Kolose 1:15 - Jaji ma Su-sungi

¹⁵ Ngene wo oḏi'i yoḏu'u Ma Jou'ongu Madutu mada'a 'a Kristus unanga gena-ge Ma Jou'ongu Madutu 'ai gabara mode-mode'e. Kristus 'o parenta Ma Jou'ongu Madutu 'ai do-dadi mo-moini, ma tero sa'olo ngowa'a nau'u ma jomolo ga'a 'o parenta 'ai nongoḏu,

Kolose 1:15 Iomraidhean Croise

Yohanes 1:1

'Ua re 'au wali wakutu dungia 'i dadi nyangu, 'Idini rema enanga ḏua. 'Idini gena-ge 'i mamete'e ra Ma Jou'ongu Madutu, re 'Idini gena-ge ḏi'i Ma Jou'ongu Madutu.

Yohanes 1:14

'Idini gena-ge ri dadi manusia, re Unanga 'o tegoro tananga sigolona re wa oḏi'i ḏua 'Ai kabasarana. Kabasarana gena-ge ma 'asala ra Ma Jou'ongu Madutu sababu Unanga 'Ai Ngowa'a Nau'u pa'i matengo. Sababu Unanga, ngene wa basono tala Ma Jou'ongu Madutu 'ai mura re dadalara masala ra ngene, re Unanga 'o sijumu ma ba-banari mangale Ma Jou'ongu Madutu ra ngene.

Yohanes 1:18

Matengo i'a mai nyangu ro oḏi'i Ma Jou'ongu Madutu, mada'a pa'i 'Ai Ngowa'a Nau'u matengo, ga'a 'O marimoi rai Ḇaḇa. Unanga gena-ge ra sibaiti re Ra sitarangi mangale Ma Jou'ongu Madutu ra ngene.

Yohanes 14:9

Yesus 'o sangoro, “Filipus, ma di'ara ḏua Ngoi 'age taninga sigolona, i'a sa'olo nange-ne ngana no nana'o Ngoi ua?! Ngowa'a ga'a raḏi oḏi'i Ngoi, raḏi oḏi'i 'Ari Ḇaḇa ḏi'i. Dadi i'a sa'olo ngana no kanau, ‘Sijumu Ḇaḇa gena-ge ra ngomi’?

Yohanes 15:24

Na'o Ngoi to 'a'a ua ga'a hera-heranga tamanga sigolona ga'a matengo i'a mai ua 'o si'a'a yoḏu'u, ananga kamanga sala ua, sababu kamanga donga ua di'a 'aḏi oḏi'i 'Ari ga'a hera-heranga re 'aḏi ngaku Ngoi. Mada'a nange-ne, ananga gena-ge raḏi oḏi'i 'Ari ga'a hera-heranga gena-ge, mada'a ananga raḏi emono Ngoi re raḏi emono 'Ari Ḇaḇa ḏi'i.

Yohanes 3:16

Ma Jou'ongu Madutu 'o dadalara manusia toma dungia ma tero so'o ne: Unanga ro 'utusu 'Ai Ngowa'a Nau'u pa'i matengo, la 'a guna ḇato 'o ngaku 'Ai Ngowa'a Nau'u gena-ge, 'o iranga ua kasingado-ngadolo i'a, mada'a 'o sanga 'ahu kasingado-ngadolo i'a.

Roma 8:29

Sababu 'ua re 'au wali ananga ga'a Ma Jou'ongu Madutu ro cumutu di'a dadi 'Ai ngowa-ngowa'a, Unanga ya'u sitantukanga ḏua mangale ananga gena-ge manga tabeata 'i ma tero sa'olo 'Ai Ngowa'a Nau'u 'Ai tabeata. Dadi Yesus gena-ge 'o dadi ngowa'a nau'u ma jomolo, re ngene wo dadi 'Ai no-nongoḏu ma repe.

2 Korintus 4:4

'Iblisi ga'a 'i kuasa dungia ya kuci ngowa'a manga fikirana singadolo ananga 'aḏi ngaku awa, re 'aḏi oḏi'i yoḏu'u Habari Roanga ma cahaya ga'a 'i waiti ra Kristus 'ai mulia. Unanga gena-ge ma tero Ma Jou'ongu Madutu 'ai gabara.

