soro'unu re 'Ai wo-waro ma pari cua ḏi'i. 'A guna ua nga'unu 'a sahe Unanga 'ai maksudu! 'A guna ua nga'unu 'a sahe Unanga 'ai ngo'omo!

Roma 2:4

Awa ni ta'ajiri ngini ni paralu ua ni maḏibo toma ngo'omo boloto, sababu Ma Jou'ongu Madutu 'ai 'akala re sinyingara ma la-la, re sababu Unanga 'ai 'akala ḇanyo lai lamo'o; dadi jau-jau Unanga 'o sihukumu ngini ua. Ngini ni waro ua, Unanga 'ai de'oso re ḏegoro so'o gena-ge ra ngini, la ngini ni sanga donga di'a ni maḏibo toma ngo'omo boloto.

Roma 5:2

Re ḏi'i, sababu ngene rewo ngaku Yesus Kristus, ngene wo basono Ma Jou'ongu Madutu 'ai mura re dadalara tananga 'ahu tau-taunu sababu 'oru ga'a Yesus Kristus ro 'a'a di'a ngene. Re ngene wo maroanga, sababu ngene renanga ngo-nganono 'i te'e mangale ḏuanga i'a ngene wo sanga balangu ra Ma Jou'ongu Madutu 'ai mulia.

Roma 8:10

Mada'a, kalaha ninga lese ḏuanga i'a 'i sengene sababu ḏosa, na'o Kristus 'age taninga 'akala re sinyingara ma dara, Ma Ngagara 'Ofi-'Ofi 'i pula'a ngini 'ahu kasingado-ngadolo i'a sababu ngini reni dadi ngowa'a loasa re banari ra Ma Jou'ongu Madutu 'ai momina.

Roma 9:23

Re ḏi'i Ma Jou'ongu Madutu mau 'o sijumu 'Ai mulia ma pari cua ra ngene 'Ai 'umata ga'a Unanga na sijumu 'Ai 'akala re sinyingara ma la-la, ngene ga'a Unanga ra sidodahe di'a 'ahu ga'a 'i mulia toma soroga.

1 Korintus 3:16

Ngini ni waro bolo ua, mangale ngini gena-ge sa'olo Ma Jou'ongu Madutu 'ai Wala?! Re Ma Ngagara 'Ofi-'Ofi ra Ma Jou'ongu Madutu tala, Enanga 'i tegoro taninga sigolona?!

2 Korintus 2:14

Mada'a nange-ne ngoi ta sibere ie 'ari murasa ma la ra Ma Jou'ongu Madutu, sababu ngomi mi marimoi ra Kristus, Unanga 'o gasa ngomi ma tero sa'olo 'Ai sordado ga'a mi 'utungu taminga lawana 'Iblisi. Unanga 'o pake ngomi di'a singadolo Habari Roanga toma dungia sitabi donga mangale Kristus. Habari Roanga gena-ge ma tero sa'olo manyanyi ma bounu lai sa'i.

2 Korintus 4:17

Nange-ne ngomi basono sangisara mada'a gena-ge 'i ti'ara ua re ḏubuso woḏi ua. Ḏuanga i'a ngomi mi sanga ngogele lai lamo'o. Re na'o site-tero ngogele gena-ge reo sangisara ga'a mi basono, ngogele gena-ge ma pari cua re kama ḏo-ḏogumu ua.

2 Korintus 4:6

Sababu Ma Jou'ongu Madutu ga'a 'o kanau, “Toma hafu-hafu, balasu 'i waiti tarangi,” Unanga gena-ge ro sigare 'Ai tarangi tananga 'akala re sinyingara ma dara. Ma Jou'ongu Madutu ro si'a'a so'o gena-ge, la ngene nyengara wa sahe Unanga 'ai mulia. Unanga 'ai mulia gena-ge 'i ma tero sa'olo ma tarangi ga'a wa oḏi'i ra Kristus 'ai biono. Dadi Unanga 'a siwaiti Ma Jou'ongu Madutu 'ai mulia ra ngene.

2 Korintus 6:16

Sanga ua, Ma Jou'ongu Madutu 'ai Wala ma ngi'i ma tero sa'olo jou'ongu ma somoara ma wala! Re ngene ma tero sa'olo Ma Jou'ongu Madutu 'ai Wala, sababu Unanga gena-ge ga'a 'O 'ahu kasingado-ngadolo i'a 'O tegoro tananga 'akala re sinyingara ma dara. Ma Jou'ongu Madutu masiretene ro kanau so'o ne: “Ngoi ḏuanga i'a to tegoro tamanga sigolona re To 'ahu ma'u mete'e ra ananga. Ngoi ḏuanga i'a to dadi Ma Jou'ongu Madutu ga'a ananga 'aḏi silamo'o re siḏubuso, re ananga 'aḏi dadi Ngoi 'ari 'umata.”

Galatia 2:20

'Ari 'ahu ne, ngoi 'ari 'ahu 'ua mada'a Kristus masiretene ro 'ahu ra ngoi. 'Ahu ga'a ngoi ta basono nange-ne sababu ngoi to ngaku Ma Jou'ongu Madutu 'ai Ngowa'a Nau'u ga'a 'o dadalara ngoi re Unanga 'o sengene di'a ngoi.

