'Ibrani 9:23 - Jaji ma Su-sungi

²³ Sababu gena-ge, 'oru ḇato ga'a ra Ma Jou'ongu Madutu 'ai suyu'u ma dara toma dungia nena-ne, ananga balasu ya sigofi reo haiwani ma ngaunu. Gena-ge 'i dadi gabara 'oru ga'a 'i dadi toma soroga. Mada'a 'oru ḇato ra Ma Jou'ongu Madutu 'ai suyu'u ma dara toma soroga, tantu ḏua enanga gena-ge 'i paralu ngaunu ga'a lebe la-lamo'o reo haiwani ma ngaunu.

'Ibrani 9:23 Iomraidhean Croise

Lukas 24:26

Tantu ḏua, 'O Kristus balasu 'a basono ma sangisara kara nga'unu 'o osama Tai mulia.”

Lukas 24:46

Unanga 'o kanau ra ananga, “Toma Boku 'Ofi-'Ofi ma dara 'i silefo mangale 'O Kristus balasu basono sangisara, re sengene re toma wangere ma soi ro'ange Unanga dadunu 'o 'ahu moju.

Yohanes 14:3

Ngoi ḏuanga i'a to tagi to sidodahe kamara di'a ngini. Sababu gena-ge, Ngoi dadunu to sapolo moju di'a Tini gasa Tari ngi'i, la le'a Ngoi gena, ngini gena ḏi'i.

Yesus 'ai so-soma'a 23:15

Sababu gena-ge, nange-ne ngomi mi golo'o ra ngini re Mahkamah 'Agama ni siḏingoto surata toma Roma manga sordado la-lamo'o la unanga 'o soma'a 'a Paulus 'u sitalaḏi ra Mahkamah 'Agama di'a dadunu mu 'urusu Paulus. Mada'a mi masa-sakala ḇato. Ngomi mi totoma unanga toma ngo'omo ma golona di'a mu sisengene.”

Kolose 2:17

'Agama ma 'atoranga re hukumu mo-moini gena-ge enanga 'i ma tero sa'olo guḏumingi ra Kristus, ga'a ḏuanga i'a 'O sapolo. Mada'a Unanga gena-ge ro sapolo re Ro gasa salamata ra ngene.

'Ibrani 10:1

Musa 'ai hukumu pa'i pula'a guḏumingi ḇato 'oru 'ori i'a la-la ga'a enanga ḏuanga i'a 'i dadi. Hukumu gena-ge nga'unu 'i sigasa ua 'ori i'a la-la ga'a Ma Jou'ongu Madutu ra sijaji pasala ḏua. Sababu gena-ge, sanga ua enanga gena-ge nga'unu ya sigofi ngowa'a manga ḏosa wakutu ananga 'aḏi sapolo di'a silamo'o re siḏubuso Ma Jou'ongu Madutu reo jou-jou ga'a ananga ya gasa. Sababu musungu rimoi-musungu rimoi ananga balasu ya si'a'a so'o gena-ge!

'Ibrani 10:4

Sababu sapi ma ngaunu re 'abingi ma nau'u ma ngaunu 'i singi-ngiranga ngowa'a manga ḏosa yoḏu'u.

'Ibrani 8:5

'Imam-'imam gena-ge manga munara ra Ma Jou'ongu Madutu 'ai Kamara Lai 'Ofi-'Ofi toma dungia nena-ne. Kamara Lai 'Ofi-'Ofi gena-ge ma tero sa'olo gabara bolo guḏumingi di'a Kamara Lai 'Ofi-'Ofi toma soroga. Gena-ge ma sababu wakutu Musa mau 'o side'oso Ma Jou'ongu Madutu 'ai suyu'u, Unanga 'o kanau ra Musa so'o ne: “ 'Elingi, ngana balasu no 'a'a suyu'u gena-ge mete'e ma gabara Ngoi reta sijumu ra ngana toma kie 'au nga'ene.”

'Ibrani 9:14

Na'o ngaunu re 'omanga gena-ge nga'unu 'i sigofi ngowa'a manga lese, Kristus 'ai ngaunu ma kuasa lebe lamo'o i'a: Unanga 'ai ngaunu nga'unu sigofi nanga 'akala re sinyingara ma kanau ga'a 'i faja moju sababu ngene wo mete'e 'agama ma 'atoranga ga'a ma faeda 'i cua, la ngene nga'unu wo silamo'o re siḏubuso Ma Jou'ongu Madutu ga'a 'O 'ahu-'ahu. Kristus nga'unu 'o sidoa'a 'ai lese ga'a kama ḏosa ua ra Ma Jou'ongu Madutu, sababu ri-riono toma Ngagara 'Ofi-'Ofi ga'a 'ahu kasingado-ngadolo i'a.

'Ibrani 9:24

Sababu Kristus 'o osama ua toma suyu'u ga'a manusia ya 'a'a re enanga gena-ge pa'i gabara ḇato toma suyu'u ma banari, mada'a Unanga 'o osama toma soroga. Re nange-ne Unanga 'o talaḏi ra Ma Jou'ongu Madutu, la 'O manyiata di'a ngene.

Tingoýi 5:9

Re ananga gena-ge 'aḏi manyanyi nyanyi su-sungi rimoi. “Doba ma Ngowa 'I patasa ḇato di'a 'oro kartasi lo-lolo gena-ge re 'I woi'i ma segele. Sababu Enanga ri sengene re Ma ngaunu 'i pa'ala, la 'I tuusu ngowa-ngowa'a toma suku mo-moini, demo-demo mo-moini, nagara mo-moini re bangsa mo-moini di'a Ma Jou'ongu Madutu.