2 Korintus 4:6

Sababu Ma Jou'ongu Madutu ga'a 'o kanau, “Toma hafu-hafu, balasu 'i waiti tarangi,” Unanga gena-ge ro sigare 'Ai tarangi tananga 'akala re sinyingara ma dara. Ma Jou'ongu Madutu ro si'a'a so'o gena-ge, la ngene nyengara wa sahe Unanga 'ai mulia. Unanga 'ai mulia gena-ge 'i ma tero sa'olo ma tarangi ga'a wa oḏi'i ra Kristus 'ai biono. Dadi Unanga 'a siwaiti Ma Jou'ongu Madutu 'ai mulia ra ngene.

Filipi 2:6

Yesus ma tero ra Ma Jou'ongu Madutu, mada'a 'Ai ḏe-ḏegoro gena-ge, Yesus 'o matahana ua.

Kolose 1:13

Unanga ro sibebasa ngini toma kuasa hafu-hafu, kara 'O sigasa re 'O singosama ngini tai Ngowa'a Nau'u 'Ai pareta ma dara. Unanga gena-ge, Ma Jou'ongu Madutu 'U dadalara.

1 Timotius 1:17

Ngene balasu silamo'o re siḏubuso Ma Jou'ongu Madutu re silamo'o 'Ai lomanga kasingado-ngadolo i'a, sababu Unanga 'o 'Olana da'a re sino moju ga'a 'O 'ahu kasingado-ngadolo i'a, re ngene wo oḏi'i yoḏu'u, Unanga pa'i matengo. 'Amin.

1 Timotius 6:16

Unanga gena-ge ḇato, maut 'u 'aturu yoḏu'u, 'o 'ahu toma cahaya ga'a manusia ngene wo sebanga i'a mai yoḏu'u, manusia matengo i'a mai nyangu wo oḏi'i unanga. Dadi ino ngene wu silamo'o Unanga ga'a 'O patasa di'a 'O parenta kasingado-ngadolo i'a. 'Amin.

'Ibrani 1:3

'Ai Ngowa'a Nau'u gena-ge 'A sijumu Ma Jou'ongu Madutu 'ai kuasa re 'Ai kabasarana. Unanga gena-ge 'ai duhu re ngari mo-moini ma tero Ma Jou'ongu Madutu. Unanga 'a pake 'ai demo ma kuasa di'a 'O jaga re 'O parenta mo-moini. Unanga 'o sigofi ngowa'a manga ḏosa togumu i'a, kara 'O tegoro ra Ma Jou'ongu Madutu 'ai giama ma kuwiḏa i'a da'u toma soroga.

'Ibrani 1:6

Re wakutu Ma Jou'ongu Madutu 'o 'utusu 'Ai Ngowa'a Nau'u ma jomolo toma dungia nena-ne, Ma Jou'ongu Madutu 'o kanau so'o ne: “Mala'ekata mo-moini balasu 'o silamo'o re siḏubuso 'Ari Ngowa'a Nau'u.”

'Ibrani 11:27

Sababu Musa 'ai ngo-ngaku, kalaha 'olana Mesir 'o ruta, Musa kai mojongo ua 'a sisoi'i tala Mesir. Unanga tagi mete'e tau-taunu Ma Jou'ongu Madutu sababu ma tero sa'olo unanga ro oḏi'i Ma Jou'ongu Madutu ga'a oḏi'i yoḏu'u.

Tingoýi 3:14

Yesus gena-ge 'o kanau ra ngoi ḏi'i, “Toma jama'ata Laodikia ma mala'ekata, na lefo so'o ne: Nena-ne habari ra Ngoi ga'a si'aro'o 'a 'Amin. Ngoi gena-ge Sakisi ma cufala ga'a Ta sijumu tau-taunu 'ori i'a ba-banari ra Ma Jou'ongu Madutu ino, re Ngoi Unanga 'Ai do-dadi ma cimi.