Galatia 4:19

'Ari ngowa-ngowa'a ga'a tunu dadalara, 'orasa nange-ne ngoi to basono kangela ma tero sa'olo we-were'a matengo mo basono sangisara sa'i mo maḏe-ḏegoro i'a. Ngoi ḏuanga i'a ta basono kangela, singadolo Kristus 'ai de'oso re ḏegoro ri konyo tiai taninga 'akala re sinyingara ma dara.

Efesus 1:7

Ngene rewo marimoi ra Kristus. Dadi gena-ge ma ngale Ma Jou'ongu Madutu ro singi-ngiranga nanga ḏosa-ḏosa re Unanga ro sibebasa ngene sababu Yesus 'ai ngaunu ri pa'ala di'a ngene. Gena-ge ri dadi sababu 'Ai mura re dadalara ga'a kama tola'a ua di'a ngene.

Efesus 2:22

Sababu ninga 'ahu marimoi ra Kristus, ngini ḏi'i ni mamete'e reo ngowa'a lelegu, ni simomi'i sa'olo wala ḏu moi di'a Ma Jou'ongu Madutu. Wala gena-ge, Ma Ngagara 'Ofi-'Ofi 'i tegoro.

Filipi 4:19

Re 'ari Jou'ongu Madutu, Unanga ga'a kai kuranga 'oru ua. Unanga gena-ge ḏuanga i'a 'o pula'a 'oru ḇato ga'a ngini ni paralu sababu ni marimoi ra Kristus Yesus.

Kolose 1:5

Ngini ni ngaku Yesus Kristus re ni dadalara Ma Jou'ongu Madutu 'ai 'umata, sababu ngini ni masinganono mode-mode'e ḏuanga i'a ni sanga barakati ga'a Ma Jou'ongu Madutu 'o sidodahe ḏua toma soroga di'a ngini. Ngini reni 'isene mangale Habari Roanga ga'a 'i ba-banari, wakutu ngowa'a ya singadolo gena-ge ra ngini.

Kolose 2:3

Pa'i ra Kristus gena-ge ḇato, toma ngowa'a lelegu 'i cua, 'akala soro'unu re wo-waro mo-moini mangale Ma Jou'ongu Madutu. Enanga gena-ge 'i ma tero sa'olo harata ga'a 'ua re 'au wali moju 'i go-gogono.

Kolose 3:11

Toma 'ahu su-sungi ma dara, ngene wo siwo-wola rawara ngowa'a Yahudi re ngowa'a Yahudi ua, ngowa'a ma suna re ma suna ua, ngowa'a tagi-tagi ino, re ngowa'a biadab, ngowa'a budaka re ngowa'a bebasa. Sababu Kristus lebe la-lamo'o i'a reo mo-moini gena-ge re Unanga ḏi'i 'o tegoro Tai 'umata manga 'akala re sinyingara ma dara mo-moini.

1 Timotius 1:1

Ngoi, Paulus, to lefo surata nena-ne ra ngana, Timotius, ga'a ma tero ḇato sa'olo ngoi 'ari ngowa'a madutu, sababu ngana re ngoi, ngene rewo ngaku Ma Jou Yesus. Ngoi to dadi Kristus Yesus 'ai so-soma'a mete'e Ma Jou'ongu Madutu 'ai parenta, Unanga ga'a nanga Salamata ma Cimi, re ḏi'i mete'e Yesus Kristus 'ai parenta, Unanga ga'a nanga ngo-nganono. Ngoi to golo'o ra Ma Jou'ongu Madutu nanga Ḇaḇa re Yesus Kristus nanga Jou di'a 'aḏi sijumu 'akala re sinyingara ma la-la re 'aḏi pula'a mura re dadalara re ḏi'i dame ra ngana.

'Ibrani 6:19

Ngene nanga ngo-nganono gena-ge ma tero sa'olo kapala ma tapu 'i otomo lai ngido toma ngoloto, la nanga ngo-ngaku 'i elala ua. Dadi sababu ngo-nganono lai te'e, enanga ma tero sa'olo ngene wo osama toma soroga ḏua. Gena-ge ma tero sa'olo nanga 'Imam 'Agung ga'a ro palisi ngalana ma da-daku kole-kole ro osama toma Kamara Lai 'Ofi-'Ofi.

1 Yohanes 4:4

Ngini, 'ari ngowa-ngowa'a, reni dadi Ma Jou'ongu Madutu 'ai ngowa-ngowa'a. Ngini reni 'utungu talaḏi toma nabi-nabi sa-sakala gena-ge. Sababu Ma Ngagara 'Ofi-'Ofi ga'a 'age ra ngini, lebe kuasa reo 'Iblisi ga'a ḏegoro dungia ma ngowa-ngowa'a, ananga gena-ge ga'a ngaku Yesus ua.

Tingoýi 3:20

Oḏi'i! Ngoi toma de-de'oso taninga ngalana, re to tolo'o. Na'o 'a guna ḇato 'o 'isene 'Ari iḏingi, re 'a welanga ma ngalana, Ngoi ḏuanga i'a to osama ma'u sanga ra unanga, kara ngomi mi oromo mamete'e.